भांगरभूंय | प्रतिनिधी
पॅत्रोल, डिजेलाची स्थिती जाली सामान्य
पणजी : राज्यात पेत्रोल, डिजेलाचो साठो फावो ते प्रमाणांत उपलब्ध आशिल्ल्यान पेत्रोल खरेदी खातीर शुक्रारा खंयच रांको नाशिल्ल्यो. पणजेच्या पंपाचेर गर्दी मात दिसताली. सगळ्या पेत्रोल पंपांचेर पयलीं लेगीत भरपूय पेत्रोल आशिल्लें. आतांय आसा, अशी म्हायती गोंय पेत्रोल विक्री संघटणेचे अध्यक्ष नरहर ठाकूर हांणी दिली.
बिरेस्तारा मुरगाव बंदरात एम. व्ही. सान्मार सितार ही इंधनाची बोट दाखल जाली. ह्या बोटीमार्फत 18 हजार मेट्रिक टन डिजेल आनी 8 हजार मेट्रिक टन पेत्रोल गोंयांत आयला. गोंयच्या गरजेचो विचार केलो जाल्यार 15 दिस पुराय थारतलो, इतलो साठो उपलब्ध जाला.
पेत्रोल, डिजेलाचो उणाव जातलो ह्या भंयान फाटले तीन दीस लोकांनी पेत्रोला खातीर गर्दी केली. पेत्रोलाचो साठो आसा. लोकांनी गर्दी करची न्हय, अशे आवाहन मुख्यमंत्री डॉ. प्रमोद सावंत हांणी केल्या उपरांत लेगीत गर्दी मात पसून उणी जाली ना. हाका लागून बऱ्याच पंपावेले पेत्रोल सोपले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
