भांगरभूंय | प्रतिनिधी
नवी दिल्ली, खबरां संस्था ः आधार, पॅन, मतदार आयडी कार्ड, ड्रायव्हिंग लायसन्स आदीं दस्तावेजांचेर नांव, पत्तो, मोबायल नंबर बदलपा खातीर वेगवेगळ्या कार्यालयांनी वच्चें पडचें ना. केंद्र सरकार युनिफायड डिजिटल आयडेंटिटी सिस्टम लागू करपाची तयारी करता. ते खातीर लोकांक तयार जावपी पोर्टलाचेर एकाच सुवातेर आपलो पत्तो, मोबायल नंबर, नांव आदी अपडेट करपाक मेळटले. हो बदल आपोआप सगळ्या म्हत्वाच्या वळखपत्रांत अपडेट जातलो.
हें पोर्टल कशें काम करतलें?
आधार, पॅन, ड्रायव्हिंग लायसन्स आनी पासपोर्ट सारकिल्ले सगळे वळखपत्र एकठांय येतले अशे तरेन पोर्टलाची रचना करतात. अपडेटा खातीर पोर्टलाचेर वचून पर्याय निवडचो पडटलो. देखीक मोबायल क्रमांक बदलपाचो वेगळो पर्याय आनी पत्तो बदलपाचो वेगळो पर्याय आसा. संबंदीत दस्तावेज अपलोड करचे पडटले. सगळ्या दस्तावेजांनी बदल तीन कामाच्या दिसां भितर अपडेट करतले.
नवे वळखपत्र कशें मेळोवचें?
० ह्या बदला वांगडाच ह्या पोर्टलाचेर नवे वळखपत्र मेळोवपाचोय पर्याय आसतलो. हे खातीर शुल्क भरपा वांगडाच पोर्टलाचेर अर्ज करचो पडटलो.
० नव्यान अपडेट केल्ले वळखपत्र 7 कामाच्या दिसां भितर पोस्टांतल्यान संबंदीतांच्या घरा पावतलें.
० कार्यालयांत वचून वळखपत्र घेवपाचोय पर्याय आसा.
० पर्याय निवडल्या उपरांत तांकां मोबायलाचेर अपडेटेड वळखपत्र मेळोवपाची तारीख आनी वेळ कळटलो.
अधिकाऱ्यां कडल्यान मेळिल्ले म्हायती प्रमाण, सध्या चांचणी सुरू आसा. कांय तंत्रीक आनी कायदेशीर समस्या आशिल्ल्यो. ताचे काम आतां निमाण्या पांवड्यार आसा. खासा करून डेटा सुरक्षीत दवरपा खातीर पुराय पुरावो प्रणाली तयार करपाचें आव्हान आशिल्लें, जें पुराय जाता. कांय म्हयन्यां उपरांत बेगीनूच हें पोर्टल सामान्य लोकां खातीर सुरू जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
