भांगरभूंय | प्रतिनिधी
मंत्री गोविंद गावडेः तरणाट्यांनी बिरसा मुंडा हांचे गूण आत्मसात करचे
भांगरभूंय | प्रतिनिधी
पणजी : आदिवासी समाजाक तांच्याच मनशां कडल्यान चड धोको आसा. वैयक्तीक सुवार्था खातीर काम करपी फुडार्यांक समाजान बळी पडचें न्हय. तरणाट्यांनी कोणाच्याच आदाराचेर निंबून रावचें न्हय, असो सल्लो कला आनी संस्कृती मंत्री गोविंद गावडे हांणी शुक्रारा पणजे बिरसा मुंडा हांचे 150 वे जयंती निमतान आयोजीत कार्यावळींत दिलो. ह्या वेळार ‘उटा’ संघटणेचे प्रकाश वेळीप, दया गांवकार, विश्वास गावडे, दुर्गादास गावडे आनी हेर पदाधिकारी हजर आशिल्ले.
राजकी वा समाजीक फुडारी आपुणूच जल्माक येना. रस्त्यार देंवून काम करपी कार्यकर्त्यांक लागूनच फुडारी तयार जातात. कार्यकर्त्यांच्या त्यागाक लागूनच फुडारी घडटात. मात कांय जाणांक हाची जाणीव नासता. तांकां दिसता आपूण फक्त आपल्या स्वताच्या नेटार फुडारी जाला. अश्या वेळार तांकां मस्ती मारता आनी ते रस्त्यार येवन कितेंय बडबडटात. इतिहासांतूय हाचे जायत्य देखी आसात. असल्या फुडार्यांनी कार्यकर्त्यांचो घात करचो न्हय, अशें मंत्री गावडे हांणी म्हणलें.
बिरसा मुंडा ब्रिटिशां आड लढिल्ले. मात आयज गोंयच्या आदिवासी समाजाक स्वताच्याय मनशां वांगडा लढचें पडटा. कारण ह्या लोकांक आदिवासी लोकांक व्हड जावपाक दिवपाचें ना. हाका जाप दिवपाक समाजांत एकवट आसप गरजेचें. आयच्या तरणाट्यांनी बिरसा मुंडा हांकां समजून घेवंक जाय. तरणाट्यांनी तांचे गूण आत्मसात करप गरजेचें, अशें मंत्री गावडे हांणी मुखार म्हणलें.
बिरसा मुंडा हांणी लोकांक एकठांय हाडपाक तांकां जेवण दिवंक नाशिल्लें. आयज मात काय लोक आपले कार्यावळींत वांटेकार जावपा खातीर पयशांचे हांयस दाखयतात. तरणाट्यांनी स्वताच्या पयशांनी हे कार्यावळींत वांटेकार जावचें. तांणी पयशांच्या हांयसाक बळी पडचें न्हय, असो उलो मंत्री गावडे हांणी मारलो. समाजान सत्तेक दसून रावपी दोमळ्या पसून स्वताक जपपाक जाय. ‘उटा’चे कार्यावळीचें सगळ्यांक आमंत्रण धाडिल्लें. आमी दरेकल्याचो मान राखला. तरीय जर कोणाचे कसलेय गैरसमज आसल्यार ताचेर उलोवप करून हो प्रस्न सोडोवपाक मेळटलो, अशेंय मंत्री गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
