आतां येता संवसारांतली सगल्यांत व्हडली क्रूझ बोट

भांगरभूंय | प्रतिनिधी

भांगरभूंय । खबरां संस्था
लोकांनी व्हडले बोटीचो विचार केलो तर ‘टायटॅनिक’ हें नांव सगळ्यांत पयलीं मनांत येता. पूण जानेवारी 2024 वर्सा एक व्हडली क्रूझ बोट जलतरण करतली. जी संवसारांतली सगळ्यांत व्हडली बोट आसतली. तिका ‘आयकॉन ऑफ द सीज’ अशें नांव दिलां. टायटॅनिक ही बुडूंक शकना अशी बोट असो दावो केल्लो. पूण ती पयलेच सफरीचेर बुडली. ‘आयकॉन ऑफ द सीज’ विशीं असो दावो केल्लो ना. पूण निर्मातो रॉयल कॅरिबियन इंटरनॅशनलान ताची म्हायती जाहीर केली.
ह्या जहाजांत 5610 प्रवासी आनी 2350 क्रू वांगडी बसूंक शकतात. हे टायटॅनिक परस 5 पटींनी व्हड आनी जड. ‘आयकॉन ऑफ द सीज’ हातूंत वट्ट 19 माळयो आसात. ते भायर प्रवाशांचे खातीर 40 बार आनी रेस्टॉरंट आसात. तशेंच हांतूत खेळाची वेगवेगळी वेवस्था केल्या. बोटीची एकूण लांबाय 1198 फूट आनी तिचें वजन 2,50,800 आसा. कांय खबरां प्रमाण बोटींत 28 प्रकारचीं कुडीं आसात. वट्ट 7 लक्झरी जलतरण तळ आसात. हाचे भायर वॉटर पार्कय आसा. तो संवसारांतल्या हेर पार्का परस व्हड आसा. ताका ‘कॅटेगरी-6’ अशें नांव दिलां. तातूंत उदकाच्यो सात स्लायडीं आसात.
हे बोटीची सगळ्यांत सवाय तिकेट 1851 डॉलरांत मेळटली. ती मियामी सावन अस्तंत कॅरिबियन मेरेन आसतली. हो प्रवास 6 दीसांचो आसा. हे तिकेट फुडल्या वर्सा सप्टेंबरांतच मेळटले. सगळ्यांत चड मोलाची तिकेट 10,864 डॉलर आसून ती मार्चांत बुक करूं येता. वट्ट 17 लायफबोटी आसात आनी दरेक लायफबोटींत 450 प्रवासी बसूंक शकतात. हे बोटीची चांचणी 22 जून सावन सुरू जाल्ली आनी अजून ती चालू आसा.