… आतां संवसाराक धुवांची गरज !

भांगरभूंय | प्रतिनिधी

हुंडो वेवस्थेंत उणावाक लागून चलयांक वजें मानपाची मानसिकताय उणी जावंक लागल्या. वंशाचो एकमेव वारस म्हूण पुत जाय ही मानसिकताय बदलत आसा.

शेंकड्यांनी वर्सां सावन वंश फुडें व्हरपाच्या नांवान पुतूच जाय ही मानसिकताय आतां बदलत आसा. धुवांक संवसारांत येवंक आडखळ हाडपी ते आदले संस्कृतायेन आतां पुतां परस धुवांचीं इत्सा परगटाल्या. धूव ही वजें न्हय तर आशिर्वाद थारल्या. भारत, चीन कोरिया सारक्या विकसनशील देशांनीच पुतांची पसंती उणी जाल्या. अमेरिका, युरोपा सारक्या विकसीत खंडांतलेय पालक धुवांकच प्राधान्य दितात अशें हालींच्या सोदांतल्यान दिसलां. भारताची ‘ऩॅशनल फॅमिली हेल्थ’ सर्वेक्षणाच्या म्हणण्या प्रमाण, पुतांची इत्सा 1999 वर्सां 33% वयल्यान आतां 15% देंवल्या. शारांनी फकत एक भुरगो. खास करून धूव जावपाचो प्रवाह नेटान वाडला. पूण भारत आनी चीन अश्या देशांनी जल्माक येतना लिंगाचें प्रमाण असंतुलीत उरता. चीनांत हें प्रमाण 2000 वर्सा 117 आशिल्लें, तर 2023 वर्सा 111 मेरेन देंवलें. भारतांत अंदूं 107 आशिल्लें. जें 2010 वर्सा 109 आशिल्लें. हांगा जल्माक येतना लिंग प्रमाण ल्हवू सैमीक सरासरीचेर परतून येवपाक लागलां.
संतुळा इबाडटा, कारण…
1980 च्या दशका सावन अल्ट्रा सावंडांतल्यान संवसारांतल्या लोक संख्येचें समतोल खंडीत जाला. ‘इकोनॉमिस्ट-च्या अहवाला प्रमाण, 1980 वर्सा सावन सुमार 5 कोटी जल्माक येवंक आडयल्यात. 2000 वर्सा हें संकश्ट चडांत चड जालें, तेन्ना सैमीक सरासरी परस 17 लाख चड चले जल्माक आयले. आतां ही अंतर उणें जावन सुमार 2 लाख जाल्या. लिंग असंतुलनांत व्हडा प्रमाणांत उणाव जालां. खोशयेची गजाल म्हणल्यार फाटल्या 25 वर्सांत, म्हणल्यार 2001 वर्सा सावन 70 लाख चलयांचो जीव वाटावला. संवसारीक पांवड्यार दर शंबर बायलांक 102 दादले आसतात. जाल्यार जल्मा प्रमाण 105, हाचो अर्थ जल्माक येतना चले मात्शे चड आसतात. पूण निमाणें हें प्रमाण बायलां कडेन झुकता. कारण बायलांची जीण दादल्या परस चड आसता. दर 1000 दादल्या मदीं 943 बायलांचें लिंग प्रमाण आसून तें सैमीक सरासरी कडेन आसा. सोशल मिडियाचेर ‘जेंडर रिव्हिल व्हिडीओ आनी जेंडर डिसअपॉयन्टमेंट’ ह्यो वाडिल्ल्यो केशी समाजीक बदलाक इशारो करतात. ते भायर 44 देशांनी केल्ल्या, गॅलप इंटरनॅशनल अभ्यासांत 65 टक्के लोकांनी भुरग्यांच्या लिंग तांकां म्हत्वाचें ना अशें सांगलां. हें ‘जेंडर न्यूटलिटी’ कडेन वचपी समाजाचें एक बरें लक्षण आसा.
चलयांक चड प्राधान्य
चलयांक प्राधान्य दिवपांत, कोरिया संवसारांत पयल्या क्रमांकाचेर आसा. आदल्या तेंपार ‘पूत गरजेचे’ असो समज आशिल्लो, जंय आतां संवसारभरांतलो समाज ‘धुवो पसंत’ करता. गॅलप इंटरनॅशनल एजन्सीच्या मतान, फाटल्या वर्सा ऑक्टोबर ते ह्या वर्सा फेब्रुवारी मेरेन 44 देशांतल्या 44.783 प्रौढ दादले – बायलांक विचारलें., “तुमकां फकत एक भुरगें जावंक मेळ्ळें जाल्यार तुमकां पूत जाय काय धूव?” अशें विचारलें तेन्ना 28% कोरियनांनी धूव जाय अशें सांगलें. हो आंकडो पूत पसंत करपी लोकां परस 10% चड आसा. सर्वेक्षणांतल्या देशां मदीं जपान, स्पेन, फिलीपीन्स ह्या देशांनी (26%) चलयांक चड पसंतीचीं मानल्यांत. चले – चलयांक सगळ्यांत चड पसंती आशिल्ले देश म्हणल्यार भारत (39 %), उपरांत फिलिपीन्स (35%), चीन ( 24%), लिंग म्हत्वाचें ना अशें मानपी देशांत मेक्सिको (84%), जॉर्जिया (82%), आनी डेन्मार्क आनी स्विडन (81%) हांचो आस्पाव जाता. 1992 वर्साच्या ह्याच सर्वेक्षणांत 58% कोरियन लोकांनी आमकां पूत जाय अशें सांगिल्लें, जाल्यार 10% लोकांनी आपल्याक धूव जाय अशें सांगिल्लें. हें सुमार 31 वर्सांत लिंगीक पसंतीचें पुरायपणान प्रतिनिधित्व करता.
घरगुती सर्वेक्षणांतय अशीच प्रवृत्ती दिसून येता. कोरिया रिसर्चान फाटल्या वर्सा जूनांत जाहीर केल्ल्या 2024. ‘चायल्ड आनी चायल्ड कॅअर परसेप्शन सर्वेक्षणा’ प्रमाण देशभरांतल्या 1,000 प्रौढ दादले आनी बायलां मदल्या 62 % लोकांनी, “उण्यांत उणी एक धूव गरजेची” अशें विधान मान्य केलां. फकत 36 लोकांनी, “उण्यांत उणो एक पूत गरजेचो” अशें मान्य केलें. सांख्यिकी कोरियाच्या मतान, 1990 वर्सा जल्माक येतना लिंग प्रमाण दर 100 चलयांक 116.5 चले आशिल्ले, देखून चले – चल्यांक म्हत्वाची पसंती आशिल्ल्यातें दिसून आयलें. 2023 मेरेन हो आंकडो 105.1 मेरेन देंवून सैमीक लिंग प्रमाण 103 ते 107 ह्या प्रमाणांत प्रवेश करपाचो.
शिक्षण आनी राश्ट्रीय उत्पन्नांचो परिणाम
गॅलप इंटरनॅशनलाच्या मतान, उण्या शिकिल्ल्या प्रतिसाद दिवप्यांनी चड करून पूत ( 17% ) पसंत केल्ले, जाल्यार उच्च शिकिल्ल्या प्रतिसाद दिवप्यांनी “लिंगाक फरक पडना” (65%) अशें सांगलें. ते भायर उण्या उत्पन्नाच्या देशांनी 19 % लोकांनी चले पसंत करतात. जाल्यार फकत 61% लोकांनी लिंगाक म्हत्व ना अशें सांगलें. चड उत्पन्न आशिल्ल्या देशांनी सगळ्यांत उणें पसंती चले (14%) आसले, जाल्यार 66% लोकांनी आपल्या भुरग्यांचे लिंग म्हत्वाचें ना अशें सांगलें. हाचे वयल्यान अशें दिसता. “अर्थींक उदरगतीच्या समतावादी मतां कडेन संबंद आसा.”
धुवांक पसंत करपाचीं कारणां
जाण्टेपणांत काळजी आनी आदार दिवपाचो भार घेतात. हानयांग विद्यापिठाच्या ‘ग्रेज्युएट स्कूल ऑफ क्लिनिकल नर्सिंग’- च्या अभ्यासा प्रमाण डिमेशिया दुयेंतीची जतनाय घेवपी घराब्यांतले 82.4% बायलो आनी तातूंतले 42.4% चलयो, जाल्यार फकत 15.2% पूत आसात.
तज्ञांनी म्हणलें, चलयो आपल्या आवय- बापाय कडेन चड भावनीक रितान जोडिल्लीं आसतात. कोरियन समाजाची धुवांक पसंती फकत लिंग पसंतींत बदल न्हय हें घराबाचीं मुल्ल्यां विशीं आनी काळजी घेवपाच्या भुमिके विशीं समाजीक धारणा मुळावे पुनर्रचनेचें लक्षण. तांणी जोडलें, आदीं, पूत घराब्याचो वंश मुखार व्हरतले आनी आपल्या आवय – बापायक आदार दितले अशी कल्पना खोलायेन रुजिल्ली, पूण प्रत्यक्षांत, धुवो जाणट्यांच्या काळजींचो म्हत्वाचो भार खांदार घेवन वतात, “ देखून धुवो चड विश्वासांत घेवपा सारक्यो आसात.”
वायट प्रथांचो उणाव
हुंडो वेवस्था उणी जाता, देखून चलयांक वजें मानपाची मानसिकताय उणी जायत आसा. वंशाचो एकमेव वारस म्हूण पुतांची मानसिकताय बदलत आसा. अर्थींक स्वातंत्र्या बायलांक आतां अर्थीक निर्णय घेवपाक तुळेन मेकळीक आसता. खेळांत, कार्यावळी, राजकारण, कॉपारेट आनी हेर मळार धुवांनी स्वताक पुतां परस उणीं न्हय अशें सिद्ध केलां. पुतां परस धुवो उणी आक्रमक, चड शिस्तबद्ध आनी जबाबदार आसतात. संयुक्त राश्ट्र, ‘चायल्ड अडोप्शन रिर्पोट’ प्रमाण दर 100 चलयांक दत्तक घेतिल्ल्यान फकत 87 चले दत्तक घेतिल्ले. भारतांतय अशीच ट्रेंड दिसून येता. ‘कारा’ – च्या अहवालांत 2023-24 वर्सा 4,029 भुरग्यांक दत्तक घेतिल्ल्याचें सांगलें. तातूंतले 2,302 चलयो आनी 1,727 चले 33 % चलयो चड दत्तक घेतल्यो.
बेटी बचाओ बेटी पढाओ अभियान प्रभाव
ही भारत सरकाराची मोहीम जी चलयां खातीर कल्याणकारी सेवां विशीं जाग्रुताय करप. ताचीं कार्यक्षमताय वाडोवपाको हेतून आसा. सुरवातीच्या रू. 100 कोटी (14 दशलक्ष अमेरिकी डॉलर ) निधीन ही येवजण सुरू केल्ली. प्रधानमंत्री नरेंद्र मोदीजी हांणी येवजणेची सुरवात 22 जानेवारी 2015 दिसा हरयाणा पानीपतांत केल्ली. ही येवजण आयुश्यभर भुरग्यांच्या लिंग प्रमाणांत उणाव आडावपाक मजत करता . बायलां सशक्तीकरण संबंदीत प्रस्नांचेर उपाय काडटा.
मजगतीं ‘सेल्फी वीथ डॉटर’ हो उपक्रम चालीक लायलो. प्रधानमंत्र्यान लोकांक आपल्या चलयांच्या वांगडा सेल्फी धाडपाचो उलो मारलो. ही कार्यावळ संवसारीक हीट जाली. स्वाक्षरी मोहीम, प्रतिज्ञापत्र आनी सोपूत समारंभा वरवीं येवजणेचो संदेस 700 पदव्युत्तर कॉलेजींतल्या विद्यार्थ्यां मेरेन याआनी जायत्या लश्करी कर्मचारी मेरेन पावता.
निमाणें इतलेंच, जावं बेटा- जावं बेटी. चली भुरग्याचोय जल्म उत्सव दबाज्यान मनोवया. तेच परीं आमच्या धुवांचोय पुतां इतलोच अभिमान बाळगूंया. आमचो होच मंत्र आसूंक जाय.

विशाल सिनाय खांडेपारकार
8080622370