भांगरभूंय | प्रतिनिधी
-पिरायेचें कारण दिवन दिलो पक्षाचो राजिनामो
पणजी: फाटले विधानसभा वेंचणुके पयलीं भाजपाचो राजिनामो दिवन आम आदमी पक्षांत (आप) गेल्ल्यो आदली मंत्री तशेंच कुठ्ठाळीची आमदार एलिना साल्ढाणा हांणी बुधवारा आप पक्षाचो राजिनामो दिलो. पिरायेचें कारण दिवन एलिना साल्ढाणा हांणी आपलो राजिनामो दिलो.
भाजपांत आसतनाय केंद्र सरकारच्या रेल्वे मार्ग दोट्टीकरण, विद्युत लायन आनी म्हामार्ग रूंदीकरण ह्या केंद्राच्या तीन व्हड प्रकल्पा विरोधांत एलिना थळाव्यांच्या भुंजाक भूज लावन उब्यो राविल्ल्यो. ह्या प्रकल्पा खातीर जमीन संपादन करपा खातीर आयिल्ल्या अधिकाऱ्यांकूय तांणी आडायिल्ले. तशेंच विधानसभेच्या दरेक अधिवेशनांत ह्या तिनूय प्रकल्पा वयल्यान स्वताच्याच सरकाराक ‘घरचो अाहेर’ दिवन हे तिनूय प्रकल्प बेगोबेग रद्द करपाची मागणी लावन धरिल्ली. पूण सरकारान तांच्या मागण्या कडेन आडनदर केली. त्याच वेळार मंत्री तशेंच दाबोळेचे आमदार मॉवीन गुदिन्हो हांणीय एलिना हांकां कुठ्ठाळींतल्या विशया वयल्यान सातत्यान लक्ष करपाचो यत्न केल्लो. त्या वेळार एलिना हांणी मॉवीन गुदिन्हो हांकां जशाक तशी जाप दिल्ली. ह्या दोगांय मदलो वाद जायते म्हयने सुरूच आशिल्लो.
विधानसभा वेंचणुके वेळार डिसेंबर 2021 त भाजपाचो राजिनामो दिवन दिल्लींत वचून तांणी आपचे राष्ट्रीय निमंत्रक तशेंच दिल्लीचे मुख्यमंत्री अरविंद केजरीवाल हांचे हाजिरेंत आपांत प्रवेश केलो. आपान एलिना हांकां कुठ्ठाळींतल्यान उमेदवारी दिली. पूण हे वेंचणुकेंत तांची हार जाली. उपरांत एलिना राजकारणांत चडश्यो सक्रीय दिसूंक नाशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
