आत्मनिर्भर भारताचें प्रतीक वंदे भारत एक्सप्रॅस

भांगरभूंय | प्रतिनिधी

वंदे भारत एक्सप्रॅस ही भारतांतली एक नवी ब्रॅण्ड आनी ट्रॅण्ड म्हणपाक हरकत ना. 2019 वर्सा नवी दिल्ली ते वाराणसी मार्गार हे रेलगाडयेची सुरवात जाल्ली. सुरवेक ट्रेन-18 ह्या नांवान वळखताले ते ट्रेनीचें कांय तेंपान वंदे भारत म्हणून नामकरण जालें. भारत सरकाराच्या मेक इन इंडिया उपक्रमा खाला तयार केल्ली ही ट्रेन सशक्त भारताची गवाय दिता. भारतीयांक इतली बरी ट्रेन मेळटली अशें कोणेंच चिंतूंक ना. सुरवेक कांय लोकांनी फकांडां केलीं आनी ही ट्रेन फकत नांवापुरतीच म्हूण थोमणोय मारलो. पूण रेल्वे मंत्रालयान आयजवेर 25 वंदे भारत ट्रेनी चालीक लायल्यात, रेल्वेमार्ग विद्युतीकरण पूर्ण जाल्ल्या सगळ्या राज्यांक वंदे भारत एक्सप्रॅस मेळची ही भारत सरकाराची मोख आसा, तेच फाटभुंयेर गोंयाकूय वंदे भारताचो भोवमान मेळ्ळो.
27 तारखेर पुराय देशभरांत 5 वंदे भारत एक्सप्रॅसींचें एकाच वेळार उक्तावण जालें. प्रधानमंत्री नरेंद्र मोदी हांणी भोपाळच्या राणी कमलापती स्टेशना वयल्यान व्हिडियो कॉन्फरन्सिंगाच्या माध्यमांतल्यान ह्या ट्रेनींक पाचवो बावटो दाखयलो, मडगांव सावन मुंबय सी.एस.एम.टी. मेरेन वचपी वंदे भारताच्या उक्तावण सुवाळ्यांत वांटो घेवपाक आनी तेच ट्रेनींतल्यान मुंबय मेरेन प्रवास करपाचें भाग्य म्हाका मेळ्ळें. राज्यपाल, मुख्यमंत्री, आमदार, मंत्री आनी रेल्वे अधिकाऱ्यांनी सकाळीं सुमार 11 वरांचेर गाडयेक पाचवो बावटो दाखोवन सोडली. ट्रेनींत पांय दवरताच भितर आशिल्ल्या विद्यार्थ्यांच्या आनी पत्रकारांच्या तोंडार एक वेगळीच उमळशीक आनी खोस दिसताली, आनी ही खोस कित्याक आसची न्ही? आयज मेरेन आमी रेल्वेचें नांव घेतकच मातशें बेजारतात. हळशीक आसतली दिसता, वेळार पावतली काय, पिंजिल्लीं सिटां आसतलींच अशे कितलेशेच प्रस्न मनांत घोळटात आनी प्रवास करतल्या प्रत्येकाक वंदे भारत हीच जाप.
डब्या भितर सुसज्ज वेवस्थापन, विमानांत आसता तशें बायो वॅक्यूम शौचालय, स्वयंचलीत दारां, डब्यां भितर सी.सी.टी.व्ही. कॅमेरा हीं खाशेलपणां पळोवन सगळ्यांच्या तोंडार “वाव” होच शब्द घोळटालो. प्रवासा वेळार कोणेंच आपलो मोबायल बोल्सांत घालो ना, ट्रेनी भितरली व्हिडियोग्राफी, सोयऱ्यांक-इश्टांक व्हिडियो कॉल करप, सॅल्फी काडप चालूच आशिल्लें. मडगांव सावन ट्रेन सुट्टाच रेल्वेमार्गा कुशीक दोनूय वाटेन लोक मोबायल घेवन ट्रेनीचो व्हिडियो, फोटो काडपाक गुंतल्लें, हातूंतल्यान हे ट्रेनीची संकल्पना लोकांच्या मनांत रुजलां हें जाणवताले. गोंयचो राज्यपाल श्रीधरन पिल्लैबाबान लेगीत मडगांव सावन करमळे मेरेन प्रवास केलो.
हांवें हाचे पयलीं वंदे भारतान एकदां प्रवास केला, पूण लोकां मदीं इतली उत्सूकताय दिसूंक ना. ट्रेन करमळे पावताच पारंपारीक वाद्य आनी फुलांनी ट्रेनीक येवकार दिलो, ट्रेन पळोवपाक लोकांनी सामकी गर्दी केल्ली पूण भितर आशिल्लें प्रवासी मात देंवपाक फाटीं फुडें जाताले, कारण एकदां दार बंद जातकच भितर सरपाचो पर्याय ना ही भिरांत तांकां आसली. प्रवास करप्यांक उदक, खाण-जेवण, कोल्ड ड्रिंक्स, च्या-कॉफीचीय वेवस्था केल्ली. ट्रेन सुमार 100 किलो मिटर वेगान धांवताली पूण भितर कांयच आवाज येना आनी हेर ट्रेनी भशेन चड हालना. यू-ट्यूबाचेर पळयिल्ल्या गजालींचें फॅक्ट चॅक (सत्य पारखुपाकय) करपाक हांवें एका कपांत उदक भरून ट्रे टेबलाचेर दवरलें, ट्रेनीच्या वेगाचो कपाच्या उदकाचेर कांयच परिणाम जालो ना. प्रत्येक डब्यांत दोन एल.सी.डी. डिस्प्ले आनी दोन स्क्रोलींग डिस्प्ले आसात, तातूंत सुरक्षा संबंदीं माहिती, फुडलें स्टेशन, वेग, वेळ आनी हेर चत्राय दिसतात. तातूंत कोंकणीक पयलो मान फावो जालां तें पळोवन हड्डें अभिमानान फुलून आयलें. कोंकणी पयलेंच खेपें ट्रेनी भितर पावल्या आनी ती पयले खेपे पळोवपाचो आनी आयकुपाचो योग म्हाका मेळ्ळो.
सैम संपन्न कोंकण वाठार दोळे भरून पळयता आसतना ट्रेन केन्ना महाराष्ट्राचे शिमेंत भितर सरली तें कळुकूंच ना. एका फाटल्यान एक बोगद्यांतल्यान वाट काडीत, चिऱ्यांचीं घरां, शेत, कुळागरां पळयत आनी स्टेशनार येवकाराक राविल्ल्या लोकांची गर्दी पळयता म्हणसर सूर्य अस्तंतेक गेलो. साबार राजकारणी, आमदार, मंत्री, खासदारानूय ट्रेनींतल्यान प्रवास केलो, आनी सगळ्यांनीच सोशल मिडियाच्या माध्यमांतल्यान ट्रेनीचो प्रसार आनी प्रचार केलो.
ट्रेन सांजेच्या साडे सात वरांचेर पनवेल स्टेशनार पावली, थंय मात ट्रेनीक अपेक्षे परस चड बरो येवकार मेळ्ळो, ट्रेन प्लॅटफॉर्मार पावताच थंय आशिल्ले टॅक्सी-ऑटो चालक ढोल ताशांच्या तालार नाचूंक लागले, एकदम बम्बईया स्वागत मिला रे बाबा म्हणल्यार जाता. ठाणे, दादर स्टेशन हुपीत ट्रेन अखेरेक मुंबयच्या छत्रपती शिवाजी महाराज टर्मिनसार पावली, घडये एकदम अजापाची गजाल आमची थंय वाट पळयतली आसुंये. महाराष्ट्राचे मुखेलमंत्री एकनाथ शिंदे रेल्वे स्टेशनार हाजीर आशिल्ले, ट्रेनींतल्यान आयिल्ल्या प्रत्येक प्रवाशाक ताणें गुलाब आनी गोडशें दिवन येवकार दिलो. व्हडल्या राज्यांतले मुख्यमंत्री सहज अशें करिनात पूण तांचे हे कृतीन साबार लोकांचीं मनां जिखलीं.
आधुनीकतायेचें दर्शन घडोवपी सेमी हाय-स्पीड ट्रेन म्हणल्यार वंदे भारत एक्सप्रॅस, ताचो आकार आनी वैशिश्ट्यां मनभुलोवणीं आसात. 8 डब्यांचे हे ट्रेनींत दिव्यांगा खातीर ब्रेलांत संकेत, व्हीलचॅर दवरपाक सुवात, सुसज्ज सॅन्सरयुक्त शौचालय तशेंच बाळकां वांगडा प्रवास करप्यां खातीर कपडे बदलपाचे सुवातेचीय तरतूद आसा. वंदे भारताचें आनीक एक खाशेलपण म्हणल्यार वाय-फाय. ह्या वाय-फायच्या माध्यमांतल्यान इण्टरनॅट मेळना, पूण साबार भाशेंतलीं पदां, फिल्मां, शो पळोवंक मेळटात, तेच तरेन एक्जॅक्युटीव श्रेणींत 360 डिग्री घुंवपी आसनां आसात, प्रवासी आपल्याक जाय तशें सीट घुंवडावपाक शकतात, खरें सांगपाचें जाल्यार विमाना परस चड सूख-सोयी हे ट्रेनींत मेळटात आनी ह्योच सुविधा लोकांक वंदे भारता वटेन आकर्शीत करतात.
सद्याक पावसाळो आशिल्ल्यान मडगांव सावन मुंबय वचपाक सुमार 10 वरां लागतात (सरासरी वेग 58 किलो मिटर), पूण 1 नोव्हेंबर सावन फकत पावणे आठ वरांत (सरासरी वेग 75 किलो मिटर) हो प्रवास पूर्ण जातलो. थिवी, कणकवली, रत्नागिरी, खेड, पनवेल, ठाणे आनी दादर स्टेशनाचेर ही गाडी थांबता.
हे ट्रेनींतल्यान प्रवास केल्यार बोल्साक कातर पडटली असो दुश्प्रचार पातळटा, हाचे कडेन लक्ष दिवचें न्हय. वंदे भारत ट्रेनीची तिकेट 2017 वर्सा सुरू केल्ल्या तेजस एक्सप्रॅसा इतलीच आसा. ट्रेनीची तिकेट बूक करतना तातूंत जेवणाच्या खर्चाचोय आसपाव केल्लो आसता, जेवण नाका जाल्यार टिकेट आनीक थोडी सवाय पडटा.
गोंयचें आनी मुंबयचें नातें भोव पोरणें, नवे ट्रेनींतल्यान प्रवास करून ह्या पोरण्या नात्याक फुलोवया, भारतीय तंत्रगिन्यानाक वेगळेंच उंचायेर व्हरपी भारतीय रेल्वेक साथ दिवया. हांवें साबार देशांनी ट्रेनींतल्यान प्रवास केलां, पूण वंदे भारता असली ट्रेन मात खंयच मेळ्ळी ना. हे ट्रेनीचो शिल्पकार सुधांशु मणि आनी भारत सरकाराक सलाम!

शरत रायकार
8669105824