भांगरभूंय | प्रतिनिधी
पणजी : आदीं मुंबय ते गोंय प्रवास करतले जाल्यार जायतो वेळ पेड्ड्यार जातालो. सध्या मुंबय ते गोंय हो प्रवास बस, विमान आनी रेल्वे ह्या तीन पद्दतींनी करपाक मेळटा. मात आतां, मुंबय ते मांडवा मजगतींच्या रो- रो (रोल- ऑन, रोल- ऑफ) फेरी सेवे खातीर वळखपी एम२एम ही कंपनी मुंबय ते गोंय मजगतीं फेरी सेवा सुरू करपाचे तयारेंत आसा.
एके म्हायती प्रमाण, ते खातीर एम२एम फेरीजान इटलींतल्यान १५ वर्सां पोरणें आशिल्ली बोट विकती घेतल्या. सध्या मुंबयत हे बोटीचें काम सुरू आसा. ती प्रवासा खातीर योग्य जाली काय ती मुंबय- गोंय प्रवास फकत साडेस वरांनी पुराय करतली अशी अपेक्षा आसा. कंपनीन बोट येरादारी महासंचालक आनी हेर अधिकार्यांकडल्यान गरजेचे मंजुरी खातीर अर्ज केला.
एम२एम फेरीजच्या एका उच्च पदावेल्या अधिकार्यान सांगलें, माझगावची (मुंबय) फेरी व्हार्फ ते मुरगांव बंदर प्राधिकरण (गोंय) मेरेन रोपॅक्स सेवा चलोवपाची येवजण आसा. बरे कनेक्टिव्हिटी खातीर पणजे डॉकिंगा खातीर परवानगी मेळची म्हणूनय ते सरकारा कडेन चर्चा करता अशें तांणी सांगलें. ही येवजण पुराय जाल्यार दोनूय राज्यांच्या पर्यटन मळार विवीध तरेच्यो संदी उपलब्ध जातल्यो, अशेंय तांणी म्हणलें.
नवे RoPAX बोटींत ६२० प्रवासी आनी ६० गाड्या बसपाक शकतात. भाडें कितलें हाचो निर्णय आजून जरी जावंक ना तरी केंद्र सरकार इंधन आनी कर सवलतींचेर अनुदान दितलें, हाका लागून सेवा चड परवडपी जातली, अशी आस्त तांणी उक्तायली.
मजगतीं, एम२एम फेरीजचो अर्ज तपासप सुरू आसा, अशें शिपिंगचे महासंचालक श्याम जगन्नाथन हांणी सांगलें. जाल्यार, कागदपत्रां आतां फुडले मंजुरी खातीर भारतीय शिपिंग रजिस्टरांत धाडिल्ल्याची म्हायती मुखेल जहाज सर्वेक्षणकर्ता प्रदीप सुधाकर हांणी दिली. महाराष्ट्र मरीटायम बोर्ड (एमएमबी) रायगड दर्यादेगेर काशीद, रेवदंडा आनी दिघी हांगा रो-रो सेवां खातीर नवीन जेटी बांदता. ही जेटी सुमार १८ म्हयन्यांत तयार जातली अशी अपेक्षा आसा. हांगच्या उद्देगीक शाराक जोडपा खातीर राज्य सरकार रो-रो सेवेची येवजणूय आखता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
