आत्मनिर्भर

भांगरभूंय | प्रतिनिधी

सद्याक तरी दर दिसा एक घोटाळो जाल्ल्याचें आयकूंक येता. इल्लो बी न्हय तर कोट्यांचो घोटाळो. आनी दर घोटाळ्यांत एक बायल. आतां हाचें स्रय कोणाक दिवपाचें? गल्लीच्या मुखेल्याक काय दिल्लीच्या तेंच कळना.

एक काळ आसलो जेन्ना बायलांक अबला म्हणटाले. तश्यो आसल्योय त्यो, ना म्हणूंक जावचें ना. तांकां बाबड्यांक दादल्यांच्या शेकातळा रावचें पडटालें. उठ म्हणल्यार उठपाचें आनी बस म्हणल्यार बसपाचें असली परिस्थिती. इतली अबला की तिका गांवचें राजकारण करतली म्हणल्यार राखीव जागो जाय पडूंक लागलो. आमच्या सरकाराकूय बायलां सबला जावच्यो अशें दिसूंक लागलें आनी पंचायत मळार राखीव जागे निर्माण जाले. पूण बायल वेंचून येवनूय ती सबला जाल्ली दिसली ना. तांचे घरकारूच तांच्या जाग्यार काम करतना दिसतात. त्यो नांवांच्योच पंच-सरपंच आसतात म्हणल्यार अतिताय जावची ना. पूण पयलीं बायल अशी नासली.
पुराणांनी वचचेली गरज ना. थंय आमकां बायल म्हणटा ती सबलाच मेळटा. म्हणुनूच तर आमी तिका देवी मानतात न्ही! आतां इतिहासांत नदर मारुंया. इतिहासांत नदर मारल्यार कितें पळोवंक मेळटलें. शिवाजी महाराजाक घडोवपी तांची आवय जिजाबाई. अबला आशिल्ली तर शिवाजीक घडोवपाची? जातलें आसलें तिचे कडेन असलें कर्तूपप? तीच कित्याक कितल्योश्योच बायलो इतिहासांत राणयो जावन रणांगणार झुजिल्ल्यो दिसतात. देख दिवचीच जाल्यार झांशीची राणी, चेन्नम्मा हांची दिवं येता. कितल्या तरी राज्यांच्यो मुख्यमंत्री बायलो जाल्यात. प्रधानमंत्री कशी आसूं येता तें आमकां इंदिरा गांधीन दाखोवन दिलां. आनिकूय कांय देशांत बायल प्रधानमंत्री जावन तिणें देशाक कणखर केल्ल्याचीं उदाहरणां मेळटात.
हालींच्यो देखी घेतल्यार सुशमा स्वराज वा सोनिया गांधीचें घेवं येता. आमच्या देशांत तर बायलां राष्ट्रपतीय जाल्यांत. सद्याक एक बायलूच सर्वोच्च पदार आसा. इतलेंय आसून बायल अबलाच उरल्या. देखून तर आमच्या सरकाराक आमच्या बायलांनी फक्त सबला न्हय तर आत्मनिर्भर जावचें अशें दिसलें. फक्त राजकारणांत कित्याक तांणी सगल्या मळांचेर वयर सरचें, नांव काडचें. फाटल्या साठ वर्सांत सत्तेर आशिल्ल्या सरकारान बायलां खातीर कांयच केलें ना. आतां तरी त्यो मुखार सरच्यो हे नदरेन सरकार कामाक लागलें. आनी कळणा कोणाक आमी श्रेय दिवपाचें तें पूण आतां खऱ्यांनीच बायलो आत्मनिर्भर जाल्ल्यो दिसूंक लागल्यात. कांय बायलो तर इतल्यो आत्मनिर्भर जाल्यात की आत्म उतरा जाग्यार हात आयकूंक येवंक लागलां. हात मारपा इतल्यो निर्भर. खऱ्यांनीच हात मारपांत बायलांचो हात धरपी कोण ना काय दिसूंक लागलां. इतलो तेंप दादलेच हातूंत मुखार आसले पूण आतां बायलां एक पावल मुखार काय दिसूंक लागल्यांत. गोंयांत तरी सद्याक जे जे घोटाळे, फटींगपणां जाल्यांत वा जातात तातूंत बायलांचेंच नांव मुखार येता.
मुद्दम पळेयात, केश फॉर जोब बायलांचो हात. बँक घोटाळो बायलेचो हात. एकशें तीस कोटींचो फातोड्डें ते लंडन घोटाळो, दोन बायलांचो हात. पयलीय बायल साथी आनी दुसरी कितें कमी तर? पूण घोटाळे करपाक फक्त गोंयचींच बायलां मुखार म्हणूंक जावचीं नात तर कोण तरी कोल्हापूरची आनी कारवारचींय बायलां ‘हात मारपांत निर्भर’ जाल्लीं दिसून येतात. सद्याक तरी दर दिसा एक घोटाळो जाल्ल्याचें आयकूंक येता. इल्लो बी न्हय तर कोट्यांचो घोटाळो. आनी दर घोटाळ्यांत एक बायल. आतां हाचें स्रय कोणाक दिवपाचें? गल्लीच्या मुखेल्याक काय दिल्लीच्या तेंच कळना.
हे घोटाळे उणे म्हणून काय कितें, बँकांनीय घोटाळे जावंक लागल्यात. इतलो तेंप एटीएम वा ऑनलायन घोटाळे करून जाणट्यांक फटयताले. पूण सद्याक आयकूंक येता ते प्रमाण बँकांच्या अकावंटा वयलेच न्हय तर कायम ठेविचेय पयशे ना जावपाक लागल्यात आनी हें बँकेच्या स्टाफाचेच मजतीन. कोणूय बाबडो काबाड कश्ट करून चार पयशे जोडटा आनी आपल्याक जाणटे पिरायेचेर खर्चूंक मेळचे म्हणून ते बँकेंत दवरता. पूण थंयूय जर चोरी जावंक लागली आनी गरजे वेळार आपणाले पयशे गायब जाल्यात म्हणपाचें नदरेक येवंक लागलें तर लोकांनी करपाचें कितें? तशे हाचे पयलीं गोंयच्या लोकांक क्रेडीट सोसायटी वा फायनान्स कंपनींनी उणे लुटूंक नात. चार पयशे चड ज्यूर मेळपाचे आशेन लोक हांच्या नादाक लागले आनी हातचेंच व्हगडावन बसले. आतां जर राष्ट्रीयकृत बँकांनीय घोटाळे जावंक लागले जाल्यार लोकांनी कोणाचेर म्हणून विस्वास दवरपाचो? पयलीं वरी घरांत पुरून दवरपाचे काय?
आजवेर बँको गरिबांक लुटून गिरेस्तांक पयशे खावयतात म्हणपाचें विरोधक सांगीत आयल्यात. कांय बँको सारको वेव्हार जमूंक नाशिल्ल्यान खांकनवाळूय जाल्यात. हाकाच लागून सरकाराक कांय बँकांचें दुसऱ्या बँकांनी विलिनीकरण करचें पडलां. कश्योतरी ह्यो बँको स्वताक सांबाळूंक लागल्यात. आनी अशे वेळार जर कोणूय एकलो भानगडी करून लोकांचे पयशे ना करता आसत तर फक्त एकाच न्ही सगल्याच बँकां वेलो विश्वास उडून वतलो आनी अशें घडलें तर बँकांक वेव्हार करप कठीण जातलें. सद्याक कायम ठेव करपाचें प्रमाण उणें जालां म्हणपाचें वित्त मंत्र्यानूच सांगलां. हाचोच अर्थ बँकां कडेन उणो दुडू येवंक लागला. आतां फक्त जाणटे लोकूच जाय तेन्ना काडूंक मेळटले म्हणून बँकांनी कायम ठेव दवरतात. पूण तांचेच कडेन जर फटींगपणां जावंक लागलीं जाल्यार कशें जावपाचें?
लोकांचे कमाईचेर हात मारून स्वताची भर करप्यांक कशेच सुके सोडूंक जायना. लोकांचो कश्टांचो दुडू दुसऱ्यांक खावंक मेळूंक जायना. देखून आतांच असल्यांक खर ख्यास्त जावची गरज आसा. असले घोटाळे करूंक दुसरे फावटी कोणाक धाडस जावंक जायना. बँकांचे युनियन हाचेर आवाज काडटलें काय असल्या स्टाफाक बळ दितलें? बँकांच्या ठेविदारांक सांबाळप ही आपली लागणूक मानचे ना काय? लोक बँके कडेन वेव्हार करता म्हणुनूच तुमच्यो नोकऱ्यो तिगतात हें विसरचें न्ही.

अभयकुमार वेलींगकार
9423884687