भांगरभूंय | प्रतिनिधी
ब्युरो ऑफ सिव्हिल एव्हिएशन सिक्युरिटी (BCAS) न एअर इंडिया सयत ७ विमान कंपन्यांक विमानतळार वेळार सामानाची डिलिव्हरी सुनिश्चीत करपाक सुचवण्यो जारी केल्यात. BCAS च्या नव्या नेमां प्रमाण आतां विमान कंपन्यांक तांच्या बॅग लँडिंगाच्या ३० मिनिटां भितर प्रवाशांक बॅगां दिवचीं पडटलीं. हाची अंमलबजावणी करपाक २६ फेब्रुवारी मेरेनची मुजत दिल्या. नेम पाळिना जाल्यार कारवाय करतले.
BCAS न हो आदेश एअर इंडिया, इंडिगो, आकासा, स्पाइसजेट, विस्तारा, एअर इंडिया एक्सप्रेस कनेक्ट आनी एअर इंडिया एक्सप्रेसाखातीर जारी केला.
ऑपरेशन, मॅनेजमेंट आनी डिलिव्हरी ग्रीमेंट (OMDA) प्रमाण, पयली बॅग १० मिनटांच्या भितर कन्व्हेयर बेल्ट मेरेन पावपाक जाय आनी फ्लायट इंजिन बंद जाले उपरांत ३० मिनटां भितर निमाणी बॅग पावपाक जाय.
BCAS ६ विमानतळांचेर देखरेख करताले केंद्रीय नागरी उड्डयन मंत्री ज्योतिरादित्य सिंधिया हांचे सुचवणे उपरांत BCAS ६ जानेवारी सावन विमानतळार सामान घेवपा खातीर लागपी वेळार लक्ष दवरून आशिल्ले. उपरांत, BCASन विमान कंपन्यांक वेळार सामानाची डिलिव्हरी सुनिश्चीत करपा खातीर हे नेम केल्यात.
BCAS म्हळ्यार कितें?
BCAS ची स्थापना १९७८त नागरी विमान वाहतूक महासंचालनालय (DGCA) खाला केली. तेन्ना विमानांत अपहरण आनी हिंसेच्यो बातम्यो आयिल्ल्यो. हाचेर नियंत्रण दवरपाक BCAS ची निर्मिती केली. आंतरराष्ट्रीय नागरी विमान वाहतूक संघटना (ICAO) पद्धती आनी भारताच्या राष्ट्रीय नागरी विमान वाहतूक सुरक्षा मानकां कडेन संबंदीत प्रोटोकॉलचे निरीक्षण करप अशे तांचे आदेश आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
