आतां स वरां भितर दाखल करची पडटली एफआयआर
भांगरभूंय | प्रतिनिधी
भलायकी सेवेंतल्या कर्मचाऱ्यांचे सुरक्षे खातीर केंद्राचे निर्देश
नवी दिल्ली, खबरां संस्था ः कोलकातांत बायल दोतोराचेर अत्याचार करुन तिका जिवेशीं मारले उपरांत देशभर दोतोरांनी निशेध सुरू केला. आयज गोंयांत लेगीत तिचेर अत्याचार करुन तिका जिवेशी मारप्याचेर खर कारवाय करची, हे मागणे खातीर गोंयांतल्या दोतोरांनी एकठांय येवन बांबोळेच्या जीएमसी भायर आंदोलन केलें. हाचेर उपाय म्हणून केंद्र सरकारान भलायकी कर्मचाऱ्यांचे सुरक्षे खातीर रणनितीचें पावल उबारलां. ड्युटेचेर आसतना खंयच्याय भलायकी सेवेंतल्या कर्मचाऱ्यांचेर हल्लो जाल्यार स वरां भितर एफआयआर दाखल करप ही संबंदीत संस्थेच्या मुखेलाची जापसालदारकी आसतली अशें जारी केल्ल्या निर्देशांत म्हणलां.
कोलकातांतल्या आर जी कार मेडिकल कॉलेज आनी हॉस्पिटलांतल्या 31 वर्सां पिरायेच्या दोतोराचेर बलात्कार आनी खून जाल्ल्यान देशभरांत तिडकीचे वातावरण निर्माण जालां. ताका लागून केंद्रान हो आदेश जारी केलां. सरकारी हॉस्पिटलांनी दोतोर आनी हेर भलायकी सेवकां आड हिंसाचार चड प्रमाणांत जाला. तशेंच जायत्या दोतोरांक धमकावपाचेय प्रकार घडटात अशें केंद्र सरकारान जारी केल्ल्या निवेदनांत म्हणलां.
मजगतीं, केंद्रीय भलायकी सेवा महासंचालकांनी शुक्रारा देशांतल्या सरकारी हॉस्पिटलांच्या मुखेलांक आदेश दिवन ते बेगोबेग चालीक लावपाचे निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
