भांगरभूंय | प्रतिनिधी
नवी दिल्ली, खबरां संस्था ः देशांत सायबर फटवणूक करपाच्यो केशी वाडत आसात. हाका लागून केंद्र सरकारान व्हडलें पावल उबारलां. सरकारान ब्लॅक लिस्ट तयार करपाचें काम सुरू केलां. दुसऱ्याच्या नांवान सिम कार्ड घेवपी लोकांक ब्लॅकलिस्टांत घालपाची प्रक्रिया सुरू केल्या. सायबर सुरक्षेक धोकादायक आशिल्ल्याचे समजून तांकां ब्लॅकलिस्ट करपाचो निर्णय घेतला. तशेंच ह्या लोकांक तीन वर्सां मेरेन नवे सिम कार्ड मेळचें ना. सायबर गुन्यांव आडावपा खातीर सरकारान घेतिल्लो हो एक व्हडलो निर्णय.
कारवाय करपाक सरकार तयार
सीएनबीसी-व्हॉयसाच्या अहवाला प्रमाण केंद्र सरकाराच्या दूरसंचार विभागान ब्लॅकलिस्ट तयार करपाची तयारी सुरू केल्या. हे वळेरेंत हेरांच्या नांवान सिम कार्ड घेवपी लोकांचीं नांवां आसपावीत करतले. तशेंच फ्रॉड मेसेज धाडपी लोकांक ब्लॅकलिस्टांत घालतलें. तांचें सद्याचें सिम कार्ड ब्लॉक करतलें. तशेंच तांकां तीन वर्सां नवे सिम कार्ड घेवपाक मेळचें ना.
नांव ब्लॅकलिस्ट करचे पयलीं सरकार संबंदीत व्यक्तीक नोटीस धाडून ताचे कडल्यान जाप मागतलें. जाप दिवपाक सात दिसांचो वेळ दितलें. तशेंच व्यापक लोकहित लक्षांत घेवन कांय जाणांक कसलीच सुचोवणी दिनासतना ब्लॅकलिस्ट वळेरेंत घालतले.
1,32,000 आयएमईआय नंबर ब्लॉक
सायबर गुन्यांव आडावपा खातीर सरकारान कांय दीसा सावन कॉलर ट्यून चालीक लावपाचो आदेश दिल्लो. ही मोहीम तीन म्हयने चलतली. सायबर गुन्यांव आडावपा खातीर सरकारान 15 नोव्हेंबर 2024 मेरेन 6.69 लाख सिम कार्ड आनी 1,32,000 आयएमईआय नंबर ब्लॉक केल्यात अशेंय सरकारान संसदेंत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
