भांगरभूंय | प्रतिनिधी
तिसर्या मयें महोत्सवाचो समारोप: कलाकारांचो केलो भोवमान
दिवचले: चारूय वटेन उदरगत चालू आसतनाच आपली परंपरा, संस्कृती, गांव तितलेच आत्मीयतेन सांबाळप गरजेचें. आपली संस्कृताय नवे पिळगेन सांबाळचे खातीर गांवगिर्या वाठारांनी महोत्सव जावप गरजेचें, अशें मुख्यमंत्री डॉ. प्रमोद सावंत हांणी सांगलें.
आयज रोजगार, कंत्राटदार आनी हेर मळांचेर बिगर गोंयकार दिसतात. ह्या दरेका मळार म्हजो गोंयचो तरणाटो मुखार येवचो हो आमचो ध्यास. हेच भावनेन स्वयंपूर्ण आनी आत्मनिर्भर गोंयां खातीर कुशळटाय, उत्पादन, सेवा ह्या सगल्या मळांचेर तरणाट्यांनी मुखार सरचें. हाका लागून समाजीक, शिक्षणीक संस्था, शिक्षक, ज्येश्ठ नागरीक हांणी फुडाकार घेवचो, अशें मुखार मुख्यमंत्र्यान म्हणलें.
रायझिंग युथ मयें, कला आनी संस्कृती खातें, विजयानंद ज्ञान प्रसारक संस्था आनी महामाया हायस्कूल आदले विद्यार्थी संघटणा हांचे वतीन आयोजीत दोन दिसांचो तिसरो मयें महोत्सवाच्या समारोप सुवाळ्याक मुख्यमंत्री डॉ. सावंत मुखेल सोयरे म्हणून हजर आशिल्ले.
माचयेर गोवा कोंकणी अकादमीचे अध्यक्ष डॉ. पूर्णानंद चारी, येवकाराध्यक्ष दयानंद कारबोटकार, आदले आमदार धर्मा चोडणकार, डॉ. स्नेहा भागवत, आयोजन समितीचे अध्यक्ष रुपेश ठाणेकार, कमलाकांत तारी, सरपंच हजर आशिल्ले.
गांवगिर्या वाठारांतल्या विद्यार्थ्यांक योग्य मार्गदर्शन मेळपाची गरज आसा. कांय शिक्षक विद्यार्थ्यांक योग्य दिका दाखयनाशिल्ल्यान तांचो फुडार पेड्यार जाता आनी चुकीच्या मार्गान गेल्ल्यान ताचो जिणेचेरूय परिणाम जाता. शिक्षकांनी हाचें भान दवरून योग्य मार्गदर्शन करचें अशेंय मुख्यमंत्र्यान सांगलें. ह्या वेळार मुख्यमंत्र्यांचे हस्तुकीं किर्तनकार शिवलीलाताई पाटील, शुभदा गांवकार, सीताराम सावंत, कमलावती चोडणकार हांचो शाल, श्रीफळ आनी यादस्तीक भेटोवन भोवमान केलो.
ह्या वेळार डॉ. च्यारी हांणी संस्कृती राखपाचें काम तशेंच पुरातन दायज राखपाचें काम अशे तरेच्या उत्सवांतल्यान जाता अशें सांगलें.
धर्मा चोडणकार, डॉ भागवत, दया कारबोटकार हांणी विचार मांडले. येवकार रुपेश ठाणेकार, उपकार उदय पत्रे हांणी मानले. शिवलीला ताई पाटील हांचें ह्या वेळार किर्तन रंगलें. सांस्कृतीक कार्यावळीकूय बरो प्रतिसाद मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
