भांगरभूंय | प्रतिनिधी
देड शाण्यां, मस्त्या, तवनास भुरग्याक सुदारपाक जाय जाल्यार ताका ख्यास्त दिवपाक जाय, असो पयलीं सावन समज आसा. थोड्यांच्या मतान ख्यास्त दिल्यार भुरगो रोखडोच सुदारता खंय. तर उरिल्ल्यांच्या मतान मोगान ताचेर सहज जैत जोडूं येता. अर्थांत हो वादाचो विशय. ख्यास्त दिली म्हूण सगलेच गुन्यांवकारांक सुदारताच अशें ना. नांव घाण जाल्यार, पश्चाताप जाल्यार, ख्यास्त भोगून आयले उपरांत सुदारिल्ले, बऱ्या मार्गाक लागिल्ले, उरिल्ली जीण सुखा, समाधानान जगिल्ले शेंकड्यांनी लोक आसात. चंबळ देगणांतले डाकू, नक्षल वाठारांतले नक्षलीय सुदारल्यात. शिक्षणाच्या मळार मात विद्यार्थ्यान मस्ती केल्यार ताका शारिरीक खास्त दिवपाक कायद्याय मनाय आसा. हालींच चवथे यत्तेंत शिकपी एका भुरग्याक स्टिलाचे पट्टेन वळ येयसर बडोवपी कामुर्लेच्या दोगी शिक्षकां आड गुन्यांव नोंद जाला. भितरले एकलेक निलंबितूय केल्या. हेर कडेनूय विद्यार्थ्यांक मारपेट करपाच्यो घडणुको घडल्यात. ताका लागून शिक्षण खात्यान शारिरीक ख्यास्ती विशीं राज्यांतल्या शिक्षण संस्थांक नव्यान निर्देश जारी केल्यात.
आदले आनी आतांचे शिक्षक, विद्यार्थी हांचे मदीं मेजपाक येवचो ना इतलो फरक आसा. आतांचे विद्यार्थी आदल्या विद्यार्थ्यां परस स्मार्ट, फुडारिल्ले. पालकांची मानसीकताय बदल्ल्या. चाळीस वर्सां पयलीं हायस्कुलांत शिक्षकान आपल्या भुरग्याक बडयलो तें कळत जाल्यार घरा येतकच बापूय भुरग्याची चूक आसल्यार आपूणय ताचेर दोन फुलयताले. मात, आतां भुरग्यान चूक करून पसून ताका तापयत जाल्यार पालक रोखडेच हायस्कुलांत विचारपाक वतात. शिक्षकान थापट बी मारिल्लें आसल्यार ताची कागाळ करतात. प्रकरणां पुलिशेंत पसून पावल्यांत. कांय शिक्षकांक नेम खबर नाशिल्ले. पूण आतां शिक्षण खात्यान तांकां जागृत केल्यात. हाचे मुखार खंयचोच शिक्षक विद्यार्थ्याक हात लावपाचें धाडस करचो ना. ताका विद्यार्थ्याक तापोवपाची परवानगी आसा काय ना, तें कळना. कारण मानसीक छळ केलो, असो कोण दावो करीत जाल्यार शिक्षकाक भोगचें पडूं येता. बऱ्याच विद्यार्थ्यांक शिक्षकां विशीं आदरयुक्त भंय आसता. तांचे बरें आसा. मात मस्त्या भुरग्यांक कशें वळण लायतले, हाचेर शिक्षण खात्याक उपाय काडचे पडटले. निदान कांय पालकांक तरी तशें दिसता.
शिक्षण खात्यान शिक्षणीक संस्थांक निर्देश दिल्यात. ते पाळप बंधनकारक आसतलें. खंयच्याय शिक्षकान विद्यार्थ्याक शारिरीक ख्यास्त दिली जाल्यार संस्थेक शिक्षकाचेर बेगोबेग कारवाय करची पडटली. विद्यार्थ्यान कागाळ केल्यार ताची दखल घेवन कारवाय करपाक कागाळ निवारण यंत्रणा स्थापन करची पडटली. रोखडीच चवकशी करून शिक्षकाक ख्यास्त दिवची पडटली. विद्यार्थ्यां मदीं सुदारणा घडोवन हाडूंक, तांकां शिस्त लागची म्हूण शिक्षक आनी शिक्षकेतर कर्मचाऱ्यां खातीर प्रशिक्षण वर्ग, कार्यशाळा आयोजीत करतले. विद्यार्थ्यां खातीर समुपदेशनाची सुविधा दितले. म्हणटकच तांकां सुदारपाची संद मेळटली. ह्या सगल्या नेम, निर्देशांक संस्था पाळो दिता काय ना, ताची पळोवणी शिक्षण खातें करतलें. नेम पाळिनात त्या संस्थांचेर कडक कारवाय करतले. हातूंतल्यान शिक्षकूय सुटचो ना. बाल हक्क कायद्या प्रमाण, विद्यार्थ्यांक मारपेट वा ताची मानसीक सतावणूक जाल्यार पांच लाख रुपयां मेरेन दंड आनी तीन वर्सां बंदखणीची खास्त आसा. कायमस्वरुपी इजा जायत जाल्यार शिक्षकाक धा वर्सां बंदखणीची तजवीज आसा. शिक्षण खात्याच्या परिपत्रकांत ताचो उल्लेख आसा.
बोटूय लायनासतना, उतरूय काडिनासतना विद्यार्थ्यांक शिस्त, वळण लावपाची कुशळटाय आतां शिक्षकांक शिकची पडटली. तरीय कोण सुदरनात जाल्यार तांचें समुपदेशन करचें पडटलें. दुसरे वटेन शिक्षण मळा वयल्या कायद्यांचो कोण विद्यार्थी गैरफायदो घेता जाल्यार ताचेर वेगळ्या मार्गान संबंदीत संस्था वा शिक्षक चेपण हाडपाची शक्यताय न्हयकारपाक येना. शिक्षण खात्याक ताचेरूय लक्ष दवरचें पडटलें. शाळा, हायस्कूल म्हणल्यार कॉलेज लायफ न्हय (सिनेमांनी दाखयतात तें) हें विद्यार्थ्यांनी समजून घेवपाक जाय. स्वातंत्र्य आसा म्हणू मनाक येता तशें वागपाक जायना. आपणाक पालक शाळेंत शिकपाक धाडटात, हें तांणी केन्नाच विसरूंक फावना. शिक्षणीक संस्थांनी शिकपी आसात ते मोन्यांनी शिकतात, बऱ्या गुणांनी पास जातात. उरिल्ले पदवे मेरेन पावतासर मदींच गळून पडटात. शाळा ही पवित्र देवळा सारकी. थंय विद्यार्थ्यांनी शिक्षकांचो आदर करपाक जाय आनी शिक्षकांनी विद्यार्थ्यांक आपल्या भुरग्यां प्रमाण वागोवपाक जाय. शिक्षकांनी घरचे तणाव शाळेंत हाडपाक जायना. निमाणें सगलेच मनीस, पूण तरीय शिक्षकान सदांच तारतम्य बाळगून वागपाक जाय. कारण आतां कायदे चालीक लागपाचे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
