आतां वखदां खातीर क्यूआर कोड वा बारकोड सक्तीचे
भांगरभूंय | प्रतिनिधी
भांगरभूंय । खबरां संस्था
नवी दिल्ली ः सध्या बनावट वखदांच्या वापरात व्हड वाड जाल्या. हाका लागून देशांतल्या 300 फार्मा ब्रँडां खातीर सरकारान क्यूआर कोड वा बारकोड दवरप सक्तीचे केल्यात. 1 ऑगस्टा सावन तयार केल्ल्या वखदां खातीर हो नेम लागू जातलो.
ज्या वखदांचेर क्यूआर कोड सक्तीचे आसतले तातूंत कॅल्पोल, डोलो, सॅरिडॉन, कॉम्बीफ्लम आनी अँटीबायोटिक्स अजिथ्रल, ऑगमेंटिन, सेफ्टम, मेफ्टेल ते अँटी-एलर्जी वखद, अॅलेग्रा आनी थायरॉयड वखद, थायरोनॉर्म अशीं वखदां आसतलीं. क्यूआर कोड ट्रॅकिंग आनी ट्रेसिंग सोंपें करतले. हाका लागून बॅच रिकॉल आनी बनावट वखदां वळखुपाकय मजत जातली. हो निर्णय देशांतल्या घटमूट वा बनावट वखदांच्या विक्रीचेर आळाबंदा हाडपाक मजत करतलो अशें वखदां उद्देगांतल्या तज्ञांनी सांगलां. वखदांचेर क्यूआर कोड घालपाची सुचोवणी फाटल्या वर्सा नोव्हेंबरांत जारी केल्ली. शेड्यूल एच 2 खाला येवपी वखदांक प्राथमीक पॅकेजींग लेबलाचेर बार कोड वा सेकंडरी पॅकेज लेबल लावचें पडटलें अशें तातूंत म्हणलां.
मजगतीं, QR कोडाच्या डेटात वा म्हायतींत उत्पादन वळख कोड, वखदाचें योग्य आनी सामान्य नांव, ब्रँडाचे नांव, निर्मात्याचें नांव आनी पत्तो, बॅच क्रमांक, उत्पादनाची तारीख, आनी उत्पादन परवानो क्रमांक आसपावीत करतले. 300 वखदां तयार करपाचे ब्रँड तयार करपी सगल्या देशी आनी विदेशी कंपनींनी आपल्या वखदांचेर क्यूआर कोड घालप सक्तीचें केलां. तशेंच कंपनीक जाय जाल्यार खंयच्याय ब्रँडा खातीर स्वता बार कोड वा क्यूआर कोड लागू करूं येता वा छापूं येता अशें केंद्रान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
