आत्मनिर्भर आमी

भांगरभूंय | प्रतिनिधी

कोरोना 2020 वर्सा आयलो आनी सगलो संवसार दुबळो जालो. आंतरराश्ट्रीय आनी राश्ट्रीय पांवड्यार अर्थीक आनी समाजीक वेव्हार थांबलो. ताका लागून आयात- निर्यातीचेरुय परिणाम जालो. ह्या सगळ्यांचो निमाणो परिणाम म्हळ्यार दिसपट्ट्या जिणे खातीर लागपी वस्तूंचें उत्पादन, विक्री आनी आयात उणी जावप.

आत्मनिर्भरताय ह्या उतराची व्याप्ती खूब व्यापक. आत्मनिर्भरताय म्हळ्यार स्वताची कुशळटाय विकसीत करप आनी घटमूट करप. तिचो पुराय वापर करून कच्च्या मालांतल्यान नवो माल तयार करप आनी गरज पडल्यार तो विकप. आत्मनिर्भरताय म्हळ्यार स्वताचेर आदारून रावप तशेंच तुमचे कडेन आशिल्ल्या कुशळटायेचो पुराय वापर करप म्हळ्यार तुमचे कडेन जें आसा ताचो पुराय वापर करप. कला आनी कुशळटाये वरवीं रोजगार निर्माण करून आत्मनिर्भर जावप. खरें म्हणल्यार जिणेंतल्या अडचणींक आनी समस्यांच्या दोंगरांक अडचणी मानचे परस तांकां आव्हानात्मक रितीन संद म्हणून वापरप. दिव्यांग भुरगीं हे आत्मनिर्भरता मोहिमेंत वांटो घेतात?

फोंडेंच्या लोक विश्वास प्रतिष्ठानाचे शाळेंत वेगवेगळे बुद्धीचे भुरगे. सगळ्यां कडेन सगळी कुशळटाय ना, दर एका भुरग्याक एक खाशेली कुशळटाय आसता. एका विद्यार्थ्याक दोरी बांदपाची कुशळटाय आसता, दुसऱ्या विद्यार्थ्याक मणी विणपाची, कांय विद्यार्थ्याक पॅकिंग करपाची, कांय विद्यार्थ्याक हिशोब करपाची कुशळटाय आसता. ह्यो सगळ्यो कुशळटाय एकठांय वापरून भुरग्यांक राखी आनी राखी करपा इतलीं भुरगीं कुशळ जालीं. आमच्या ह्या दिव्यांग भुरग्यांनी सुमार 8000 राखी तयार केल्यो, म्हळ्यार तांणी स्वताच्यो गरजो पुराय केल्यो, त्याच वेळार ह्यो राखी विकून, हीं भुरगीं स्वावलंबी जालीं आनी समाजा खातीर आदर्श.

फकत राखी तयार करून विकप इतलेंच सादलें काय ह्या उपक्रमांतल्यान? ना. अर्थीक वेव्हार, समाजीक आदान- प्रदान, संवाद कुशळटाय, जापसालदारकेची भावना भुरग्यां मदीं निर्माण जाली. समाज आनी कुटुंबाचेर भार जाय नासतना जबाबदार नागरीक म्हणून जगपा योग्य जालीं.

30 ऑगस्ट हो रक्षाबंधन दीस. ते निमतान ही आमच्या दिव्यांग भुरग्यांनी तयार केल्ल्या राखींचे कार्यावळींचो नियाळ. मागीर आसात न्हय आमचीं भुरगींय आत्मनिर्भर.

– सविता मनोहर देसाय,

सचीव, लोकविश्वास प्रतिष्ठान खाशेली शाळा