भांगरभूंय | प्रतिनिधी
नवी दिल्ली, खबरां संस्था ः भारतीय करदात्यांक आतां यूपीआय वरवीं 5 लाख रुपया मेरेन कर भरपाक मेळटलो. आतां मेरेन ही मर्यादा एक लाख रुपया आशिल्ली. नॅशनल पेमेंट कॉर्पोरेशन ऑफ इंडियान (NPCI) सोमार, 16 सप्टेंबर सावन युनिफायड पेमेंट्स इंटरफेसांत (यूपीआय) ही सुविधा सुरू केल्या. हे खातीर सरकारान 24 ऑगस्टाक परिपत्रक जारी केल्लें.
हाचे आदीं 8 डिसेंबर 2023 दिसा रिझर्व्ह बँकेचे चलन धोरण समितीचे बसकेंत सरकारान हॉस्पिटल आनी शिक्षणीक संस्थांनी युपीआय वरवीं पेमेंट करपाची मर्यादा दिसाक एक लाख ते पांच लाख रुपया मेरेन करपाचे जाहीर केल्लें. तशेंच आतां आयपीओ आनी आरबीआयच्या रिटेल डायरेक्ट स्कीम्स येवजण्यां सारकिल्ल्या वेव्हारा खातीरय 5 लाख रुपया मेरेनचो यूपीआय वेव्हार करपाक मेळटा.
ऑगस्टांत विक्रमी 1,496 कोटी युपीआय वेव्हार
ऑगस्टांत यूपीआय (युनिफायड पेमेंट इंटरफेस) वरवीं 1,496 कोटी वेव्हार जाले. ह्या काळांत वट्ट 20.61 लाख कोटी रुपया हस्तांतरीत जाले. फाटल्या वर्सा ऑगस्टाच्या तुळेंत वेव्हारांचो आंकडो 41 टक्क्यांनी वाडलो. ऑगस्ट 2023 वर्सा यूपीआय वरवीं 1,059 कोटी वेव्हार जाले आनी ताचे वरवीं 15.77 लाख कोटी रुपयांची रक्कम हस्तांतरीत जाली. ही रक्कम एका वर्सात सुमार 31% वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
