भांगरभूंय | प्रतिनिधी
एकचारपणांत जगपाचें म्हत्व, तशेंच सगळ्यांक वांगडा घेवन फुडे वचपाचे विचार पालकांनी भुरग्यां मदी आतांच किल्लोवंक जाय.
आमच्या देशाचो फुडार आमच्या भुरग्यांच्या हातान आसा. देश प्रगतीच्या पांवड्यार वयर व्हरपाक प्रत्येक नागरिकाचें योगदान खूब मोलादीक आसा. भुरग्यांच्या पुराय उदरगतीक, योग्य मार्गदर्शनाची गरज आसता. भुरग्यांचो पयलो गुरु हो ताचो पालक. भुरगेपणात जसो पालक आपल्या भुरग्याच्या जीविताक आकार दिता तशी ती घडत वतात.
पालक आपल्या भुरग्यांचेर उपाट मोग करतात. भुरग्यांक पोशक वातावरण दिवपाचो प्रयत्न्य करतात, पूण तरी आसताना आयच्या ह्या म्हायती तंत्रगिन्यानाच्या काळार मोबायल, संगणक हेर माध्यमां हांणी पालकांचेर तसोच भुरग्यांच्या वागणुकेंत बदल घडोवन हाडिलो दिश्टी पडटा. माध्यमांच्या अतिवापराक लागून अंकीकृत विभागणी जाल्ली पळोवपाक मेळटा. नात्यां मदलें मोगाचें जाळें घुस्पलां आनी संगणक नियंत्रित चर्चा चलतात. ही घुस्पल्ली जाळीं सोडोवपा खातीर पालकांनी स्वता अंकीकृत माध्यमाचो योग्य वापर करप म्हत्वाचें तशेंच आपल्या भुरग्याचेर माध्यमाच्या वापरा विशीं नियंत्रण हाडप गरजेचें.
आतांच्या ताकतिकेच्या युगांत भुरग्यांक पालकान वेळ दिवपाचो उणो जायत चल्ला. भुरग्यांचे मनातले विचार मनांतूच घुस्मटत चल्ल्या. तो घुस्मटमार पालकान थांबोवपाक जाय. वेगवेगळ्या विशयाचेर घरांत चर्चा घडोवन हाडून आपल्या भुरग्याची समजिकाय जाणा जावन घेवन ताच्या सकारात्मक विचारांक बळगें दिवचें. भुरग्याच्या जीविताक योग्य वाट दाखयतालो जाल्यार पालकांनी भुरग्यांक वेळाचें म्हत्व पटोवन दिवचें. स्वता शिस्तीन काम करून भुरग्याकडसून वेळार अभ्यास करून घेवचें.
आदर्श पालकत्व करताना आपल्या भुरग्या कडेन कसली चूक जाली जाल्यार ते चुकींतल्यान चूक सुदारपाची संद तशेच शिकवण दिवप म्हत्वाचें. पालकांनी भुरग्याचे आवडी निवडीचेर ताका सारकें मार्गदर्शन करून वाट दाखोवन दिवची. तें करताना आपले विचार ताचेर लागू करूंक जायनात. जर भुरग्याचे विचार पालकाक योग्य दिसूना जाल्यार देख दिवन समजावपाचो प्रयत्न करचो. भुरगीं आपलें अनुकरण करतात म्हण पालकांनी लक्षांत दवरून स्वता नमळायेन वागचें. भुरग्यां भितर दया भावना जागोवपाची, मनशां, जनावरां, झाडां तशेंच पुराय सैमाचेर मोग, सैमाचें दायज सांबाळपाचें गिन्यान भुरग्यांक दिवन ताच्या व्यक्तिमत्वाचो विकास घडोवचो.
भुरग्यान बरे सकारात्मक विचार आत्मसात करपा खातीर ताका वाचनाची संवय लावची, जेणे करून भुरग्यांचो शब्दसागर वाडटालो आनी विचारांक नवी उर्बा मेळटली. भुरग्यांची मानसीक भलायकी बरी उरपा खातीर पालकांनी शिक्षका वांगडा एकठांय येवन भुरग्याचे प्रगतीचेर, ताच्या व्यक्तिमत्वाचेर प्रभावीपणान काम करचें “भलायकी म्हळ्यार आमची गिरेस्तकाय” पालकान स्वता निरोगी जिणेची पद्धत आपणावची आनी ताचो कुडीक कसो फायदो जाता, तशेंच आरोग्याची जतनाय कशी घेवची हाचें मोल भुरग्यांक पटोवन दिवचें. आपल्या भुरग्यांक राष्ट्राचो बरो नागरिक घडोवपाक जाय जाल्यार देशाचो नागरिक म्हण आपल्या भुरग्याचें कर्तव्य पटोवन दिवप म्हत्वाचें. मनशाचो धर्म तो मनीसपणाचो हाची ज्योत काळजांत पेटोवपाक जाय. पालकत्व हो एक विकसीत जावपी प्रवास. तो आपल्या अणभवातल्यान शिकता. जशीं भुरगीं व्हड जातात तशें पालकांनी आपल्या मार्गदर्शनांत फावोते बदल हाडप गरजेचे. एकचारपणांत जगपाचें म्हत्व, तशेंच सगळ्यांक वांगडा घेवन फुडे वचपाचे विचार पालकांनी भुरग्यां मदी आतांच किल्लोवंक जाय. जेणे करून फुडाराक देशात आदर्श नागरीक घडटले.
अदिती योगेश मळीक
8767921858
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
