भांगरभूंय | प्रतिनिधी
मांद्रें पुलिशेची खळ्ळ्या न्हीद, धांवपळ चालू
दुबाविताक 14 दिसांची पुलीस कोठडी
कोरगांवां लेगीत खून केल्ल्याची जबानी
भांगरभूंय । प्रतिनिधी
पेडणें : रशियन नागरीक आलेक्सेई लिओनोव हाणें आतां मेरेन विदेशी 15 चलयांचो आनी बायलांचो खून केल्ल्याची जबानी तो अदीं मदीं मांद्रें पुलिसांक दिता. हाका लागून मांद्रें पुलिसांक न्हीद खळ्ळ्या आनी धांवपळ लेगीत सुरू जाल्या. पुलीस दुबाविताक खून जाल्लो ते सुवातेर व्हरपाचो यत्न करतात, पूण दुबाविताक ती निश्चीत सुवात दाखोवपाक जमना, हे खातीर पुलिसांक मनस्ताप सोंसचो पडटा, अशें चित्र दिश्टी पडटा.
दोन म्हयन्यां आदीं हरमला एके आसामांतले बायलेचो खून केल्ल्याचो दावो दुबावीत रशियन पर्यटकान केला. पुलिसांनी सैमीक मरण नोंद करून ती कूड आसामांतल्या तिच्या घरच्यांचे सुवादीन केल्ली. ताका लागून ह्या प्रकरणाक आतां वेगळेंच मोडण मेळपाची शक्यताय आसा.
दुबावीत मदीं मदीं आपणे खंय खंय खून केल्यात तें सांगता, पूण ताका निशीच सुवात दाखोवपाक जमना हे खातीर कुडी सांपडप कठीण जालां. हालींच कोरगांवां लेगीत खून केल्ल्याचें तो आपले जबानेंत सांगता.
पेडणें म्हाल पुलीस उपअधिक्षक सलीम शेख हांचे कडेन संपर्क केलो तेन्ना तांणी सांगलें, रशियन नागरिकान जे दोन खून केल्यात, तांच्यो कुडी ताब्यांत घेतल्यात आनी पोस्टमार्टमा खातीर धाडल्यात. ताणें आनीक अशीं कामां केल्ली आसत जाल्यार ते नदरेन पुलिसांचो तपास चालू आसा, अशें सांगून अदीक म्हायती दिवपाक टाळाटाळ केली.
मोरजी आनी हरमल वाठारांत रशियन चलयांचो गळो चिरून खून केल्लो दुबावीत आलेक्सेई लिओनोव ह्या पर्यटकाक मांद्रें पुलिसांनी अटक केले उपरांत न्यायालया मुखार उबो केलो तेन्ना ताका 14 दिसांची पुलीस कोठडी दिली. ह्या दुबावितान आनीक खून केल्ल्याचो दुबाव आशिल्ल्यान ते नदरेन मांद्रें पुलीस तपास करतात. आलेक्सेई लिओनोव हाणें हरमलच्या गिरकरवाड्यार बिराडाक रावपी एलिना कासथोनोवा (37) हिचो गळो चिरून खून केलो. ते उपरांत मोरजेच्या मदलोवाड्यार ह्या दुबावितान एलिना वनिवा हे चलयेचो गळो चिरून खून केलो. ताणें खून कित्याक केले, हे संबंदांत मांद्रें पुलीस वेगवेगळे पद्दतीन जबान्यो घेतात. दुबावितान रशियन बायलांक, चलयांकूच मोगाच्या जाळ्यांत ओडून तांचे कडेन मोगाचे संबंद दवरले आनी ते उपरांत तांचेर वेगवेगळे तरेन अत्याचार केले. मोगाच्या जाळ्यांत सांपडले उपरांत हांसत खेळत फाटल्यान तांचे हात बांदप आनी उपरांत तांचेर वेगवेगळे पद्दतीन शारिरीक अत्याचार करपाचो प्रकार दुबावितान केल्ल्याचें उक्तें जालां.
10- 15 जाणांक दिलो मोक्ष : दुबाविताचो दावो
गोंयच्या हरमल आनी मोरजी ह्या नामनेच्या दर्यादेग वाठारांत दोन रशियन बायलांचो गळो चिरून निर्दयीपणान खून केल्ल्या प्रकरणांत दुबावीत रशियन नागरीक आलेक्सी लिओनोब (37) हाणें दावो केल्ल्या प्रमाण, ताणे एक दोन न्हय जाल्यार 10 ते 15 जाणांक जिणेंतल्यान मोक्ष दिला. हाका लागून पुलिसांक शेळो घाम फुटला. एका खुनाचो तपास चालू आसतनाच दुसरो खून उजवाडाक आयलो. ते उपरांत ह्या रशियन तरणाट्यान गोंयांत तशेंच हिमाचल प्रदेशांत लेगीत खूब जाणांक जिवितांतल्यान ‘मोक्ष’ दिल्ल्याचें, म्हणल्यार खून केल्ल्याचें सांगलां. तो खरें उलयता काय पुलिसांची दिशाभूल करता, हाची खोलायेन पुलीस पडटाळणी करतात.
पयलीं इश्टागत, उपरांत खून
खून केल्ल्या मदीं बायलां तशेंच दादल्यांचो लेगीत आस्पाव आशिल्ल्याचें दुबावीत पुलिसांक सांगता. आपूण सगल्यांत पयलीं इश्टागत करतालो आनी उपरांत ताचें खून करतालो. हीच आपली कुशळटाय आसा, अशें तो पुलिशेक सांगता. मोरजे दोन रशियन बायलांचो खून केल्ल्याची कबुली रशियन नागरीक आलेक्सी लिओनोव हाणें दिल्ल्याची म्हायती पुलीस सुत्रांनी दिली. ह्या प्रकरणाचो सध्या गोंय पुलीस खोलायेन तपास करता. वरिश्ठ अधिकारी लेगीत ह्या प्रकरणाचो तपास करपाक व्यस्त आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
