भांगरभूंय | प्रतिनिधी
पुराय संवसारांत भारत देशाक म्हत्वपूर्ण अशें स्थान आसा. विविधतायेन सपन्न आशिल्लो देश म्हणल्यार भारत. जातूंत विंगड विंगड धर्मांचो, भाशांचो आनी संस्कृतींचो एकवट दिसून येता. ह्या देशाच्या जण एकल्या नागरिका मदीं आपूण भारतीय आशिल्ल्याचो उपाट गर्व दिसून येता. जरी देशाच्या कांय क्षेत्रांनी गरिबी, बेरोजगारी आनी फावो तो विकास जावंक नाशिल्ल्यान आमकां विदेशांतल्या खूबशा वस्त्रांचो आनी विंगड विंगड वस्तूंची गरज भासता. हाका लागून आमचो देश विकासाच्या मार्गा वयल्यान मात्सो फाटी उरता.
ही परिस्थिती नदरे मुखार दवरून प्रधानमंत्री नरेंद्र मोदी हांणी 12 मे 2020 दिसा एक अभियान चालीक लायलें. जाचें नांव आसा ‘आत्मनिर्भर भारत’. जाचो मुखेल उद्देश देशाक स्वताच्या बळार वा पांयार उबो करपाचो आसा. म्हणल्यार आमकां जें किते जगपा खातीर गरजेचें आसा ताचे खातीर आमी विदेशी देशांचेर निंबून रावनासतना, जें कितें आमकां आमची जीण सारपाक वा फुलां सारकी फुलोवपाक जाय जाल्यार त्यो त्यो सगल्यो गरजेच्यो वस्तू आमी स्वता आमच्या देशांत तयार करपाक जाय. जे तरेन सुकणें आपल्याक रावपा खातीर स्वता घोंटेर तयार करता, तेच तरेन दर एका भारतीय नागरिकान आपली जीण शितळतायेन सारपाक दुसऱ्या विदेशाच्या आदारान रावनासतना स्वता कश्ट करपाक जाय. जेन्ना सगल्या भारती लोकांचे हात एकठांय येवन कश्ट करपाक लागतले तेन्नाच आमी आत्मनिर्भर जातले.
आत्मनिर्भर जावपाक आमकां विभिन्न क्षेत्रांनी विकास करचो पडटलो. उद्देग, शेतकी, शिक्षण, भलायकी, खेळ आदीं. हाका लागून दर एकल्यान पांयार पांय उडोवन बसचे परस स्वता भारताची उदरगत करपा खातीर तेच वांगडा आपल्या गिन्यानाचो सागर घसघशीत व्हांवोपाक पावल मुखार काडपाक जाय.
भारताक आत्मनिर्भर करपाक जण एकल्यान आपली विचारशक्ती आनी कुशळटाय विकसीत करप खूब म्हत्वाचें. वेपार, उद्देग आनी शेतकी मळार नव्या तंत्राचो वापर करपाक जाय. हाका लागून चडांत चड शिक्षण आनी प्रशिक्षण साधन सामुग्रीची निर्मिती करची पडटली. हे नदरेंतल्यान सरकारूय जायते यत्न करता आनी विंगड विंगड येवजण्यो चालीक लायता. ज्या विद्यार्थ्यांचे उद्देगीक प्रशिक्षण आनी नवीन विचारांक प्रोत्साहीत करपाक संद दिता. आत्मनिर्भर भारत अभियान हाचे अंतरगत कितलेशेच आयाम आसात जशे की “मेक इन इंडिया” आनी “वोकल फॉर लोकल”. ह्या आयामांच्या माध्यमांतल्यान आमी आमच्यो गरजो पुराय करपाक थळाव्या उत्पादकांचो वापर करूं येता. ह्या अभियानाची विचारप्रणाली अर्थीक विकासाची उदरगत करपा वांगडाच आमकां राष्ट्रीय शिक्षण आनी उच्च शिक्षण क्षेत्रानूय स्वयं सिध्द
करता.
आत्मनिर्भर भारत हो एक अत्यंत महत्वपूर्ण आनी सकारात्मक आयाम. अर्थीक परिस्थितीची उदरगत वा विकास करपाचे हें एक म्हत्वाचें पावल. ह्या अभियानाच्या माध्यमांतल्यान आमी आमच्यो गरजो स्वता भागोवन विदेशी म्हालाचो वापर उणो करूं शकतात. अशे तरेन आमची अर्थवेवस्था घटमूट जातली आनी आमी स्वताच्या बळार जगपाक शिकतलीं. आत्मनिर्भर भारत अभियानाचे देशाक स्वावलंबन आनी विकासाच्या मार्गार चलोवपाचे म्हत्वाचें योगदान आसा. हाका लागून आमी जण एकल्यान संघर्शाक तोंड दिवन ह्या अभियानाक जैतिवंत करपाक पोट तिडकीन यत्न करपाक जाय. “स्वता आत्मनिर्भर जायात आनी भारत देशाक आत्मनिर्भर करात.”
काजल कृष्णा पार्सेकार
7972703195
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
