भांगरभूंय | प्रतिनिधी
राजस्थानांतली घडणूक, व्हिडियो व्हायरल
जयपूर, खबरां संस्था : मणीपूर फाटोफाट आतां राजस्थानांत एके २० वर्सांचे आदिवासी बायलेक कपडे काडून भोंवडावपाचें प्रकरण घडलां. प्रतापगड जिल्ह्यांतल्या धारियावाडाची ही घडणूक. तिच्या घोवानूच तिका गांवकारां मुखार १ किलोमिटर चलपाक लायली. ३१ आॅगस्टाची ही घडणूक. आतां व्हिडियो व्हायरल जातकच ती उक्ताडार आयल्या. ते बायलेन काल रातीं पुलीस कागाळ केल्या. १२ जाणांचेर दुबाव आसा. तिच्या घोवाक आनी हेर सात जाणांक अटक जाल्या.
हे घडणुकेचेर मुख्यमंत्री अशोक गेहलोत हांणी सांगलें, सुसंस्कृत समाजांत अशा गुन्यांवकारांक स्थान ना. आमी दोशींचेर कडक कारवाय करतले. आतां हे घडणुकेचो राजकी फायदो घेवपाक सर्त सुरू जाल्या.
पुलिसांनी दिल्ले म्हायती प्रमाण, ते बायलेचें लग्न थंयच्या एका तरणाट्या कडेन देड वर्सां पयलीं जाल्लें. लग्ना उपरांत स म्हयन्यांनी तिका शेजारच्या उपला कोटा गांवांतल्या एकल्यान हुबारुन व्हेल्ली. ३० आॅगस्टाक ती त्या तरणाट्या वांगडा गांवांत आयली. तेन्ना घोवाच्या कुटुंबान तिका जबरदस्तीन पहाडा गांवांत हाडली. मागीर घोवान गांवकारां मुखार तिचे कपडे काडले आनी कपडे नासतना १ किलोमिटर चलपाक लायली. व्हायरल व्हिडियोंत ती व्हडल्या व्हडल्यान रडटना, आपल्याक सोडात अशी विनवणी करतना दिसता. गांवांतले बरेच लोक हाजिर आशिल्ले. पूण घोवाक कोणेच आडावंक ना. ती बायल स म्हयन्याची गुरवार आसा. तिचे कपडे काडपाक घोवा गेल्या बायलांनी मजत केली.
ते बायलेन काल कागाळ करतकच पुलिसांनी घोव आनी हेर १४ जाणां आड कागाळ केली. ते सगले रानांत पळून गेल्यात. पुलिसांनी आठ जाणांक अटक केल्या. उरिल्ल्यां सोदपाक पुलिसांनी स पंगड तयार केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
