भांगरभूंय | प्रतिनिधी
भाजपाक मेळिल्लीं मतां आनी विरोधकांचीं एकूण मतां पळयत जाल्यार भाजपाक सादूर रावचेंच पडटलें.
जाचे कडेन सेमी फायनल म्हणून पळयताले ती जिल्हाे परिशदेची वेंचणूक जाली आनी ताचो निकालूय लोकांक कळ्ळो. आतां ह्या निकालान लोकांनी सरकाराचेर विस्वास दाखयलो काय अविस्वास तें सारकें सांगूक जावचें ना. जो निकाल आयला तो सरकारा वटेन काय सरकारा आड तें दर एकल्यान थारावपाचें. लोकशायेंत, वेंचणुकेंत ज्या उमेदवाराक एक लेगीत मत चड पडटा तो जिखता. विरोधकांक कितलीं मतां पडल्यांत ताचो विचार हांगा जायना. देखून विरोधकांची एकत्रीत मतां चड आसुनूय अल्पमतांचो उमेदवार जैतीवंत थारता. दर वेंचणुकेंत हें अशेंच चलता आनी म्हणून तर मतां फोडूंक कांय खास लोक उबे रावतात. हे सेमी फायनलिंतूय अशेंच घडलां. विरोधकांचीं एकूण मतां चड आसतनाय राज्यांत भगवो जिखला. विरोधकांनी जर युती केल्ली जाल्यार घडये वेगळोच निकाल दिसपाचो. पूण ही जर तर ची भाशा उलोवन अर्थ ना. एकदां निकाल लागलो तो सगल्यांनी मानून घेवचोच पडटलो. जनतेचें मत तें, ताचो अनादर करूंक मेळचो ना.
सद्याक एक बरें जालां, मतदान बेलॉट पेपराचेर जालां. बाबड्या ईव्हियमाक सुसेग मेळ्ळा. नासल्यार हें जैत ईव्हियमाचें म्हणून विरोधक येन्ना म्हणल्यार बोवाळ करूंक लागपाचे. ह्या निकाला उपरांत आतां सगल्यांनी आत्मपरिक्षण करपाची गरज आसा. सगल्यांत पयलीं जे हरल्यात तांणी आपूण कित्याक हारलों, खंय उणो पडलों? लोकांचीं मनां कित्याक जिखूंक पावलों ना हाचो विचार करपाची गरज आसा. मनां जिखलीं तरूच मतां मेळपाचीं न्ही? मनांच जर जिखूंक पावलो ना जाल्यार मतां कशीं जोडटलो? विरोधी पक्षांनीय आपणें युती केली ना तें सारकें केलें काय आपणालें चुकलें हाचेर विचार करपाची गरज आसा. कोणाच्या सुवार्थाक लागून वा चुकीक लागून ही युती जावंक पावली ना आनी फुडाराक ह्यो चुकी टाळूंक जातल्यो काय कितें हाचेरूय विचार करपाची गरज आसा.
खरें आत्मपरिक्षण करूंक जाय तें आपान. आपाक वेगळी चूल मांडून वेगळो संवसार थाटपाची बुद्द खंयच्यान आयली? कोणाक हातूंत आपणालो फायदो जातलोशें दिसलें? आपणें सरकाराची बी टीम जावची अशें कित्याक दिसलें तांकां? दिल्लीक मेळिल्ले हारींतल्यानूय आप कांयच शिकलो ना काय? दूद हून लागतकूच लोक ताकूय फुंकून पियेतात म्हणटात. पूण आप दर एके कडेन हून दुदाक घोंट मारून तोंड भाजून घेता काय दिसता. आतां फुडाराक तरी ते सुदारतले अशी आशा बाळगूंक मेळटली काय?
भाजपा जरी जैतीवंत जाली आनी भरपूर सीट जिखली तरी भाजपाक भियेवपाची गरज आसा काय दिसता. भाजपाक मेळिल्लीं मतां आनी विरोधकांचीं एकूण मतां पळयत जाल्यार भाजपाक सादूर रावचेंच पडटलें. सेमी फायनल जिखली म्हणून सुसेगाद रावंक मेळचें ना. आपलीं मतां कित्याक उणीं जालीं हाचें आत्मपरिक्षण तांकां करचेंच पडटलें. भाजपान कांय सीट व्हगडायले अशें म्हणचें पडटलें. दवर्ली, नावेली, गिरदोळी कित्याक पडले? कोणाचें खंय चुकलें हाचेर विचार जावचेली गरज आसा. उमेदवार दवरतना चूक जाली काय कितें हेंय पळोवचें पडटलें. दवर्ली हातांतल्यान वतली म्हणपाचें उमेदवार जाहीर जाला तेन्नाच कळिल्लें. भाजपान जर आपणाल्या एकाद्या निश्ठावंत कार्यकर्त्याक तिकेट दिल्ली जाल्यार दवर्लेचो निकाल वेगळो लागपाचो. जेन्ना कोणूय सगळें तेर्र भोवन फक्त तिकेट मेळची म्हणून सत्ताधाऱ्यां कडेन येता आनी तिकेट मेळयता तेन्ना पक्षाचे मूळ कार्यकर्ते कशे खोशी उरतले? पक्षाक बरें दिसूंक ते वयले वयर वावुरतले पूण तो जिखचोच अशें तांकां मनांतल्यान दिसतलें व्हय? निकाल जाहीर जातकूच पडिल्ल्या उमेदवारान दिल्ली प्रतिक्रिया आनीक वेगळें कितें सांगता तर?
खरें म्हणल्यार ताका हें पयलींच कळूंक जाय आसलें. आपणें ज्या मापान दिलां त्याच मापान आपणाक मेळटलें म्हणपाचें कळूंक जाय न्ही? आपणें पयलीं जें केलां तेंच हांगा घडूं येता हाची जाणीव आसपाची. म्हाका तर एक गजाल कशीच कळना ती म्हणल्यात जो मनीस विधानसभेक उबो रावता ताणें उपरांत जिल्हाे परिशदेक उबो रावप कितलें शाणपणाचें? तांचे खातीर हें प्रमोशन काय मागून घेतिल्लें डिमोशन? आतां अश्या लोकांनी ग्रामपंचायत वेंचणुकेंत रावन आपूण पंच तरी जावंक शकता काय कितें तें पळोवंक हरकत नासची.
नावेली मतदारसंघांत पयले फावटी भाजपा उमेदवार वेंचून आयला. कसोय येवं, विरोधी मतां फुटून ताका संद मेळ्ळी हें जरी खरें आसलें तरी पयले फावटी नावेलींत कमळ फुल्लां. साश्टींत खंयच भाजपा उमेदवार जिखूंक नासले, फक्त नावेलींत हो विक्रम घडिल्लो. भाजपाचो एक सादो कार्यकर्तो आमदार जाल्लो. खरें म्हणल्यार भाजपान ह्या निश्ठावंत कार्यकर्त्याचो योग्य भोवमान करूंक जाय आसलो. ताका योग्य पद दिवंक जाय आसलें. आमदाराचो सभाव पळयल्यार तो काय आपूण जावन कितेंय मागतलो वा आपणाक अमकेंच दी म्हणून हट्ट करीत सो दिसना. पक्ष जें कितें दिता ताचेर समाधानी जातलो. भाजपान जर योग्य तो मान ताका दिल्लो जाल्यार जनते मदीं एक वेगळो संदेश वचपाचो. पक्ष एका सामान्य कार्यकर्त्याक योग्य मान दिता म्हणपाचें लोकांक कळपाचें. आनी हाचो फायदो पक्षाक जावपाचो. चड लोक पक्षा कडेन आकर्शीत जावपाचे. आयज नावेलींत जाल्लें पानीपत जावपाचें नासलें.
अजून वेळ वचूंक ना. नावेली जर राखून दवरतले जाल्यार उण्या काळा खतीर जायना हांगच्या आमदाराक मंत्रीपदार बसोवचोच पडटलो. फक्त आमदार जालो वा म्हामंडळ मेळ्ळें म्हणून लोकांची कामां जायनात. ते खातीर मंत्रीपद जाय आसता. एका कार्यकर्त्याक मान मेळटा तें पळोवन आशिकुशीच्या मतदारसंघांनीय ताचो फायदो पक्षाक जातलो. आनी मतदारसंघ भाजपा कडेन उरतलो. नासल्यार कितें जातलें तें सेमी फायनलींत कळ्ळांच, फायनलींत वेगळें कितें जातलें?
अभयकुमार वेलींगकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
