भांगरभूंय | प्रतिनिधी
मुखेल सोयरे म्हूण समितीन दिलां मुख्यमंत्र्याक निमंत्रण
भांगरभूंय । प्रतिनिधी
सांगें : फाटल्या वर्सां सावन सुरू जाल्ल्या सांगेंच्या वाडे कुर्डी जावपी आदिवासी महोत्सव अंदूं व्हड उमेदीन आनी आगळे वेगळे पद्दतीन मनोवपा खातीर नेटान तयारी चल्ल्या. अंदूं हो महोत्सव तीन दीस 24, 25 आनी 26 जानेवारी ह्या काळांत मनयतले. सांगें आदिवासी खेळां आनी सांस्कृतीक क्लबाचे अध्यक्ष सुहास देईकार हांच्या फुडारपणा खाला हो महोत्सव जातलो.
हालींच समितीच्या पदाधिकाऱ्यांनी मंत्रालयांत मुख्यमंत्री डॉ. प्रमोद सावंत हांची भेट घेवन तांकां समाज कल्याण मंत्री तशेंच सांगेंचे आमदार सुभाष फळदेसाय हांचे उपस्थितींत महोत्सवाचे मुखेल सोयरे म्हूण हाजीर रावपाक निमंत्रण दिलें आनी पुराय कार्यावळीचो नियाळ दिलो.
समितीन कला आनी संस्कृती तशेंच आदिवासी कल्याण खात्याचे मंत्री रमेश तवडकार हांकांय महोत्सवाचें निमंत्रण दिलें. तेचवरी समारोपाचे कार्यावळीक मुखेल सोयरे म्हूण हाजीर रावचे खातीर आदले मंत्री गोविंद गावडे हांकां निमंत्रण दिलां. ह्या वेळार आदले आमदार तशेंच एसटी उदरगत आनी वित्त म्हामंडळाचे अध्यक्ष वासुदेव मेंग गांवकार हाजीर आशिल्ले.
हो महोत्सव येसस्वी करचे खातीर सांगेंचे आमदार आनी मंत्री सुभाष फळदेसाय हांणी आयोजकांक सगले तरेचो आदार केला. तांच्या मार्गदर्शना खाला हो महोत्सव जातलो.
पोरूं सांगें आदिवासी खेळां आनी सांस्कृतीक क्लबा वतीन कला आनी संस्कृती संचालनालय, आदिवासी कल्याण खातें, समाज कल्याण खातें हांच्या पावलान तशेंच श्री चौरसमाया युवा खेळां आनी सांस्कृतीक क्लब हांच्या जोडपालवान सांगेंच्या वाडी कुर्डी सरकारी हायस्कुलाच्या मैदानाचेर पयलेच खेपे दोन दिसांच्या आदिवासी महोत्सवाचें आयोजन केल्लें.
ह्या महोत्सवांत आदिवासी संस्कृती, कला, खाद्यपदार्थ, हस्तकला हांचे प्रदर्शन मांडटले. विवीध खेळां प्रकार, सर्ती घेतले. कांय मानेस्तांचो सत्कार लेगीत करतले. ह्या महोत्सवाचें खाशेलें आकर्शण म्हणल्यार फोव, आंबील, किसमूर, पिठा गुळयो, द्रोण, पातोळ्यो, शेवयो, नेवऱ्यो, गांवठी वखदां हांचे स्टॉल आसतले. तशेंच ट्रायबल कुजिनांत परंपरीक जेवण आनी खाद्यपदार्थाचो आस्पाव आसतलो. हो महोत्सव येसस्वी करपाची व्हड जापसालदारकी धुरा सुहास देईकार हांच्या भुजांचेर आसा. तांकां सुमार 200 परस अदीक कार्यकर्ते मजत करतात. महोत्सव येसस्वी करचे खातीर विवीध समित्यो वेंचल्यात. कार्यकारी अध्यक्ष म्हूण वासुदेव मेंग गांवकार हांची निवड केल्या. प्रत्यक्ष रुपरेशा, आंखणी सुरू जाल्या. मंत्री फळदेसाय हांणी आयोजकांक पुराय तेंको आनी आदार करपाचें आस्वासन दिलां आनी महोत्सव येसस्वी जावचो हे खातीर शुभेत्सा दिल्यात. अंदूंचो हो महोत्सव नाविन्यपूर्ण करचे खातीर समितीन पेंगट बांदलां. तशेंच रसिकांक कार्यावळींची भूस दिवपाचेर भर दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
