भांगरभूंय | प्रतिनिधी
संयुक्त राष्ट्र : गाझा पट्टीत जाल्ल्या इस्रायलच्या हल्ल्यांत सोमारा जोड राष्ट्रांच्या सुरक्षा आनी संरक्षण विभागांत ‘संरक्षण समन्वय अधिकारी’ म्हणून काम करपी कर्नल वैभव अनिल काळे ह्या आदल्या भारतीय लश्करी अधिकार्याक मरण आयलें. फाटल्या वर्सा गाझा झूज सुरू जाल्ल्याक हो पयलो आंतरराष्ट्रीय बळी गेल्ल्याचें वृत्तसंस्थांनी म्हणलां.
संयुक्त राष्ट्रांचे महासचीव अंतोनिओ गुटेरेस हांणी ह्या हल्ल्याची पुराय चवकशी करची अशी मागणी केल्या. दुसरे कडेन, इस्रायलानूय ह्या प्रकरणाची स्वतंत्र चोवकशी करपाचे आदेश दिल्यात.
कर्नल वैभव काळे (४६) हे मुळचे नागपूरचे. भारतीय लश्करांतल्यान २०२२त तांणी निवृत्ती घेतिल्ली. उपरांत तांचें कुटूंब पुण्याक स्थायीक जालें. तांचे फाटल्यान तांची घरकान्न,पूत आनी धुव असो परिवार आसा. तांणी ‘११ जम्मू-काश्मीर रायफल्स’तल्यान विवीध कडेन सेवा दिल्ली. दोनूय म्हयन्यां आदीं ते संयुक्त राष्ट्रांच्या सुरक्षा आनी संरक्षण विभागांतल्यान रुजू जाल्ले.
मजगतीं, कर्नल काळे सोमारा सकाळीं आपल्या सहकार्यां वांगडा जोड राष्ट्रांच्या वाहनान राफा हांगच्या युरोपीय हॉस्पिटला कडेन वतना तांच्या वाहनाचेर हल्लो जालो. तातूंत ताका मरण आयलें, जाल्यार ताचे वांगडी जखमी जाले.
काळे हांकां मरण आयिल्ले खातीर संयुक्त राष्ट्रांचे महासचीव गुटेरेस हांणी दुख्ख उक्तायलां. ह्या हल्ल्याची पुरायेन चवकशी करची अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
