भांगरभूंय | प्रतिनिधी
अखेरेक मोपा विमानतळाचें उक्तावण जालें. 5 जानेवारीच्यान विमानां यो- वच करपाक लागतलीं. समेस्त गोंयकारां खातीर ही खोशेची, अभिमानाची गजाल. हो आंतरराष्ट्रीय विमानतळ 2870 कोटी रुपयांचो. अत्याधुनिक पद्दतीन तो उबारला. दाबोळे नात त्यो सगल्यो सुविधा हांगा आसतल्यो. तसो सुरवेक सावन हो विमानतळ वादांत सांपडिल्लो. तो सुरू जातकच दाबोळे विमानतळाचें कितें जातलें, असो प्रस्न ताचेर अवलंबून आशिल्ल्या सगल्यांक सतायतालो. आंदोलनांय जालीं. मात दाबोळेय सुरू उरतलो अशें आस्वासन सरकारान दिल्ल्यान मागीर सगलें शांत जालें. तरीय दाबोळी फक्त नांवा पुरतो उरतलो अशें कांय जाणांक अजून दिसता. फुडल्या वर्सभरांत कितें तें स्पश्ट जातलें. मोपाचें उक्तावण जावचे पयलींच 200 वयर विमानांचीं उड्डाणां निश्चीत जाल्यांत. म्हूर्त बरो जाला.
प्रधानमंत्री नरेंद्र मोदी हांणी उक्तावणा वेळार गोंयकारांक उर्बा दिवपी बरेंच कितें सांगलें. सुरवेक हो विमानतळ वर्साक 40 लाख 40 हजार तर चवथो पांवडो पुराय जातकच 1 कोटी 31 लाख प्रवासी हाताळटलो. मात, हे खातीर आमी सर्वार्थान सज्ज आसपाक जाय. हातूंतले थोडे पसून प्रवासी वा पर्यटक गोंयांत देंवले, हांगा रावले जाल्यार (गोंय हें पर्यटन केंद्र जाल्यान हें शक्य आसा.) अर्थीक नदरेन आमचें राज्य कूस परतितलें. ते नदरेन आमकां आसा त्या साधनसुविधांचो विस्तार करचो पडटलो. नव्यो उबारच्यो पडटल्यो. गोंयची लोकसंख्या 15 लाखांच्या आसपास. तेन्ना वयलो आंकडो मतींत घेतल्यार आमकां कितली तयारी करची पडटली, ताचो दरेकल्यान अदमास घेवचो. तातूंत आमी येसस्वी थारले जाल्यार बेकारेची समस्या बरीच उणी जातली. मोपा विमानतळान मुखार दवरिल्लें हें शिवधनुश्य आमकां भियेनासतना उखलचेंच पडटलें. पर्यटक वाडटकच कोयर, उदक, वीज, रस्ते हाचेरुय ताण येतलो. ताचोय विचार सरकारी यंत्रणेक करचो पडटलो. सध्या गोंयांक मेळटा ती वीज मोपा धांवपाक लागले उपरांत पावत अशें दिसना. बरें भायल्यान आमकां चड वीज हाडपाकूय मेळना. कारण पुरवण यंत्रणा दुबळी आसा. तेन्ना विजेचें जाळें नव्यान विणचें पडटलें. म्हादयचो गळो कर्नाटकान धरला, म्हणटकच उदकाचीय समस्या येतलीच. कोयराचो राकेस पयलींच हांगा येवन रावला. खाणां, भाजयो, फळां, पेयां विकपी, टॅक्सीसेवा, हाॅटेलां मुखारुय वाडट्या पर्यटकांक हाताळपाचें खर आव्हान आसतलें.
दाबोळे विमानतळाची तांक 83 लाख प्रवाशांची. थंय म्हालाची तशी येरादारी जायना. मोपा ती जातली. चालू अवस्थेंतले दोन विमानतळ आशिल्लें गोंय हें पयलेंच राज्य. हेर कडेन नवो विमानतळ सुरू जातकच आशिकुशीचे विमानतळ बंद जाल्यात. तें गोंयांत जावचें न्हय. कारण मोपा पुराय तांकीन सुरू जातकच पर्यटकां कडेन संबंदीत आशिल्ल्या दक्षीण गोंयांतल्या वेवसायिकांचेर परिणाम जावं येता. ताचोय विचार सरकारी यंत्रणेक करचो पडटलो. दक्षीण गोंयां परस उत्तर गोंय हें पर्यटनाचे बाबतींत मुखार आसा, हें जगाक खबर आसा. दोनूय विमानतळ चालू उरतले, विमानांय वांटून घाल्यांत, अशें राज्य आनी केंद्रीय मंत्र्यांनी हाचे पयलीं सांगलां. मात खुद्द विमान कंपनीं विचार बदलूंक शकतात. तशें जावचें न्हय.
विमानतळ बांदिल्ले कंपनीन मोपाक लागून समाजीक, अर्थीक उदरगत जातली, अशें म्हणलां. पेडणें म्हाल आतां मेरेन विकासा पसून पयस आशिल्लो. तो मुखेल प्रवाहांत येवचो. पूण, लोकसंख्येचो लोट येवन तातूंत तो व्हांवन वच्चो न्हय. वास्को कांयशें अशेंच जालां. विमानतळ, रेल्वे स्टेशन जालें काय थंयची जीण बरीच बदलता, हें वेगळें सांगपाक नाका.
नकटेच्या लग्नांत सत्राशें विघ्नां, अशी एक म्हण आसा. मोपा विमानतळाचे बाबतींत तें सिद्ध जालां. मुळांत हो विमानतळ जायच कित्याक असो सूर पयलीं सगलेच आळयताले. हालीं नांवाचो वाद जाल्लो. आतां मनोहर आंतरराष्ट्रीय एॅरपोर्ट (एमआयए) असो बारसो जाला. कांय शेतकार, बागायतदारांची जमीन गेल्या. तातूंतल्या बऱ्याच जाणांक योग्य लुकसाण भरपाय मेळूंक ना. तोय प्रस्न सरकाराक बेगीन निकालांत काडचो पडटलो. विमानतळा कडेन संबंदीत रोजगार, धंदो, वेवसाय आसा, थंय गोंयकारांक पयलें प्राधान्य दिवचें पडटलें. कारण आवटसोर्सिंगाच्या नांवा खाला गोंयकारांक कुशीक सारपाचे यत्न जाल्यात, असो लोकांक आरोप आसा.
मनोहर आंतरराष्ट्रीय विमानतळाच्या रुपान फुडलें वर्स गोंयांक नवी उर्बा, नवे हावेस, नवीं आव्हानां घेवन येतलें. तयार रावुंया, तीं स्विकारपाक!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
