आदिवासी प्रज्ञावंत पुरस्कारा खातीर अर्ज आमंत्रीत

भांगरभूंय | प्रतिनिधी

पणजीः आदिवासी कल्याण खात्यान पात्र व्यक्ती कडल्यान वर्स २०२५-२६ खातीर आदिवासी प्रज्ञावंत पुरस्कार अर्ज मागयल्यात. आदिवासी वनबंधू सक्षमीकरण खाला मनोवपी प्रेरणा दिसा निमतान ह्या पुरस्कारांचें वाटप जातलें, अशी कळोवणी आदिवासी कल्याण खात्यान काडल्यान.
आदिवासी कल्याण संचालनालय, गोंय सरकार ’प्रेरणा दीस’ कार्यावळीच्या निमतान, शिक्षणीक, सांस्कृतीक, खेळ, कृशी वा हेर खंयच्याय क्षेत्रांत उल्लेखनीय कामगिरी करपी अनुसुचीत जमातींतल्या नागरिकां कडल्यान वर्स २०२५-२६ खातीरच्या आदिवासी प्रज्ञावंत पुरस्कारा खातीर अर्ज आमंत्रीत केल्यात. हो पुरस्कार २५ मे २०२६ ह्या दिसा भेटयतले.
गोंय राज्यांतले अनुसुचीत जमातीच्या कल्याणा खातीर कार्यरत आशिल्ली व्यक्ती वा नामनेची संस्था ह्या पुरस्कारा खातीर अर्ज वा शिफारस करपाक शकता. अर्जदारांनी अर्जा वांगडा बायोडाटा, वर्स २०२५-२६ तल्या संबंदीत क्षेत्रातले कामगिरीचो संक्षिप्त अहवाल, स्वता प्रमाणीत केल्लें एसटी प्रमाणपत्र, दोन फोटो आनी संस्थेचें शिफारस पत्र जोडचें. पुराय भरिल्लो अर्ज आदिवासी कल्याण संचालनालय, ५ वो माळो, श्रमशक्ती भवन, पाटो, पणजी गोंय ह्या नाम्याचेर सादर करचो. अर्ज नमुनो आदिवासी कल्याण खात्याचे वॅबसायटीचेर उपलब्ध आसा. अर्ज १० मे २०२६ वा ताचे पयलीं पावपाक जाय.