भांगरभूंय | प्रतिनिधी
तियात्र 1960 -70 दशकांत इतल्या नेटान चलतालो की तियात्राच्यो तिकेटी भायर सरना बराबर तिकेटी दोन-तीन दिसां मदीं लेगीत ‘सोल्ड आवट ’ जाताल्यो. आनी तेन्ना वसरे म्हण केदें? एक-एका वस-यांत हजारां वयर प्रेक्षक बसूंक शकताले. थोडे भाव कमी बसकेचेय तियात्राचे वसरे आसले. त्या काळार गोंयकारांचे तियात्र चड करून धोबीतळ्यार, प्रिन्सेस थिएटर भांगवाडी (पीटी भांगवाडी – 1075 बसका), रंग भवन (उगतो वसरो,1075 बसका जातूंत 1300 लेगीत बसका उपलब्द करताले), बिर्ला मातोश्री -1008 बसका, बांदरा वाठारांत रंग मंदीर ( उगतो वसरो, बसचे खातीर पांवडे आसले. 900 प्रेक्षकां खातीर, पूण सोंपेपणी 1100 प्रेक्षकांक भरताले. आनी विले पार्ले वांठारांत, कुपर हॉस्पिटलां लागीं भायदास ऑडिटोरीअम आसलो., जांची तांक 1180 बसका. तेन्ना गोंयांत तियात्र चडशे मैदानांनी माटवांत जाताले. बसींनी गांव- गांवचो लोक येतालो. फावटीक सुमार 2000 लेगीत लोकांक बसपा खातीर बसका ह्या माटवांनी आसताल्यो.
कांय तियात्रांक इतलो खप (डिमांड) आसतालो कीं धोबीतलाव (मिनी गोवा) वांठारांत तियात्राच्यो तिकेटी खपोवपी कोस्मा एन्ड कं. हें शॉप सकाळीं 9.30 वरांचेर उगडटालें जाल्यार 8 वरांचेर लोक येवन वळींत तिकेटीक उबो रावतालो. जालोले परीं रेशनाचीं लायन. शॉप उगतें जाता म्हळ्यार हि लायन मागीर बस्तानी हॉटेला मेरेन पावताली. हें हांव अतिताय करीनासतना सांगतां.
विशेश करून असली खेट देवस्पणीं तियात्र दाखोवपी जे पी सौजालीनाच्या तियात्रां खातीर पडटाली. असो ताणें तियात्र मळार 1969 वर्सा, एक इतिहास रचून दवरिल्लो आसा. ताचो ‘सां फ्रासिंस शाव्हियर’ एकाच कामाच्या दिसाक एकाच पी.टी भागवाडी वस-यांत ताणें तीन’ हाऊस फूल’ प्रयोग केल्ले. – सकाळीं 10 वरांचेर दनपरां 3.30 आनी रातीक 9 वरांर, हे वरवीं सौजालीनान न्हयच फकत कोंकणी तियात्राचो रिकॉर्ड मोडलो , बगर ताणें सगळ्या भासांच्या नाटकांचो आनी ड्रामाचो रिकॉर्ड तेन्ना मोडलो ! आसलो नाद तियात्रांक त्या काळार.त्या तियात्रांत वांटो घेवपी तियास्त्रिस्त कोण आसले फिलोमेना, आंतोनेता, बेटी फेर्न्स, सेलीना, सी. आल्वारीस, सौजा फेरार्व, सिरियाको डायस, सॅबी कुतीन्हो, प्रेम कुमार, टीटा प्रेटो, यंग मेंडिस, आलफ्रेड रोज, मास्टर फेर्नांडिस, एच. ब्रिटोन, रोबीन वाझ, बाब टोनी, बाय टोनिया, रियो रोसा, बाब पीटर, कीड बॉक्सर, सौजालीन आदी. सौजालीन उजार करतालो कित्याक ताच्या देवस्पणी तियात्रांनी कलाकारांचो चोंबो जाय पडटालो. ह्या तियात्रांचे वळेरेंत नदर मारल्यार विनोदी भुमिका करपी एकलोय झळकना. त्या काळार तिटा तर कॉमेडी करीनासलो. किड बॉक्सर आनी सी. आल्वारीस आदीं कॉमेडी करताले.
पूण 1969 मेरेन ? हांवें सी आल्वारीसाक कॉमेडी करतना पळोवंक ना. पूण हे विशीं म्हाका खास ताणें आनी आनीकूय तियास्त्रितांनी सांगलां. सी आल्वारीस कॉमेडी क्लावन फोर्त गायताले खंय. ह्या तियात्रांतल्या सगळ्या कलाकारांक हांव परशीं वळखतां. केन्ना ना केन्ना भेटलां. सोडून बाय टोनिया. रियो रोसा तर म्हजे लागींचो इश्ट. ह्या तियात्रांत कॉमेडी पार्ट कोण करतालो तें सिरियाको घडये सांगूंक शकतलो. जे पी सौजालीनाचो खास सांगाती तो. पूण हालींसराक ताचोय ओपिनियांव बदलत आसता. आसूं.
सांगपाचें म्हणल्यार सौजालीनाच्या तियात्रांनी विशेश कॉमेडी करतल्या विनोदी कलाकाराची कॉमेडी आसनासली. ताच्या तियात्रांनी तशेंच त्या काळवेल्या हेर दिग्दर्शकांच्या तियात्रांनी लेगीत कॉमेडी मुखेल घटक म्हण आस नासली. म्हळ्यारुच तियात्रांनी कॉमेडी तियात्रांचो फाटी-कणो नासलोच. एक वा चडूच जाल्यार दोन विनोदी कलाकार आसताले. हांगांच उपजता काय तो प्रस्न आदल्या जिरें मिरयांचो आनी आतांच्या आसलें – लसुणीचो? ज्या तरेन आयज कॉमेडी म्हण करूंक चार-पांच आनी स लेगीत विनोदी कलाकारांचीं गरज पडटा. हांवें सौजालीनाचे तीन-एक तियात्र पळेल्यात. तातूंतल्यान म्हजो हो आनी कॉमेडी कलाकारां विशींचो अणभव. हाची गवाय टिटा प्रेटो आनी सौजालीचे तियात्र पळयलेले आदले प्रेक्षक दिवंक शकतले. हें सांगपांत म्हजो मुद्दो म्हळ्यार इतलोच, प्रेक्षकांक त्या काळार कितें आवडिचें आसतालें. काय? आदल्या तियात्रांनी कॉमेडी मुखेल घटक वर्तनासलोच ! तेन्नाच्या प्रेक्षकांक कितें आवडटालें जायत? आनी आतांच्या प्रेक्षकांक कितें, कसलें आनी कितलें आवडटा काय?
तशें पळोवंक गेल्यार ह्या तियात्रांत सायड शॉवाचे वस्ताद खांबे झळकतात… ताचेर फुडले फावटीं नियाळ करुंया…
(मुखार चलता…)
अणकार: विशाल खांडेपारकार, 8080622370
फाऊस्तो वि दा कॉस्ता
9821228684
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
