आदित्य यान लॅग्रेंज पॉयंटाचेर पावलें

भांगरभूंय | प्रतिनिधी

श्रीहरीकोट्टा, खबरां संस्था ः चंद्राच्या दक्षिण ध्रुवाचेर चंद्रयान देंवोन अंतरिक्ष इतिहास तयार करपी भारतीय अंतरिक्ष संशोधन संघटनेन आयज ‘आदित्य एल 1’ ह्या अंतरिक्ष यानाक ‘लॅग्रेंज पॉयंट 1’ चेर धाडलें. धर्तरे सावन देड लाख किलोमीटर अंतराचो प्रवास पुराय करून ‘आदित्य एल 1’ हें यान गुरुत्वाकर्शणाचें बळ शून्य आशिल्ल्या ‘लॅग्रेंज पॉयंट 1’ ह्या बिंदूचेर पावलें.
सूर्य आनी धर्तरेचें अंतर 15 कोटी किलोमीटर आसून दोगांय मदीं व्हडलें गुरुत्वाकर्शण शक्त कार्य करता. देखूनच मनशान तयार केल्लें कांयच हांचे मदीं स्थीर उबें रावंक शकना. पूण, तांचेमदीं तीन बिंदू अशे आसात की तांचेमदलें गुरुत्वाकर्शण शक्त शून्य जाता. देखून थंय पावपी वस्तू एकाच सुवातेर स्थिर उरता. तातूंतलो एक बिंदू म्हळ्यार ‘लॅग्रेंज पॉइंट 1’ (L1). हो हॅलो कक्षेंत आसा. इस्रोचें आदित्य-एल 1 अंतरिक्षयान हे कक्षेंत प्रवेश केला. ‘L1 पॉइंट’ हो धर्तरे आनी सूर्य हांचे मदल्या वट्ट अंतराचो एक टक्के म्हळ्यार 15 लाख किलोमीटर अंतराचेर आसा.

आदित्य- एल 1 हें देशांतलें पयलें अंतरिक्षांतल्यान सूर्याचो अभ्यास करपी मिशन जावन आसा. सूर्याचो पृश्ठभाग कितलो गरम?, सूर्याचो कोरोना (पृश्ठा सावन कांय अंतर) कितलो गरम? सौर वादळां नेमकी कशी आसतात? ताचेर आदित्य- एल 1 संशोधन करतले.
2 सप्टेंबर 2023 दिसा आदित्य- एल 1 हें यान श्रीहरिकोटा हांगाच्या सतीश धवन अंतरिक्ष केंद्रांतल्यान पीएसएलव्ही- सी 57 वयल्यान प्रक्षेपित केल्लें. 63 मिनटां आनी 20 सेकंद उड्डाण केल्या उपरांत पीएसएलव्हीन आदित्य- एल 1 हाका धर्तरे भोंवतणी अंडाकार कक्षेंत दवरलें.

हें मिशन फकत सूर्याचो अभ्यास करपाक मजत करतलें अशें न्हय. खरें म्हणल्यार सुमार 400 कोटी रुपयांच्या ह्या प्रकल्पांतल्यान सौर वादळा विशीं म्हायती मेळटली. हाका लागून भारताच्या पन्नास हजार कोटी रुपयांच्या पन्नास उपगिऱ्यांचे राखण जावंक शकता. अशी मजत मागपी खंयच्याय देशाक मजत करतले. हो प्रकल्प देशाक खूब म्हत्वाचो आसा.