भांगरभूंय | प्रतिनिधी
पाकिस्तान स्वताच्या कर्मान सोंपतलो, आनी सोंपत आसा. आतंकवाद्यांच्या अड्ड्यांचेर हल्लो केल्या उपरांत भारता आड शस्त्रां उखलपी पाकिस्तान आतां भितरल्यान सोंपपाक लागला. बलुचिस्तान हो स्वतंत्र देश म्हूण बलूच फुडारी मीर यार बलोच हांणी घोशणा केली. आनी ते नदरेन पावल उखलतना पुराय बलुचिस्तानांतल्यान समर्थनूय मेळयलां. आतां कायदेशीर पद्दतीन स्वतंत्र देश करपाक भारतान आनी यू एनान मदत करची म्हूण ते मागतात. खरें म्हणल्यार बलुचिस्तान फाटलो कितलो तेंप मुक्ती खातीर यत्न करता. आतां तांकां येस मेळपाक शकता, अशी चिन्हां आसात.
बलुचिस्तान हो पाकिस्तानाचो सगल्यांत व्हडलो भाग जावन आसा. जमनीच्या आकारा प्रमाण वचत जाल्यार पाकिस्तानाचे जमनींतली 44 टक्के जमीन बलूचिस्तानाची आसा. म्हणटकच बलुचिस्तान स्वतंत्र देश जालो जाल्यार पाकिस्तान अर्दो जातलो. पाकिस्तानाचे 4 भाग आसात. पंजाब, सिंध, खैबर पखतुनख्वा आनी बलुचिस्तान. पाक व्याप्त काश्मीर (आझाद काश्मीर) आनी गिलगीट बाल्टीस्थान हे जम्मू काश्मिराचे भाग आसात, जंय पाकिस्तानान कब्जो केलो. तेन्ना पाकिस्ताना कडेन चारूच भाग आसात, ही सत्यस्थिती आसा. तातुंतच बलूचिस्तान स्वतंत्र देश जालो जाल्यार पाकिस्तान सामकोच भिकेक लागतलो. कित्याकतर बलुचिस्तानांतल्यान तांकां व्हड प्रमाणांत येणावळ मेळटा. तशेंच चीना बरोबर तांचें संबंध ह्या बलुचिस्तान प्रांताक लागुनूच घटमूट आसा. बलुचिस्तान हातांतल्यान गेलो जाल्यार पाकिस्तान जांच्या खुस्तार भारता कडेन झुजपाची भाशा उलयता, तो आदारूच वतलो. तेन्ना बलुचिस्तानाक स्वतंत्र देश जावपाक दिवपाक जायना हे खातीर पाकिस्तान दीस- रात एक करता.
बलुचिस्तानांत खरें म्हणल्यार सामकीच बाबत परिस्थिती आसा. पाकिस्तानान चीना कडेन कबलात करून बलुचिस्तानांतल्या गॅस आनी हेर तरेचे उत्पादनाक भायर व्हरता. हातूंतय मजा आसा. चीन अर्दो फायदो उखलता. हेर उरिल्ल्या पयश्यांतले नव्यो साधनसुविधा उबारपाक, पाकिस्तान सरकाराक पावता. आनी ज्या सुवाते वयल्यान जोडटा तांकां थंयच्यान म्हणल्यार बलुचिस्तानांतल्या लोकांक तातुंतले 2 टक्केच पयशे पावता. म्हणटकच सध्या थंय लुटमार चल्ल्या. पाकिस्तानान चीना कडेन मदत मागली जाल्यार चीन थंय आपले सशस्त्र दळ दवरून नियंत्रण मेळोवपाक सोदता. आनी तांकां मुक्त संचार करपाक दिवप म्हणल्यार आनीक एक अक्षय चीन तयार जावप. तेन्ना पाकिस्तान आपल्या वटेच्यान जे जाता तें करपाक सोदता.
बलुचिस्तानांत जी परिस्थिती आसा ती एका तेंपार बांगलादेशांत आशिल्ली. बांगलादेशाक 1971 पयली पूर्व पाकिस्तान म्हूण वळखताले. पश्चीम पाकिस्तानांतल्यान शासन चलताले, पूर्व पाकिस्तानांतल्यान मेळटा ती संसाधनां जबरदस्तीन काडप, लोकांचें हाल करप, कामा खातीर लोकांक गायब करप. आवाज काडप्यांक ना करप, असले प्रकार चलताले. त्या वेळार संघर्ष वाडिल्ल्यान पाकिस्तानी सैन्यान पूर्व पाकिस्तानांत (आतांच्या बांगलादेशांत) नरसंहार सुरू केल्लो. कितलोसोच लोक भारतांत पळून आयलो. हाची दखल घेवन तेन्नाची प्रधानमंत्री इंदिरा गांधी हांणी राजकी पांवड्यार हालचाली करून पाकिस्तानाक बुद्द शिकोवन पूर्व पाकिस्तान तांच्या कडल्यान मुक्त केलो आनी बांगलादेशाची निर्मिती जाली. भारता आड झुजपाची किंमत पाकिस्तानाक मेजची पडली.
बलुचिस्तानांतूय तशीच परिस्थिती आसा. हज्जारानी लोक गायब जातात. चलयो- बायलो गायब जाल्यात. कामा खातीर लोकांचेर अत्याचार जाता. इतली संसाधनां आसुनूच हो प्रांत सामको गरीब आसा. बलुचिस्तानाच्या खुस्तार चीन आनी पाकिस्तानाची मजा चल्ल्या. आनीक कितलो तेंप हें सोंसपाचें म्हूण आतां मीर यार बलोच हांच्या फुडारपणा खाला लोक एकठांय आयल्यात. बलुचिस्तान स्वतंत्र देश जालो जाल्यारूच उदरगत आसा, हें थंयच्या लोकांच्या लक्षांत आयलां.
भारताचेर आतंकवादी हल्ले जाता आसतना पाकिस्तान ओग्गी बसता. आतंकवाद्यांचे तळ पाकिस्तानांत आसा म्हूण भारतान दाखोवन दितना हल्लेय केले. ताचें समर्थन करपाचें, आनीक आतंकवादी तळ आसात जाल्यार ताचेर स्वता कारवाय करचे सोडून भारताचेर कारवाय करपाक फुडें सरिल्ल्या पाकिस्तानाक आतां भितरल्यान धपके बसपाक लागल्यात. भारतान तांची ताकद कितली उणी आसा हें दाखोवन दिल्या उपरांत आतां बलोच फुडाऱ्यांक आनीक बळ मेळ्ळां. बांगलादेश भारताक तेंकून आशिल्ल्यान आनी थंयच्या नरसंहाराचो, हिंसाचाराचो भारताक फटको बसतालो, म्हूण भारताक पाकिस्ताना थेट आडवें घालचें पडिल्लें. हांगां बलूचिस्तान भारताच्या शिमेक लागना, ताचो फटको भारताक बसना. मात, मनीसपणाच्या नदरेन आनी संवसारीक ताकद म्हूण भारत मुखार सरता हे पळोवन बलुची फुडाऱ्यांनी भारता कडल्यान मदत मागल्या. बलुचिस्तान प्रकरणाक लागून पाकिस्तान सामको जमनीर आयलां. चीनूय बॅकफूटाचेर पावला. पाकिस्तानाचो हो व्हडलो भाग वेगळो जालो जाल्यार पाकिस्तानाचें व्हड अर्थीक लुकसाण जातलें. चीनाचें कशें कितें तें फुडलें फुडें. हे वटेन पीओकेचो लोकून मुक्ती खातीर वा भारतांत विलीन जावपा खातीर मागणी करपाक लागतलो, हें मात खरें. तेन्ना पुराय जम्मू- काश्मीर भारताचो भाग जावपाचो दीस लागीं येता, अशें आमच्यान म्हणूं येतां.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
