भांगरभूंय | प्रतिनिधी
रमेश तवडकार : आदर्श युवक संघान मनयलो संकल्प दीस
भांगरभूंय । प्रतिनिधी
काणकोण : बाळ्ळी आंदोलनाचो घग चड करून काणकोण आनी केपेक चड लागलो. आदिवासींच्या हक्का खातीर आदर्श युवक संघाची म्हत्वाची भुमिका आसा. कांय जाणांक फटीचो आदार घेवन फट हें खरें आशिल्ल्याचें दाखोवचें पडटा. बाळ्ळी आंदोलनांत बळी गेल्ल्या मंगेश गांवाकर आनी दिलीप वेळीप हांचें बलिदान फुकट वचपाक दिवचे ना, अशें आदिवासी फुडारी तशेंच सभापती रमेश तवडकार हांणी सांगलें. आदर्श युवक संघान कल्याण खात्याच्या पालवान आयोजीत केल्ल्या संकल्प दीस कार्यावळींत ते उलयताले.
आमोण्यां आदर्श ग्रामांत आयोजीत केल्ले कार्यावळींत सभापती वांगडा माचयेर आदिवासी कल्याण खात्याचे संचालक दीपक देसाय, अनुसुचीत जाती-जमाती आयुक्त दीपक करमळकार, राष्ट्रीय हेर मागास वर्ग गोंय अध्यक्ष मधू नायक, बलराम शिक्षम संस्थेचे अध्यक्ष अंकुश गांवकार, उपजिल्होधिकारी रमेश गांवकार, दक्षीण गोंय भाजपाचे अध्यक्ष प्रभाकर गांवकार, भाजपाचे काणकोण मंडळ अध्यक्ष प्रभाकर गांवकार, पैंगीणची सरपंच सविता तवडकार, श्रीस्थळची सरपंच सेजल गांवकार, खोतीगांवची सरपंच वृंदा वेळीप, धाकू मडकयकार, कृष्णा वेळीप, अशोक गांवकार, प्रियांका वेळीप, श्रीकांत तवडकार, अजय गावडे, वैशाली नायक, कुंदा वरक, विधी वेळीप, चंद्रकांत गांवकार हाजीर आसले.
सुरवेक मंगेश गांवकार आनी दिलीप वेळीप हांच्या फोटवांक फुलांचो हार घालून तांकां आर्गां ओंपलीं.
सभापती तवडकार हांणी उटा आंदोलनाचो पुराय इतिहास हाजीर आशिल्ल्यां मुखार मांडलो. गोकुवेधचो लडो, मुळाव्या अधिकारां खातीर काडिल्ली रथयात्रा ह्या सगळ्यांत आदर्श युवक संघाचे कार्यकर्ते सक्रीय आसले. आदर्श युवक संघाक लागुनूच सगळीं आंदोलनां येसस्वी जालीं. आयज जे कांय जाण फुडें फुडें मिरयतात, तातूंतलो एकलोय त्या वेळार नासलो. समाजांतलो समतोल सांबाळटनाच गोंयभर 5 हजार सक्षम कार्यकर्ते तयार करपाचो संकल्प आयच्या दिसा करतात, अशें सभापतीन सांगलें.
ह्या वेळार रमेश गांवकार, अंकुश गांवकार, सविता तवडकार, धाकू मडकयकार, प्रभाकर गांवकार, दीपक करमळकार, अजय गावडे, दीपक देसाय हांचीं भाशणां जालीं. हे कार्यावळींत काणकोण मतदारसंघांतल्या अटल आसरा येवजणेचीं मंजुरी पत्रां भेटयलीं. संजय गांवकार आनी दामोदर वेळीप हांणी सुत्रसंचालन केलें. अशोक गांवकार हांणी येवकार दिलो जाल्यार श्रीकांत तवडकार हांणी उपकार मानले. मजगतीं, सकाळीं झिल्तावाडीच्या मंगेश गांवकार हाच्या पुतळ्याक फुलांचो हार घालून आर्गां ओंपलीं. ह्या वेळार सभापती तवडकार, दामोदर वेळीप, श्रीकांत तवडकार, दत्ता वेळीप, रजनीश गांवकार आनी आदर्श युवक संघाचे हेर वांगडी हाजीर आसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
