भांगरभूंय | प्रतिनिधी
अश्टगंधा क्रेडीट सोसायटींत 11.28 कोटींची फटवणूक
पणजी: पिर्ण बार्देसांतल्या अश्टगंधा अर्बन कॉ-ऑपरेटिव्ह क्रेडीट सोसाटींत 11.28 कोटींची फटवणूक केल्ल्या प्रकरणांत गोंय पुलिसांच्या अर्थीक गुन्यांव फांट्यान (ईओसी) गुन्यांव दाखल केला. ह्या प्रकरणांत मेरशेच्या उत्तर गोंय जिल्हो आनी सत्र न्यायालयान दिगंबर परब, मोहनदास देसाय, प्रकाश एल. नायक, प्रकाश व्ही. नायक, कृष्णा हळर्णकार, प्रकाश ए. नायक आनी प्रकाश एन. कांदोळकार ह्या सोसायटीच्या आदल्या संचालकांचो अटकपूर्व जामीन अर्ज भायरायलो. हे विशींचो आदेश प्रधान जिल्हो न्या. ईर्शाद अगा हांणी दिलो.
ह्या प्रकरणांत पयलीं गुंथवणुकदारांनी प्रशासक आनी ईओसी कडेन कागाळ दाखल केल्ली. उपरांत कांयच जायनाशिल्ल्याचें मुखार आयले उपरांत गुंतवणुकदारांनी मुंबय उच्च न्यायालयाच्या मुंबय खंडपिठांत धांव घेतली. उपरांत न्यायालयाच्या आदेशा प्रमाण, सोसायटीचेर प्रशासक समिती नेमिल्ली. उपरांत प्रशासक समितीचे अध्यक्ष मंगेश फडते हांणी ईओसींत कागाळ दाखल केली. ते प्रमाण 14 जुलय 2023 पयली आदल्या संचालक मंडळान एकामेकांच्या संगनमतान, अप्रामाणीक हेतून विवीध बेकायदो कृत्यां करून अश्टगंधा अर्बन सोसाटीच्या निधीचो गैरवापर केल्ल्याचें म्हणलां. तशेंच आदल्या संचालकांनी काल्पनीक आनी बनावट कागदपत्रां वरवीं रीण दिल्ल्याचें दाखयलें. तशेंच हेर बेकायदो कृत्यां करून सोसायटीचो निधी अनधिकृतपणान काडलो.
तशेंच वैयक्तीक खात्यांत निधीचें बेकायदो हस्तांतरण केल्ल्याचें म्हणलां. ताका लागून आदले संचालक मंडळ सोसायटीचे ठेविदार तशेंच वांगड्यांच्यो ठेवी परतून दिवपाक अपेशी थारलें. ते खातीर आदल्या संचालक मंडळान 11 कोटी 28 लाख 93 हजार 213 रुपयांची फटवणूक केल्ल्याचो दावो कागाळींत नमूद केला.
हाची दखल घेवन ईओसीचे निरिक्षक रमेश शिरोडकार हांच्या फुडारपणा खाला उपनिरिक्षक परेश रामनाथकार हांणी सोसायटीचे आदले संचालक आनी मुखेल कार्यकारी अधिकाऱ्या आड भारतीय न्याय संहितेच्या विवीध कलमां खाला गुन्यांव दाखल केला. तातूंत आदले संचालक रवींद्र नायक (मुळगांव – दिवचल), दिगंबर परब (दिवचल), मोहनदास देसाय (कुडचडें), पिर्ण – बार्देसच्यो श्रद्धा नायक, प्रकाश एल. नायक, प्रकाश व्ही. नायक आनी प्रकाश ए. नायक, सिरसय हांगाचे कृष्णा हळर्णकार, चंद्रशेखर बर्वे (अस्नोडें – बार्देस), प्रकाश कांदोळकर (पार्शें – पेडणें) आनी भारत परब (अस्नोडें – बार्देस) हांचो आस्पाव आसा.
गुन्यांव दाखल केले उपरांत दिगंबर परब, मोहनदास देसाय, प्रकाश एल. नायक, प्रकाश व्ही. नायक, कृष्णा हळर्णकार, प्रकाश ए. नायक आनी प्रकाश एन. कांदोळकार ह्या आदल्या संचालकांनी उत्तर गोंय जिल्हो आनी सत्र न्यायालयांत अटकपूर्व जामीन अर्ज केले. मजगतीं कांय गुंतवणुकदारांनी ह्या अर्जाक आक्षेप घेवन हस्तक्षेप दाखल केलो. ह्या प्रकरणाची न्यायालयान सगल्यांची बाजू आयकून घेतले उपरांत अटकपूर्व जामीन अर्ज भायरायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
