आतां रेल्वेंतल्यान भोंवपी फुकट्या पुलिसांकभरचो पडटलो दंड: रेल्वेन काडली नोटीस

भांगरभूंय | प्रतिनिधी

प्रयागराज, खबरां संस्था: जर एक सामान्य मनीस तिकेट नासतना वा वेटिंग तिकेट घेवन गाडयेंत बसलो जाल्यार ताचेर दंडात्मक कारवाय जाता. पूण पुलीस दळांत काम करपी बरेच जाण हो नेम पाळिनात. जायत्या सुवातांचेर पुलीस तिकेट नासतना पयल्या दर्ज्याच्या डब्यांनी भोंवतना दिसतात. पूण उत्तर प्रदेशांतल्या प्रयागराज स्टेशनान अशा तिकेट नाशिल्ल्या पुलिसांचेर कारवाय करपाचें थारायलां. फाटल्या स म्हयन्यांत वेगवेगळ्या रेल्वे आनी एक्सप्रेस रेल्वेंतल्यान तिकेट नासतना प्रवास केल्ल्या ४०० पुलिसांक दंड भरपाची नोटीस धाडल्या. रेल्वेच्या वरिश्ठ अधिकार्‍यांनी तिकीट नाशिल्ल्या प्रवाशांचेर मोहीम सुरू केली तेन्ना एसी डब्यांनी आनी पॅन्ट्रींतल्यान जायते पुलीस प्रवास करतना मेळ्ळे. जाका लागून हेर प्रवाशांक खूब त्रास सोंसचे पडले.
उत्तर मध्य रेल्वेच्या जनसंपर्क अधिकार्‍यान ह्या प्रकरणांत म्हायती दितना सांगलें, भारतीय रेल्वे केन्ना केन्नाय तिकेट नासतना प्रवास करपी लोकांक सोदपा खातीर मोहीम चलयता. तिकेट नाशिल्ल्या प्रवाशां लागून हेर प्रवाशांक फकत त्रास जायनात, जाल्यार रेल्वेक अर्थीक लुकसाणूय जाता. देखूनच आमी हें लुकसाण भरपा खातीर कांय खर उपाय चालीक लायल्यात. हाका लागून फुकट्या प्रवाशांक बरोच फटको बसपाचो आसा.
भारतीय रेल्वे तिकीट तपासणी संघटनेचे विभागीय सचीव संतोष कुमार हांणी सांगलें, कांय पुलीस अधिकारी एसी डब्यांनी भितर सरून रित्यो सुवातो घेवन आपल्या अधिकारांचो गैरवापर करतात. त्या राखीव जाग्यार आशिल्लो प्रवासी डब्यांत भितर सरलो काय संबंदीत पुलीस अधिकारी ही सुवात रिती करपाक न्हयकार दितात. केन्ना केन्ना पुलीस प्रवाशांक आनी रेल्वे कर्मचार्‍यांक लेगीत धमक्यो दितात.
प्रयागराज रेल्वे स्टेशना उपरांत हे खर कारवायेक हेर प्रवाशांनी येवकार दिला. तशेंच ताचे विशीं सकारात्मक प्रतिक्रिया दिसता. तिकेट निरिक्षक आनी रेल्वे येरादारी अधिकारी पुलिसां कडल्यान दंड घेवपाचो यत्न केल्यार तांकां धमक्यो दितात अशें रेल्वे अधिकार्‍यान सांगलें. उत्तर प्रदेश पुलीस खात्याच्या वरिश्ठ अधिकार्‍यांनी लेगीत तिकेट नासतना रेल्वेंतल्यान प्रवास करचो न्हय अशें परिपत्रक जारी केलें, पूण ताचो व्हडलोसो परिणाम जाला अशें दिसूंक ना. ह्या परिपत्रकाक पुलीस दळा कडल्यानच सामको उणो प्रतिसाद मेळ्ळो.