भांगरभूंय | प्रतिनिधी
नवी दिल्ली, खबरां संस्था: सर्वोच्च न्यायालयाच्या एका खंडपीठान सोमारा एका आदिवासी क्रिस्ताव मनशाक गांवांतल्या कब्रस्तानांत दफन करपाच्या अधिकाराचेर विभागणी केल्लो निकाल दिलो. न्या. बी. व्ही. नागरत्ना आनी न्या. सतीशचंद्र शर्मा हांणी हें प्रकरण व्हडल्या पीठाकडेन धाडचे बदला सामान्य निर्देश जारी केले.
मरण आयिल्ल्या मनशा ताच्या हिंदू पूर्वजांक जंय दफन केल्ले थंय दफन करपाक शकता? कारण संबंदीत मनशान क्रिस्तांव धर्म स्वीकारिल्लो. हे विशींचें हें प्रकरण. छत्तीसगड सरकारान सांगलें, कायदो आनी सुव्यवस्थेचो प्रस्न येवचो न्हय म्हणून मरण आयिल्ल्याची कूड २० किमी पयस क्रिस्तांवां खातीरचे स्वतंत्र मसंडभूंयेंत दफन करची.
दोन न्यायमूर्तींचें मत : न्या. नागरत्ना हांणी सल्लो दिलो, मरण आयिल्ल्याची कूड ताचे खाजगी शेतजमनींत दफन करची. राज्यांत सगले कडेन क्रिस्तावांची मसंडभूंय निश्चीत करची अशें तांणी सांगलें.
न्या. शर्मा हांणी, भौशीक वेवस्था कायम दवरप हें समाजाच्या हिताचे आसा आनी तांणी हायकोर्टाचो निर्णय कायम दवरला.
रोहिंग्या खंय रावतात तें याचिकाकर्त्यांनी सांगचें : कोर्ट
राजधानी दिल्लींत सरकारी आनी महापालिकांच्या शाळांनी बांगलादेशी रोहिंग्यांच्या भुरग्यांक शिक्षणा खातीर प्रवेश दिवपाचे मागणेचेर सर्वोच्च न्यायालयाचे न्यायमूर्ती सूर्यकांत आी न्या. एन के सिंह हांच्या पिठान याचिकाकर्त्याक विचारलें, रोहिंग्या कुटूंब कोण? तें खंयचे वसणुकेंत रावता हें सांगचें. कोर्टान याचिकाकर्त्याक आपली जाप दाखल करपाक दोन सप्तकांचो वेळ दिवन सुनावणी फुडें धुकल्ली. एनजीओ सोशल ज्युरिस्ट ए सिव्हिल राइट्स ग्रुपान सर्वोच्च न्यायालयांत याचिका दाखल करून दिल्ली हायकोर्टाच्या आदेशाक आव्हान दिल्लें. याचिकाकर्त्यां वरवीं रोहिंग्या कुटुंबांतल्या भुरग्यांक शाळेंत प्रवेश दिवपाची मागणी हायकोर्टान भायर मारीत म्हणलें, देशाचे मोलादीक हक्क फकत देशांतल्याच नागरिकां खातीर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
