भांगरभूंय | प्रतिनिधी
चंद्रकांत कवळेकार हांकां कला अकादमी; संकल्प, मायकल, केदार हांकां महामंडळ
पणजी : विधानसभा वेंचणूक आनी आमदारां मदल्या असंतोशाचे फाटभूंयेर मुख्यमंत्री डॉ. प्रमोद सावंत हांणी आदल्या, आतांच्या आमदारां सायत पदाधिकार्यांक महामंडळांचें वाटप केलें. कॉंग्रेसींतल्यान भाजपांत प्रवेश केल्ले मायकल लोबो, संकल्प आमोणकार (सीवरेज) आनी केदार नायक हांकां (जीटीडीसी) हांकां वजनदार महामंडळां मेळिल्ल्यान तांकां मंत्रिपद मेळपाची शक्यताय उणी जाल्या. रवी नायक हांच्या मरणान रिते जाल्लें मंत्रिपद तांचो पूत रितेश नायक वा वजनदार आमदाराक मेळपाची चर्चा आसा. पोटवेंचणुके उपरांतूच रित्या मंत्रिपदाचो निर्णय घेतले अशी दाट शक्यताय आसा.
राज्यांत १३ डिसेंबराक जिल्लो पंचायत वेंचणुको जातल्यो. उपरांत फोंडें मतदारसंघा खातीर पोटवेंचणूक जातली. कांय नगरपालिका वेंचणुको जाले उपरांत २०२७ वर्सा विधानसभा वेंचणूक जातली. कॉंग्रेसींतल्यान भाजपांत आयिल्ल्या आमदारांचो असंतोष पयस करपा वांगडा आदल्या आमदारांचेंय समाधान करपाचो यत्न मुख्यमंत्र्यांनी केला.हातूंत परत रितें मंत्रिपद कोणाक मेळटलें? हे विशींचो सस्पेन्स कायम उरतलें, हाचीय खबरदारी डॉ. सावंत हांणी घेतल्या. मंत्रिपदा खातीर इत्सूक आशिल्ले संकल्प आमोणकार हांणी आदीं बालभवन अध्यक्षपद स्वीकारपाक न्हयकार दिल्लो. तांकां आतां वजनदार अशें सीवरेज महामंडळाचें अध्यक्षपद दिलां. गणेश गांवकार सभापती जाले उपरांत रितें जाल्लें पर्यटन विकास महामंडळ (जीटीडीसी) अध्यक्षपद केदार नायक हांकां मेळ्ळां.
म्हजें घर येवजणे वरवीं डॉ. सावंत हे दरेका मतदारसंघाक भेट दितात. अर्जांचें वांटप करतनाच ते सरळ जनता तशेंच कार्यकर्त्यांकडेन संपर्क करतात. जिल्लो पंचायत वेंचणुके वांगडा येवपी विधानसभा वेंचणुकेचे तयारेचोय हो भाग.
चंद्रकांत कंवळेकार (केपें), दयानंद सोपटे (मांद्रें) आनी दयानंद मांद्रेंकार (शिवोले) हे फाटले विधानसभा वेंचणुकेंत हारिल्ले. चंद्रकांत कवळेकार हांकां वजनदार अशें कला अकादमीचें अध्यक्षपद दिलें. तशेंच सोपटे हांकां बाल भवन, जाल्यार मांद्रेकार हांकां एससी आनी ओबीसी वित्त महामंडळाचें अध्यक्षपद दिवन तांकां खूश केल्यात.
संघटनेंत महत्वाची भुमिका करपी सर्वानंद भगत हांकां खादी ग्रामोद्योगचें उपाध्यक्षपद दिलां. आदीं सावन सरकाराक फाटबळ दिवपी आंतोन वाझ हांकां खादी ग्रामोद्योग महामंडळाचे अध्यक्षपद मेळ्ळें. गोविंद पर्वतकार हांचेंे शिक्षण विकास महामंडळ अध्यक्षपद कायम दवरलें. मंत्रिपदाचो त्याग करचो पडिल्ल्यान उबगल्ले अलेक्स सिक्वेरा हांची कायदो आयोगाच्या अध्यक्षपदार नेमणूक जाली. कायदो आयोगाचें अध्यक्षपद बरींच वर्सां जालीं रितें आशिल्लें. ताचेर आतां आदल्या मंत्र्यांची नेमणूक केली.
मंत्रिपदावेल्यान देंवयल्ल्या गोविंद गावडे आनी निलेश काब्राल हांकां मात कसलेंच पद मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
