भांगरभूंय | प्रतिनिधी
उत्तराखंड, खबरां संस्था: समान नागरी संहितेचे नवे नेम उत्तराखंडांत बेगीनूच चालीक लागपाचे आसात. हाचे खाला राज्यांत लीव-इन रिलेशनशिपांत रावपाक सोदपी जोडप्यांक आतां लग्ना प्रमाण नोंद करची पडटली. हाचे वांगडाच सगल्या तरेची सरकारी नोंदणी करतना व्हिडियो रेकॉर्डिंग करचें पडटलें. जशें मरणाचें पत्र करप, आधार कार्ड करप, लग्नाची नोंद करप, हातूंत साक्षीदारांचेय व्हिडीओ रेकॉर्ड करप गरजेचें आसतलें. हे नेम उत्तराखंडांतल्या सगळ्या रहिवाशांचेर लागू जातले. हे नवे नेम २६ जानेवारी सावन राज्यांत चालीक लावपाची शक्यताय आसा. हाका लागून राज्य सरकारानय तयारी सुरू केल्या. उत्तराखंडचे मुख्यमंत्री पुष्करसिंह धामी हांणी सरकारान यूसीसी पोर्टला विशीं जाणून घेवपा खातीर आपल्या अधिकार्यांक प्रशिक्षण दिवपाक सुरवात केल्या. देहरादूनांतल्या दोईवाला ब्लॉक ऑफिसांत हे संबंदीं प्रशिक्षण सुरू जालां.
युसीसीच्या नव्या नेमांची अंमलबजावणी करपा संबंदी तीन उपविभागीय दंडाधिकार्यांच्या हाजेरेंत देहरादूनांत म्हत्वाची बसका आनी प्रशिक्षण शिबीर जालें. हें प्रशिक्षण शिबीर २० जानेवारी मेरेन चालू आसतलें. ह्या शिबिरांत अधिकार्यांक यूसीसी पोर्टला विशीं सविस्तर म्हायती दिली. यूसीसी पोर्टल तीन तरांनी चलतलें. नागरिकां भायर कर्मचारी आनी अधिकार्यां खातीर वेगवेगळे पर्याय आसतले. ह्या पोर्टलाचेर लॉग इन करपा खातीर आधार कार्ड सक्तीचें आसतलें. लग्न, घटस्फोट, लीव-इन नोंदणी, लीव-इन संबंद सोंपोवप, उत्तराधिकारी आनी कायदेशीर वारसदार जाहीर करप आनी वसीयतांची नोंदणी ह्या पोर्टलाचेर जातली.
पोर्टला वरवीं कागाळी करपाक मेळटल्यो
कोणाकय लग्न वा लीव-इन संबंदी कसलीय कागाळ आसल्यार ती ह्या पोर्टला वरवींय दाखल करूं येता. ह्या पोर्टलाचेर कोणूच चुकीची म्हायती अपलोड करिना आनी कसलेच तरेची फकांडां जावची न्हय हे खातीर कागाळी तपासपाचें काम उपनिबंधकाक सोंपयलां. मजगतीं, ह्या पोर्टलाचेर प्रशिक्षण दिवपी प्रशिक्षक मुकेश हांणी सांगलें, कागाळ दाखल करपी नागरिकांकय पोर्टलाचेर नोंदणी करची पडटली. तशेंच फटींग कागाळींचेर नदर दवरपाचें काम उपनिबंधकांक सोंपयलां अशें तांणी सांगलें. सध्या राज्यांत लीव इन रिलेशनशिपांत रावपी जोडप्यांक आनी फुडाराक लीव इन रिलेशनशिपांत रावपाची इत्सा आशिल्ल्या जोडप्यांक पोर्टलाचेर आपलें नांव, पिराय, राश्ट्रीयताय, धर्म, आदलो रिलेशनशिप स्टेटस आनी फोन क्रमांक दिवचो पडटलो. लग्न नोंदणी खातीरय तीच म्हायती पोर्टलाचेर घालची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
