भांगरभूंय | प्रतिनिधी
दोन वर्सांत सुमार 1.95 कोटी येणावळ जमा
पणजी : फाटल्या दोन वर्सांत पंचायत खात्यान राज्यांतल्या 20,763 अनधिकृत घरांक ‘ईएचएन’ क्रमांक जारी केल्यात. देखून ह्या घरां वरवीं आतां मेरेन 1.95 कोटी रुपयांची येणावळ मेळ्ळा.
चडशा पंचायतींतल्या सुमार 50 टक्के घरांक घर क्रमांक नाशिल्ल्यान कर मेळनाशिल्लो. ताका लागून पंचायतींची येणावळ देंवताली. सगल्या अनधिकृत घरांक ‘ईएचएन’ क्रमांक जारी करून तांचे कडल्यान कर वसूल करपाचो निर्णय सरकारान घेतिल्लो. घर कर वसुली करपाच्या हेतान मुख्यमंत्री डॉ. प्रमोद सावंतान सगळ्या अनधिकृत घरांक क्रमांक दिवपाखातीर दुरुस्ती कायदो करपाची घोशणा विधानसभेंत केल्ली. ह्या आंकड्याक लागून अनधिकृत घरां कायदेशीर जावची ना. तांकां फकत घर कर वसुल करपा खातीर क्रमांक दितले अशेंय मुख्यमंत्र्यान सांगिल्लें.
उपरांत पंचायत खात्यान 25 ऑक्टोबर 2021 दिसा हे संबंदी परिपत्रक जारी करून अनधिकृत घरांक ‘ईएचएन’ क्रमांक दिवपाची प्रक्रिया सुरू केली. ते भायर आरसीसी स्लॅब बांदकामा खातीर 2000 रुपया, छप्पराच्या घरां खातीर 1000 रुपया आनी झोपडपट्ट्यां खातीर 500 रुपया थारावीक शुल्क भरपाक अर्जदारांक सुचोवणी दिल्ली.
अनधिकृत घरांक ‘ईएचएन’ दिवपा खातीर अर्ज सादर केल्या उपरांत पंचायत सचीवान अर्जांची चवकशी करची. ज्या अर्जांक मान्यताय मेळटा तांणी थारायिल्ली शुल्क भरचें आनी ते उपरांतच तांकां ‘ईएचएन’ क्रमांक दिवचो अशें पंचायत संचालक सिद्धी हळर्णकारान परिपत्रका वरवीं सुचोवणी दिल्ली. ते प्रमाण ही प्रक्रिया चालू आसा आनी आतां मेरेन 20,763 घरांक घर क्रमांक मेळ्ळ्यात. ‘ईएचएन’ नंबर मेळ्ळ्या उपरांत तांकां नळ, वीज जोडणी मेळटा. हो निर्णय घेवन सरकारान हजारांनी कुटुंबांक फायदो केला. जाल्यार तांच्याकडल्यान कर एकठांय करून पंचायतीची येणावळ वाडयल्या.
| तालुका | क्रमांक मेळिल्ली घरां | येणावळ |
|---|---|---|
| पेडणे | 3066 | 25,32,513 |
| बर्देश | 5131 | 57,28,461 |
| दिवचल | 1348 | 13,28,612 |
| सत्तरी | 1789 | 6,86,223 |
| सासश्टी | 2417 | 27,82,073 |
| मुरगाव | 2838 | 21,16,170 |
| सांगे | 1741 | 25,77,919 |
| केपे | 1039 | 7,77,521 |
| काणकोण | 458 | 1,91,478 |
| वट्ट | 20,763 | 1,94,89,654 |
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
