आतां श्रीलंकेंत भारतीय रुपया
भांगरभूंय | प्रतिनिधी
भारतीय रुपयाक आंतरराश्ट्रीय चलनाचो दर्जो
भांगरभूंय । खबरां संस्था
नवी दिल्ली ः श्रीलंकेन भारतीय रुपयाक आंतरराश्ट्रीय चलनाचो दर्जो दिला आनी आपले वेवस्थेंत नियुक्त चलन म्हूण दवरलां, अशें भारताच्या परराश्ट्र मंत्रालयाचे म्हणयारे अरिंदम बागची हांणी सांगलें. हाका लागून आंतरराष्ट्रीय पांवड्यार रुपयाचें वजन वाडटलें. बागची हांणी सांगलें, ‘श्रीलंकेन आपल्या चलनांतल्या वेपार आनी वेव्हारा खातीर आपले वेवस्थेंत भारतीय रुपया हें नियुक्त परकी चलन म्हणून आस्पावलां. जाका लागून दोनूय देशां मदीं रुपयांनी वेपार जावंक शकता. हाचे भायर श्रीलंकेक भेट दिवपी भारतीय पर्यटकांक भारतीय रुपयांनीय वेव्हार करपाक मेळटले.’
भारतीय चलनाचो वापर भारताच्या खाजगी क्षेत्राचेर, तशेंच वेवसायीक क्षेत्रांतल्या लोकांचेर आदारून आसतलो, अशें बागची हांणी सांगलें. दोनूय देशांचे अर्थीक संबंद घटमूट करपाचो आमी यत्न करतात. हे विशीं 21 जुलयाक जावपी श्रीलंकेचे अध्यक्ष रानिल विक्रमसिंघे आनी प्रधानमंत्री नरेंद्र मोदी हांचे बसकेंत चर्चा जातली. व्हड अर्थीक संकश्टांतल्यान भायर सरपाचो यत्न करपी श्रीलंकेच्या अध्यक्षाची ही पयली भारत भेट.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
