भांगरभूंय | प्रतिनिधी
पुराय वेळ कंपनी सचिव नेमूंक नाशिल्ल्याचो ठपको
भांगरभूंय । प्रतिनिधी
पणजीः पुर्ण वेळ कंपनी सचिव नेमूंक नाशिल्ले कारणान केंद्रीय कोर्पोरेट वेवहार मंत्रालयान गोंय आदिवासी वित्त आनी उदरगत महामंडळाचेर चपराक बसयला. महामंडळान कंपनी कायद्याचें उल्लंघन केला आनी सद्या कंपनी सचिवांची कामा महामंडळ आवटसोर्स करता, अशी म्हायती आदिवासी कल्याण मंत्री डॉ. प्रमोद सावंत हांणी दिली.
सांतआंन्द्रेचे आमदार विरेश बोरकार हांणी विधानसभेत विचारिल्ल्या प्रश्नाक लेखी जापेत आदिवासी कल्याण तशेच मुख्यमंत्री डॉ. प्रमोद सावंत हांणी जाप दिली.
आदिवासी वित्त आनी उदरगत महामंडळान कंपनी सचिव नेमूंक ना. कंपनी सचिव हे पुराय वेळ पद तयार करपा खातीरचो प्रस्ताव वित्त खात्याक धाडला. सद्या महामंडळान प्रिया चिमुलकार आनी एसोसीएटस हांची सेवा कंपनी सचिवाचे कामां खातीर आवटसोर्स केल्यात.
कंपनी सचिव नेमूंक नाशिल्ले कारणान महामंडळान कंपनी कायदो 2013चे कलम 203(1)चे उल्लंघन केला. देखून महामंडळात एक कंपनी सचिव पद तयार करचे म्हूण महामंडळान वित्त खात्याच्या रिण वेवस्थापन विभागाक बरयलां. ह्या उल्लंघना खातीर कोर्पोरेट वेवहार मंत्रालयाचे मास्टर डेटात महामंडळाची स्थिती “सक्रीय – अनुपाल नाशिल्ले” अशी दाखयता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
