भांगरभूंय | प्रतिनिधी
फोंडें मतदारसंघाचे मगो पक्षाचे आदले मंत्री शिवदास वेरेंकार (86) आयतारा सकाळीं 8.30 वरांचेर ल्हान काळाच्या दुयेंसान अंतरले. तांच्या मरणाची खबर पातळटाच तांचे निमाणे दर्शन घेवचे खातीर लोकांनी गर्दी केली. उद्देजक तशेंच फोंडें मतदारसंघांत काँग्रेस पक्षाचे तिकेटीचेर वेंचणूक लडयिल्ले राजेश वेरेंकार हांचे ते बापूय.
फोंडें मतदारसंघांतल्यान मगो पक्षाच्या तिकेटाचेर विधानसभेंत प्रतिनिधीत्व करपाची संद शिवदास वेरेंकार हांकां मेळिल्ली. कांय तेंप नगरनियोजन मंत्री म्हूण वेरेंकार हांणी काम पळयिल्लें.
वेरेंकार हांच्या मरणाची खबर मेळटाच, कृशीमंत्री रवी नायक, आमदार विजय सरदेसाय, नगराध्यक्ष रितेश नायक, आदले आमदार मोहन आमशेंकार, संदीप खांडेपारकार, काँग्रेसीचे ज्येश्ठ फुडारी एम. के. शेख, फोंडें काँग्रेस गट समितीचे अध्यक्ष विलियम आगियार आनी समाजीक तशेंच राजकी मळा वयल्या मानेस्तांनी वेरेंकार हांचे कुडीचें निमाणें दर्शन घेतलें. फोंडें मतदारसंघाची उदरगत करपांत वेरेंकार हांचें म्हत्वाचें योगदान आसा. फोंडेंचे नगरसेवक म्हूण लेगीत तांणी म्हत्वाचें काम केलां. तांणी केल्ल्या वावराचो उगडास सदांकाळ लोकांच्या मनांत उरतलो, अशें मंत्री रवी नायक हांणी प्रतिक्रिया दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
