भांगरभूंय | प्रतिनिधी
पणजी : समाजीक येवजण्यां खातीर पात्र आशिल्ल्या ज्या लाभार्थ्यांनी बँक खात्याक आधारची जोडणी केल्या, अश्यांकूच प्रलंबीत रकमेचो लाव दिवपाच्या सरकाराच्या निर्देशांचे कांय खात्यां कडल्यान उल्लंघन जाता. हे मुखार अशे प्रकार दिसून आयले जाल्यार ताका संबंदीत अधिकारी जापसालदार आसतले, अशें परिपत्रक वित्त खात्यान जारी केलां.
कांय दिसा आदीं मुख्यमंत्री डॉ. प्रमोद सावंत हांणी अर्थसंकल्पाचे नदरेन मुख्य सचीव, हेर खात्यांचे सचीव, दोनूय जिल्होधिकारी तशेंच खातें मुखेल्यां वांगडा बसका घेतली. तातूंत दयानंद समाजीक सुरक्षा, लाडली लक्ष्मी, गृहआधार, कलाकार पेन्शन ह्या समाजीक येवजण्यांचें प्रलंबीत रकमेचें वितरण बेगिनात बेगीन करपाचे निर्देश तांणी दिल्ले. तशेंच तातूंत पारदर्शकताय येवचे खातीर आधार प्रणाली वरवीं म्हणल्यारूच बँक खात्या कडेन आधार जोडणी आशिल्ल्या लाबार्थ्यांक प्रलंबीत रकमेचें वितरण करपाचोय सल्लो तांणी दिल्लो. तरी लेगीत कांय सरकारी खात्या कडल्यान आधार प्रणालीचो वापर जायना, अशें दिसून आयिल्ल्यान वित्त खात्यान परिपत्रक जारी केलां. हे मुखार ह्या निर्देशांचें उल्लंघन जालें जाल्यार ताका संबंदीत अधिकारी जापदालदार आसतलें, अशें परिपत्रकांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
