आतां वर्सुकी आनी लायफटायम पासा वरवीं उणो टोल भरपाक मेळटलो

भांगरभूंय | प्रतिनिधी

नवी दिल्ली, खबरां संस्था: राष्ट्रीय महामार्गावेल्यान प्रवास करतना वाहनांक टोलनाक्याचेर टोल भरचोच पडटा. खरें म्हळ्यार जायते फावटीं टोलनाक्याचेर वाहनांच्यो रांको लागिल्ल्यो पळोवपाक मेळटात, जाल्यार केन्ना केन्ना FASTag वेल्यान पयशे कट जायनात. हाका लागून टोलनाक्यांवेले कर्मचारी आनी वाहनचालकां मदीं वाद जाल्ल्याच्यो जायत्यो घडणुकोय मुखार आयल्यात. मात, आतां हो प्रस्न कायमचो सोडोवपा खातीर केंद्र सरकार व्हड निर्णय घेवपाचे तयारेंत आसा.
खाजगी वाहन धारकांक थाकाय दिवपा खातीर आनी टोलची प्रक्रिया सोंपी करपा खातीर आनी राष्ट्रीय महामार्गावेले टोलचे प्रक्रियेंत गती हाडपा खातीर केंद्र सरकारान एक व्हड येवजण राबयल्या. आतां केंद्र सरकार बेगीनूच राष्ट्रीय महामार्गावेल्यान प्रवास करप्यां खातीर ऍन्यूएल आनी लायफटायम टोल पास सुरू सुविधा सुरु करतले. वर्सुकी आनी लायफटायम पास हाडपा खातीर केंद्रीय रस्ते येरादारी मंत्रालय खरपणान विचार करता अशी म्हायती मुखार आयल्या. ह्या निर्णयाक लागून एकरकमी टोल भरपाक मेळिल्ल्यान जायतीं खाजगी वाहन चालकांक थाकाय मेळटली.
हे विशीं चड म्हायती प्रमाण, रस्ते येरादारी आनी महामार्ग मंत्रालय वर्सुकी टोल पास प्रती वसर्र् ३ हजार आनी १५ वर्सांचो पास ३० हजार रुपया आसतलो. सध्याचे FASTag प्रणालींत पासची येवजण हाडटले. हाका लागून खंयच्याय कागदपत्रांची वा उपकरणांची आतां गरज पडची ना. तशेंच खाजगी गाडी चलोवप्यांक १२ म्हयन्यां खातीर दरेकी ३४० रुपयांचो मासीक रिचार्जेबल पासूय मेळपाक शकता. वर्सुकी पास राष्ट्रीय महामार्ग प्रणालीच्या सगळ्या पायाभूत सुविधांचेर अमर्यादीत प्रवासा सयत आसतलो. हे विशीं केंद्रीय रस्ते येरादारी मंत्री नितीन गडकरी हांणी ही येवजण प्रत्यक्षांत हाडपाक आढावो घेतला.
मजगतीं, महापालिका हद्दींतल्या टोल प्लाझा आनी टोलनाक्यांतल्या ६० किलोमीटर परस उण्या अंतराच्यो समस्या सोडोवपाचोय हाचे फाटलो उद्देश आशिल्ल्याचें सांगतात. २०२३ -२४ ह्या अर्थीक वसाच्या डेटा प्रमाण वट्ट ५५,००० कोटी रुपयांच्या मेळिल्ल्या टोल प्रमाण सुमार ८,००० कोटी रुपया खाजगी वाहनां वरवीं उत्पन्न मेळटा. जरी ५३ टक्के टोल वेव्हारांचो आसपाव जरी आसलो तरी खाजगी वाहनां सगळ्या टोल पावत्यां मदीं फकत २१ टक्के आसात.