आदीं पुनर्वसन, उपरांत घरां मोडात

भांगरभूंय | प्रतिनिधी

बोगदाचे लोक भुमिकेचेर ठाम; सरकारी यंत्रणा गेली परत

भांगरभूंय । प्रतिनिधी

वास्कोः तीस वर्सां आदीं बोगदा वाठारांतलीं चार- पांच घरां मोडपा खातीर सरकारी यंत्रणां आयिल्ली. तांकां वरिश्ठांच्यो सुचोवण्यो मेळ्ळे उपरांत परतून वच्चें पडलें. ते जमनीर मुरगांव बंदर प्राधिकरणान आपलो अधिकार सांगलां. हे जमनी संबंदांतलीं सगळीं कागदपत्रां आशिल्ल्याचो दावो करतात, पूण आदीं आमचें पुनर्वसन करात आनी उपरांतूच तीं घरां मोडात, अशी भुमिका त्या घरांतल्या लोकांनी घेतल्या.

हे आदीं फेब्रुवारींत तीं घरां मोडपाची सगळी तयारी केल्ली, पूण मुरगांवचे आमदार संकल्प आमोणकार हांणी त्या वेळार हस्तक्षेप केल्लो. जे मेरेन आपूण आसा, ते मेरेन तुमचीं घरां कोणूच मोडचो ना, अशें उतर आमोणकार हांणी दिल्लें. ते उपरांत मुख्यमंत्र्यानूय योग्य तो उपाय काडपाचें आस्वासन दिल्लें.

भारतलायन बोगदा वाठारांत तीं घरां आसात. त्या घरांनी 25- 30 जाण सावतात. तारीवाडो बोगदा वाठारांत व्हड पालसण पडिल्लें, तेन्ना थंयच्या लोकांचें सड्या वयल्या गोंय पुनर्वसन वसणुकेंतले इमारतींत पुनर्वसन केल्लें. भारतलायन बोगदा वाठारांतल्या संबंदितांचें लेगीत 2011 त पुनर्वसन करपाचें उतर दिल्लें. चार वर्सां आदीं मुरगांव उपजिल्होधिकारी कार्यालया कडल्यान सगळे सोपस्कार पुराय केले उपरांत पुनर्वसन करतले अशें सांगिल्लें. पण अजून लेगीत तांचें पुनर्वसन जावंक ना, मात तीं घरां मोडपा खातीर यंत्रणा कामाक लागली.

सोमारा 23 सप्टेंबराक तीं घरां मोडचे खातीर संबंदीत सरकारी यंत्रणा थंय आयिल्ली. त्या वेळार घरांत एक ज्येश्ठ नागरीक बायल सोडून कोणूच नाशिल्लो. संबंदितांनी ताका घर रितें करपाक सांगलें, ताका लागून ती भियेली. सरकारी यंत्रणेक थंय पळोवन हेर लोकूय थंय जमले. नगरसेविका श्रद्धा आमोणकार, महेश नायक, अविनाश नायक आनी हेर लोक थंय पावले. तांणी संबंदितांक धीर दिलो. आमदार आमोणकार हांची कर्जत (मुंबय- महाराष्ट्र) मतदारसंघाचे निरिक्षक म्हूण नेमणूक जाल्ल्यान ते थंय गेल्यात. लोकांनी तांचे कडेन संपर्क केले उपरांत तांणीय धीर दिलो. ते उपरांत कांय वेळांतूच संबंदीत सरकारी यंत्रणा परत गेली. ह्या वेळार मुरगांव बंदर प्राधिकरणाचे प्रतिनिधी, केंद्रीय उद्देगीक सुरक्षा दळाचे जवान लेगीत थंय उपस्थीत आशिल्ले.