भांगरभूंय | प्रतिनिधी
सद्या धावी आनी बारावेक बसपी विद्यार्थी नेटान परिक्षेची तयारी करपाक लागल्यात. प्रिलिम्स परिक्षेच्या बोवाळांत ते आसात हे खातीर ते तयारी करत आसताना बारावी २८ फेब्रेराक तर धावेची एप्रील म्हयन्यांत परिक्षा जातली अशें मंडळान जाहीर केलां. कांय वर्सांनी हेच विद्यार्थी व्हड जावन नोकरेच्या सोदांत भोवतले आनी एक महत्वाची गजाल तांकां करची पडटली, ती म्हळ्यार प्रवेश परिक्षेची तयारी आनी कोणाक चुकना ती मुलाखत. बरेच खेपो आमी साद्यो- साद्यो चुको ह्या मुलाखतींत करतात ज्यो तुमी अभ्यास केल्यार टाळूं शकतात. आमचे लागीं अजूनय मुलाखत गंभीरतायेन घेनात. थोडो जर अभ्यास केलो तर बऱ्योच गजाली तुमी आपणावंक शकतात. ज्या सुवातीं खातीर आमी मुलाखत दितले ताची म्हायती घेवपाचें काम पयलीं करपाक जाय. हें कठीण नासता.
जे कंपनींत आमी मुलाखत दिवपाचे आसात तिची म्हायती घेवपाक जाय. तुमी परिक्षेक जशे वेळार वताले तशे मुलाखतीच्या सुवातीचेर लेगीत वेळार पावपाक जाय. जी कंपनी आसा तिची म्हायती संकेतस्थळाचेर मेळटा. तातूंत ताणीं ध्येय, मूल्य आनी हेर म्हायती दिल्ली आसता. कंपनीचें उत्पादन कितें, तांचे स्पर्धक कोण आसा? ही म्हायती तुमी काडूं शकतात. आता एआय सारकें माध्यम तुमकां उपेगी पडूं शकता.
चड करून तुमकां मुलाखतींत तुमचे विशीं विचारतात, पूण आत्मविस्वास जोखपा खातीर तुमी जापो दितात हें महत्वाचें आसता. तुमकां कामाचो अणभव नासता, हें खरें. तरी पूण तुमचो आत्मविस्वास कितलो आसा? हें मुलाखतींतल्यान थारता. जे आमी कपडे घालतले ते सादे आसपाक जाय, पूण ते नितळ आनी फेर्र मारिल्ले आसपाक जाय. कडक फेर्र मारिल्ले नासल्यार चड बरें. समजा तुमी स्वताचो वेवसाय सुरु करतले तर मागीर तुमकां मुलाखती घेवचो पडटल्यो, पूण तुमी मुलाखती घेयात वा दियात, एक गजाल सारकी पारखची पडटा. ती म्हळ्यार आत्मविस्वास. हो असोतसो येना. ते खातीर तुमकां खूब त्रास काडचे पडटात. हो आत्मविस्वास तुमचे मदीं येवपाक जाय तर विशयाचेर पकड जाय, कमांड जाय. हें करपाक अभ्यास जाय. जो तुमी परिक्षेक करतात, ताच्या भायर हो अभ्यास करचो पडटलो हें मतींत धरात. पुस्तकां वाचपाची संवय जाय, पूण हातून विशय वेंचतना तुमी मार्गदर्शन घेवपाक जाय.
शालेय जीण जगतना चड करून चरित्र, आत्मचरित्र असल्या विशयांक प्राधान्य दिवपाक जाय. काय वेळा सेल्फ इम्प्रोवमेंट पुस्तकां चलतात. हातून तेंच तेंच येता म्हूण वाचतल्याक विचारप हें चड बरें. सद्या परिक्षेचे दीस आसात. रेडिओचेर येवपी आयतारची मन कि बात ही मानेस्त मोदीजींची कार्यावळी चुकोवची न्हय. तांचें खास परिक्षेचे मोलादीक मार्गदर्शन गरजेचें आसता, ह्या विषयावेलें पुस्तक लेगीत आयलां. तुमचे शिक्षक हाचेर तुमकां सांगतलेच, पूण परिक्षा जरी तुमकां निकाल कितें लागतलो हें खबर आसलें तरी गंभीरतायेन घेयात. ह्या विशयाचेर ह्या सदरान जरूर बरयतलों.
आत्मविस्वास येवपा खातीर शाळांत जावपी कार्यावळींनी वांटेकार जावपाक जाय. कित्याक लागून ह्यो कार्यावळी आयोजित करतात? काय वेंचिक कार्यावळी शाळां भितर आसतात हें तुमच्या लक्षांत येवपाक जाय. ह्यो कार्यावळी आयोजित करतना नेतृत्व जशें तुमी शिकतात तशे सगळ्या वांगडा वागुंकूय तुमी शिकतात. असर हे संस्थेन हालींच एक अहवाल सादर केला. तातून ते म्हणटात की 14 ते 18 पिरायेची 86.8 % बहुरंगी शिकतात, पूण तातूंतलीं 25% भुरग्यांक खंय दुसरेचें तांचे प्रादेशिक भाशेंतलें पुस्तक वाचूंक येना. हो निश्कर्श काडला तो खरो आसूंक जाय. पूण हांचें कारण कितें जरी आसलें तरी तुमी जर वेवस्थित अभ्यास केलो, अतिरिक्त वाचनाची संवय लायली तर अशी स्थिती जावचींना. तुमचे मदीं जर एखादी कुशळटाय आसत तर तुमचे भितर आत्मविस्वास येता. शेवटाक आत्मविस्वास येवप म्हळ्यार कितें? तर खंयच्याय गजालींचेर प्रभुत्व मेळोवप. हें सोपे जावपाक तुमकां तिचे भितर आवड आसूंक जाय. हीच आवड तुमकां आत्मविस्वास येवपाक मजत करता.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
