भांगरभूंय | प्रतिनिधी
सनदीचो काळ ६० दिसांवेल्यान ४५ दीस करपी अध्यादेशाक मान्यताय
पणजी : गोंय भूंय महसूल कायद्याच्या कलम ३२ आनी उपकलम ३ मदीं दुरूस्ती करून सनद मेळपाचो काळ सरकारान ६० दिसा वेल्यान ४५ दिसांचेर हाडला. हे दुरूस्ती खातीरच्या अध्यादेशाक मंत्रिमंडळान मान्यताय दिल्या, अशी म्हायती मुख्यमंत्री डॉ. प्रमोद सावंत हांणी दिली. वेवसाय सुलभीकरण (इज ऑफ डूईंग बीजनेस) तशेंच हेर कामाक हाचो लाव जातलो.
मुख्यमंत्री डॉ. प्रमोद सावंत हांच्या फुडारपणा खाला आयज मंत्रिमंडळाची बसका जाली. उपरांत पत्रकार परिशदेंत मुख्यमंत्र्यांनी निर्णयांची म्हायती दिली.
भूंय महसूल कायद्याच्या कलम ३२ (३) खाला सनदीच्या अर्जाचेर निर्णय घेवपाक जिल्हाधिकार्याक ६० दिसांची मुजत आसताली. आतां ती ४५ दिसांची जातली. सनदीच्या अर्जाचेर जिल्लोधिकार्याक ४५ दिसांत निर्णय घेवचो पडटलो.
मंत्रीमंडळाचे म्हत्वाचे निर्णय :
अनाथ अर्जंदारांक नोकरेंत प्राधान्य
कॉम्पेशनेट आदाराचेर नोकरी दिवपी येवजणे खाला अनाथ अर्जदारांक प्राधान्य दिवपाचो निर्णय सरकारान घेतला. हे येवजणे खाला अनाथ अर्जंदारांची स्वतंत्र वळेरी तयार जातली. सध्या येवजणे खाला ८०० अर्ज आसा. काम करतना मरण येवपी कर्मचार्यांच्या कुटुंबीयांक तेन्नाच नोकरी दिवपा खातीर ह्यान पयलीं सरकारान येवजणेंत दुरूस्ती केल्ली.
गोंय जनविश्वास उपक्रमा खाला केंद्र सरकारच्या निर्णया प्रमाण गोंय सरकारान २८ किरकोळ गुन्यांवां खातीर कादयेच्या बदलांत अर्थीक दंड घालपी दुरूस्तीक मान्यताय दिल्या. किरकोळ अशा २८ गुन्यांवां खातीर ह्यान फुडें ख्यास्त जावची ना, जाल्यार अर्थीक दंड लागू जातलो.
गोंय वैजकी म्हाविद्यालय, घरनिर्माण मंडळ, गोरवा चिकीत्सा आनी सांबाळ तशेंच मोपा विमानतळ प्राधीकरणांत कंत्राटी पदांचेर पदां भरपाक मंत्रिमंडळान मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
