भांगरभूंय | प्रतिनिधी
नवी दिल्ली, खबरां संस्था: रेल्वे अपघातांची खबरो अदीं मदीं येतूच आसतात. तुमी जर रेल्वेंतल्यान प्रवास करतात जाल्यार रेल्वेंतल्यान मेळपी सुविधां विशीं तुमकां खबर आसपाक जाय. रेल्वे प्रवाशांक रेल्वेच्या तिकेटाचेर धा लाख विमो मेळटा. अपघात विम्याचो फायदो मेळोवपा खातीर रेल्वेची तिकीट बूक करतना कांय गजालींची जतनाय घेवची पडटा. रेल्वे खाणा- जेवणाची आनी तिकेट वेवस्थापन करपी आयआरसीटीसी कडल्यान जायत्यो सुविधा दिता. जातूंत प्रवास विम्याचोय आस्पाव जाता. प्रवास विम्याचो लाव घेवपा खातीर कांय गजाली सांबाळच्यो पडटात. प्रवाशांक अजाप जातलें की ही सुविधा फकत तांची तिकेट कन्फर्म जाल्यारच मेळना पूण ते आरएसी आसले तरी हे सुविधेचो लाव घेवंक शकतात. पूण तिकेट कन्फर्म जावंक ना जाल्यार मागीर हो अपघात विमो तुमकां लागू जायना.
फायदो कसो मेळोवचो
भारतीय रेल्वेंतल्यान दर दिसा अडेज कोटी प्रवासी प्रवास करतात. अपघात चड करून घडटातूच. अशा वेळार प्रवाशांनी जर तिकीट बुकींग करतना प्रवासी विमो हो पर्याय निवडल्यार प्रवाशांच्या वारसदारांक धा लाखांची भरपाय मेळटा. तिकीट जनेलांतल्यान ऑफ लायन तिकीट विकत घेवप्यांक हो लाव मेळना.
योग्य तरेन नॉमिनी डिटेल्स भरात
ट्रेनीच्या अपघातो विमो लागू जावपा खातीर तुमच्या बपल्सांतल्यान फकत ४५ पयशे कापतात. हातूंत तु्मच्या वारसदारांक सात ते धा लाखांची लुकसाण भरपाय दितात. प्रवासांत जरी अपघातांत मरण आयल्यार रेल्वे वतीन कुटुंबियांक १० लाखांची भरपाय दितात. तिकीट बुक करतना नॉमिनी डिटेल्स योग्य तरेन भरच्यो. नॉमिनी डिटेल्स भरतना ईमेल आयडी घालचो. जायते लोक एजंटा वरवीं तिकीट बुक करतात. अशा वेळार एजंटाक आपलें नांव आनी ई-मेल आयडी घालपाक सांगात. ताका लागून अपघाता उपरांत क्लेम करपाक कसलेच तरेच्यो आडखळी येवच्यो ना.
अपघाता उपरांत चार म्हयन्यां भितर नामांकीत वा लागींच्या नात्यांतल्या मनशान दावो करचो. ज्या कंपनीक रेल्वेन कंत्राट दिला. सगळो तपशील त्या कंपनी कडेन भरचो पडटा. दावो केल्या उपरांत कांय दिसां भितर पयशे वारसदारांक मेळटात.
जखमीं खातीर २ लाख आनी मरण आयल्यार १० लाख
आयआरसीटीसीचे वेबसायटीचेर दिल्ले म्हायती प्रमाण प्रवासांत कोणाक मरण आयलें जाल्यार ताच्या कुटुंबाक १० लाखां मेरेन विमो कव्हर मेळटा. तशेंच अपंगत्व आसल्यार जखमींक ७,५०,००० मेरेन रक्कम दितात. गंभीर जखमी जाल्यार २ लाखां मेरेन खर्च जाता. बारीक सारीक जखमी जाल्यार १० हजारां मेरेन भरपाय म्हणून दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
