भांगरभूंय | प्रतिनिधी
पणजीः बदलती जिणेशैली आनी ताण हें गोडेंमुताचें दुयेंस वाडपा फाटलें मुखेल कारण. फक्त वखदांच न्हय तर आध्यात्मीक पद्दत वापरून दुयेंस पयस करपाचेर आमी लक्ष दितले. ध्यान लावन कुडीतली उर्जा वापरून ह्या दुयेंसाचेर मात करूं येता अशे शिवा सायन्सची अध्यक्ष डॉ. नम्रता रेडकार हांणी सांगलें.
संवसारीक गोडेंमूत दिसा निमतान शिवा सायन्स मेडिटेशन्स ही संस्था ब्रम्हकुमारी, युवा, पिरामीड स्पिरीच्युएल सोसायटी हांच्या जोड पालवान गोडेंमूत दुयेंसा विशीं जागृताय करून हें दुयेंस पयस करपा खातीर जागृताय रेली घडोवन हाडटले. हे रेली विशीं म्हायती दितना डॉ. नम्रता रेडकार पत्रकार परिशदेंत उलयताल्यो. ह्या वेळार पिरामीड स्पिरीच्युएल सोसायटीचे नवनाथ वाट्टे, ब्रम्हकुमारी सिध्दी आनी हेर वांगडी हजर आशिल्ले. ही रेली श्यामा प्रसाद मुखर्जी स्टेडीयमाचेर सकाळीं 7 वरांचेर सुरू जावन ती 9 वरांचेर सोंपतली. मजगतीं, भलयाकी संचालनालय ह्या वेळार गोडेंमुता खातीर फुकट स्क्रिनींग करतलें.
अशीं कितलिंशींच दुयेंसां आसात जे आतांचे वैजकी विज्ञान तीं पयस करपाक शकनात. पूण उर्जेचे योग्य प्रमाण वापरून वेगळो उपचार गरजेचो. गोडेंमुताचीं लक्षणां पयलीं दिसनात. अचकीत अल्सर जावन हात, पाय कातरपाची वेळ येता. हे खातीर कुडीतल्या उर्जेचे थर वाडोवप गरजेचें अशें डॉ. रेडकार हांणी सांगलें.
पयली आमचे जाण्टे साकर, गोड पदार्थ खूब खाताले. पूण तांणी गोडेंमूत हें उतर लेगीत आयकूंक नाशिल्लें. आतां ल्हान भुरग्यांचे स्क्रिनींग केल्यार तांकां गोडेंमूत मेळटलें. आतांची जिणेशैली आनी ताण हाचे मुखेल कारण. 30 ते 35 वर्सा पिरायेच्या तरणाट्यां मदीं चडशीं लक्षणां दिसतात. हाचें कारण म्हणल्यार आमी सर्तीत आसात आनी कशेय भशेन आमकां पयले येवपाकच जाय. ह्या सगल्यांचेर उपाय म्हणटा त तो आधात्म्य, अशी म्हायती डॉ. रेडकार हांणी दिली.
बरी न्हीद घेवप, निरशेवणी आनी चिंता कमी करपाचे जिणेशैलीचेर आमी लक्ष दितात. फक्त ध्यान करून आपले कुडीतले उर्जेक उर्बा दिवन आनी मनाक थाकाय दिवन गोडेंमूत पयस करूं येता. गोडेंमूत हें दुयेंस न्हय जाल्यार आमचे कुडींत कितें तरी समस्या आसा हें सांगता. पूण खूब जाण जिणेशैली बदलून ह्या दुयेंसाचेर मात करतात खरे. पूण उपरांत आडनदर केल्ल्यान हें दुयेंस परतून जाता अशें डॉ. रेडकार हांणी सांगलें.
गोडेंमूत हें सासणाचें दुयेंस न्हय. ह्या दुयेंसाक अामी पयस करूंक शकतात. ताचेर मात करूंक शकतात अशें पिरामीड स्पिरिच्युएल सोसायटीचे नवनाथ वाट्टे हांणी सांगलें.
ताण आनी आहार हीं गोडेंमुता फाटलीं दोन कारणां. जंक फुडाचें सेवन करून कार्बोहायड्रेट, फॅट्स आनी प्रोटीन आशिल्ले अन्न आमी खायनात. कार्बोहायड्रेट्स कुडींत गेले उपरांत ताचो ग्लुकोस तयार जाता. पूण तणावाच्या वातावरणांत आमी जगत आशिल्ल्या कारणान कुडीतल्यो 7 ट्रीलयन पेशी ह्यो ग्लुकोस ओडून घेनात आनी उपरांत हे ग्लुकोस स्वादुपिंडात सांचून उरता आनी उपरांत ते इन्सुलिनांत बदलता, अशी म्हायती वाट्टे हांणी दिली.
ताणाचेर नियंत्रण दवरल्यार आनी पोशक आहारा घेतल्यारच गोडेंमुताच्या दुयेंसाचेर मात करूं येता. जर जिणेशैलींत बदल केलो जाल्यार 95 टक्के गोडेंमुता पासत पयस रावप शक्य आसा, अशें वाट्टे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
