भांगरभूंय | प्रतिनिधी
गोंयांत गुन्यांव फाल्त नात. सद्दां कितें ना कितें घडत आसता. घुंवळे वखदां विकपी दिसाक एकलो तरी सांपडटाच. विनयभंग, मारामारी, अपघातूय गोंयकारांक संवकळीचे जाल्यात. दुचाके वयल्यान येवप मंगळसुत्रां झोमून व्हरप, एकोड्या वा भर वस्तींतल्या फ्लॅटांनी चोरयो करप…. आतां चोरांनी नवो मार्ग आपणायला, अशें दिसता. तो म्हणल्यार शाळांनी चोरयो करप. फाटल्या स म्हयन्यांच्या काळांत राज्यांतल्या 13 वयर शाळांक ह्या चोरांचो फटको बसला. सध्या चडश्यो शाळा बंद आसात. उरिल्ल्यांक रोखडीच सुटी पडटली. म्हणटकच सोंपेपणी चोरपाक मेळटलें, अशें चोरांक दिसलां आसतलें. ही गजाल उक्तडार आयली बायणा धरिल्ल्या चोरांक लागून. हे तीग जाण वेगळ्यावेगळ्या चोरयांच्या प्रकरणांत बंदखणींत आशिल्ले. तांणी थंय एकजुटीन हो चोरयेचो नवो मार्ग सोदलो आनी भायर सरतकच तो चालिकूय लायलो.
बायणा शाळेंत सीसीटीव्ही कॅमेरे (चलता तसले) बसयिल्ले. जेन्ना चोर भितर सरले, तेन्ना अलार्म मुख्याध्यापिकेच्या मोबायल फोनाचेर वाजलो. तिणें शाळेच्या वेवस्थापनाक, पुलिसांक रोखडीच म्हायती दिली आनी चोरांक रंगेहाथ धरप शक्य जालें. तिणें मोबायल पळोवंक नाशिल्लो वा मॅसेज पळोवपाक आळस केल्लो जाल्यार चोर मेळचे नाशिल्ले. हालीं शाळांनी चोरयो जाल्यात तातूंत असोळण्यां 3.35 लाख रुपया, खांडेपारा 2.80 लाख रुपया आनी हेर शाळांनी 70 हजारां मेरेन रुपया चोरून व्हेल्यात. हेर सामानूय चोरलां. ह्यो चोरयो करपी हे वयलेच चोर काय दुसरे कोण ते नदरेन आतां पुलिसांनी तपास सुरू केला आसतलोच.
घरांनी दीसभर लोक आसतात. कांय जाणांगेर सुणें पोशिल्ले आसतात. मात, चडश्या शाळांनी सांज जाली काय जितो मूस नासता. सरभोंवतणी घरां आसतलींच अशेंय ना. म्हणटकच प्रत्येक शाळेन तिजोरी, संगणक बी आसतात त्या कुडींनी आनी भायर सीसीटीव्ही कॅमेरे बसोवपाक जाय. सायरनूय बसयल्यार जाता. (तो ओगीच मात वाजपाक जायना.) शाळांनी सशस्त्र वाॅचमन जाय. खाजगी, मिशनरी शाळांनी ते आसतात. मात, सरकारी शाळांनी कोण नासतात. शिक्षण खात्यान हाचेर विचार करचो. दुसरी गजाल, फी वा हेर कसलेय पयशे शाळेंत जमतात, ते त्याच दिसा बँकेंत भरपाक जाय. शाळेंत 2, 3 लाख रुपया दवरप धोक्याचें. शक्य आसल्यार डिजिटल पद्दतीन पयशे घेवचे. आयच्या सगल्या भुरग्यांक हाची संवकळ आसा. ज्या शाळांनी म्हत्वाचीं कागदां, उपकरणां, संगणक बी आसतात त्या कुडींचीं दारां, जनेलां गडगंज आसप गरजेचीं. सोंपेपणी ती उक्तीं जावंक लागलीं जाल्यार चोरांचें आयतेंच फावतलें. पालक – शिक्षक संघाच्यो दर म्हयन्याक बसका जातात. तातूंत हो शाळा सुरक्षेचो विशय मुजरत घेवचो. सुरक्षा वेवस्था ही आयज काळाची गरज जाल्या. फक्त शाळाच न्हय, तर देवळांनीय खबरदारी घेतल्यार बरी. कारण फाटीं एक फंड पेटी फोडिल्ली. तातूंत 50 हजार रुपया आशिल्ले, असो देवळाचे समितीक दुबाव. देवळाचो कोण भांडारी आसा, ताणें हे पयशे घरा व्हरून दुसरे दीस बँकेंत भरूं येतात. चड उत्पन्न आसा, त्या देवळांक वाॅचमन, सीसीटीव्ही सक्तीचो करपाचो वेळ आयला.
शाळांची पळोवणी (रेकी) केले बगर चोर भितर रिगपाचें धाडस करचे नात. ताका लागून शिक्षक वर्ग, विद्यार्थी, सरभोंवतणी रावपी लोक सगल्यांनी सादूर रावंक फावो. दुबावीत रितीन शाळे भोंवतणी हेडपी लोकांचेर पाळत दवरपाक जाय. तांचे विशीं पुलिसांक म्हायती दिवंक जाय. हायस्कुलां, हायर सेकंडरीं भोंवतणी जायते फावटी कांयच कामधंदो नाशिल्ले भशेन कांय तरणाटे दुचाकी घेवन वराचीं वरां उबे राविल्ले दिसतात. तांकां हटकुपाचें काम पुलीस करतलेच, पूण शिक्षक, विद्यार्थ्यांक तांचेर नदर दवरूं येता. हातूंत मोगांत पडिल्ले तरणाटे आसतात, तशेंच घुंवळे वखदांय विकपी आसूं येतात… घडये चोरूय आसतले!! कोण कसलो तें तोंडा वयल्यान वळखुपाक येना. तरीय दरेकल्यान सादूर रावंक जाय. शाळां भोंवतणी उणेंच पांच फूट उंचायेचें दुरीग आसल्यार बरें. म्हणटकच अनवळखी लोकांक भितर येवपाक मेळचें ना. आयल्यार शिक्षकांक तांकां विचारपाचो अधिकार आसतलो. शाळा हिंवूय शिक्षणाचीं देवळां. थंय आतां चोरांचे पांय वळ्ळ्यात. एप्रील, मे म्हयन्यांत शाळा बंद आसतात. म्हणटकच थंयच चोरी करुया, अशें बायणा चोरी करप्यांनी थारायिल्लें खंय. म्हणजे चोर पसून आतां पयलींच अभ्यास करून रातचे शाळांनी वचपाक लागले म्हणपाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
