आता पुराय वेळ संस्कृत शिक्षकांची भरती

भांगरभूंय | प्रतिनिधी

गीतामृतम कार्यावळींत विद्यार्थ्यांनी केलें भगवद् गीतेचें पठण

पणजी, प्रतिनिधी : येत्या शिक्षणिक वर्सा सावन 8 ते 10 विद्यालयांक मेळून एक शिक्षक अशे तरेन पुराय वेळ संस्कृत शिक्षकाची भरती जातली. मुख्यमंत्री डॉ. प्रमोद सावंत हांणी ही घोशणा केल्या.
संस्कृत भारती आयोजित आयज गीतामृतम ही भगवदगीतेचे पठण करपी कार्यावळ जाली. हे कार्यावळीच्या उक्तावणा वेळार डॉ. सावंत उलयताले. ताळगावच्या डॉ. श्यामाप्रसाद मुखर्जी स्टेडियमाचेर गीतामृतम कार्यावळींत शेंकड्यांनी विद्यार्थ्यांनी भगवद् गीतेचें सामुहीक पठण केलें.

संस्कृताच्या पठणाक लागून उच्चारांत खूब सुदारणा जाता. उच्चारात सुदारणा जाली काय आचार आनी विचारांत पसून सुदारणा जाता. बरे विचार तशेच संस्कार जावपा खातीर संस्कृताचें शिक्षण सामकें गरजेचें. आदले राष्ट्रपती डॉ. ए पी जे अब्दुल कलाम हे सुद्दा भगवद् गीतेचे पठण करताले. भगवद् गीता हो धर्मग्रंथच न्हय तर तो राष्ट्रग्रंथ आसा, अशें डॉ. सावंत हांणी सांगलें.

सध्या विद्यालयांनी अर्धवेळ संस्कृत शिक्षक आसा. आता 8 ते 10 विद्यालयांक एक शिक्षक, अशे तरेन शिक्षकांची भरती जातली. योग, आयुर्वेद, संस्कृताच्या शिक्षण आनी प्रसाराक लागून गोंयची वळख आतां देशभर दक्षीण काशी अशी जावपाक लागल्या, अशें डॉ. सावंत हांणी सांगलें. कार्यावळीक संस्कृत भारतीचे पदाधिकारी तशेच शिक्षकांची हाजेरी आसली.