भांगरभूंय | प्रतिनिधी
भांगरभूंय । प्रतिनिधी
पणजीः अनुशा अनंथु हे लग्न जाल्ले बायलेक घोव आनी ताच्या घरच्यांनी आत्महत्या करपाक फोर्सार केलें ह्या आरोपांतल्यान पणजेच्या सत्र न्यायालयान घोव महेशराव आनी ताच्या घरच्यांक पुरावे सामकार येवंक नाशिल्ल्यान निर्दोश सुटका केली. ह्या प्रकरणांत अनुशा हिच्या घरच्यानी दिल्ली जबानी ग्राह्य धरून सत्र न्यायाधिशान व्हो निकाल दिलो. घोवा कडच्यानी हुंड्याची मागणी करू ना तशेंच अनुशाक कसलेच तरेचो त्रास करनाशिल्ले अशें ताणी सांगलें
2019 वर्सा जानेवारी म्हयन्यांत अनुशा हिणे बांबोळी आत्महत्या केल्ली. महेशराव हाचे कडेन लग्न जावंन देड वर्सा भिरत तिणे आत्यहत्या केल्ल्यान आगशी पुलिसांनी 10 फेब्रुवारीक तिसवाडी उपजिल्होधिकाऱ्याच्या कागाळे वयल्यान गुन्यांव दाखल केल्लो. उपजिल्होधिकारी शशांक त्रिपाठी हाचे कडेन अनुशाच्या घरच्यांनी हुंड्या खातीर तिका आतमहत्या करपाक फोर्सार केलें असो आरोप केल्लो. ताका लागून घोव महेशराव, मांव सोम्माहा, मांय रामानम्मा, देर मनोज हांका अटक करून ताचेर न्यायालयांत आरोपपत्र दाखल केल्लें. न्यायालयान तांका सशर्त जामीन मंजूर केल्लो.
सुनावणे मजगतीं अनुशाचो देर मनोज हाका न्यायालयान आरोप मुक्त केल्लें. अनुशाचो बापूय, भाव आनी चुलत भावांनी उलटतपासणे वेळार महेशरावाच्या घरच्या कडल्यान हुंड्याची मागणी केली ना तशेंच ते अनुशाक त्रास करनाशिल्ले अशें सांगलें. ताच्या आदारान पुरावे नाशिल्ल्यान महेशराव आनी घरच्यांची निर्दोश सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
