भांगरभूंय | प्रतिनिधी
पणजी: कर्मचारी भरती आयोगा कडल्यान तरेकवार खात्यां खातीर उमेदवारांची निवड करपाची प्रक्रिया सुरू आसतना आतां मेरेन फक्त 49 जाणांक खात्यां वतीन नेमणुकीचीं पत्रां मेळ्ळ्यांत. नॅटवर्क इंजिनियर, लॅब टेक्निशियन तशेंच शिक्षकांची नेमणूक जाल्ल्यां मदीं आस्पाव आसा.
सरकारी खात्यांनी कर्मचाऱ्यांची भरती करपा खातीर गोंय कर्मचारी भरती आयोगाची स्थापणूक जाली. आयोगान पयली जायरात 29 डिसेंबर 2023 दिसा दिली. नॅटवर्क इंजिनियर, लॅब टेक्निशियन, उपनिरिक्षक (वायरलेस), लायब्ररियन (ग्रेड 1), लायट हावज किपर, लायब्ररियन (ग्रेड 2) मेळून तरेकवार पदां खातीर 33 पदां भरपाची ही पयली जायरात आशिल्ली. हाचे उपरांत आयोगान 15 जानेवारी 2024 दिसां इंग्लीश शिक्षकांचीं 36 पदां भरपा खातीर जायरात दिली. दोनूय जायराती उपरांत अर्ज केल्ल्या उमेदवारांची सीबीटी परिक्षा जावन निकाल जाहीर जालो. ह्या पदां पैकीं 49 जाणांक नेमणूक पत्रां मेळून ते त्या, त्या खात्यांनी सेवेंत दाखल जाल्यात.
आयोगान आतां मेरेन तरेकवार पदां खातीरच्यो 6 जायराती जारी केल्यात. दोन हजार पदां भरपाच्या हेतान ह्यो जायराती जारी जाल्यात. पयल्या दोन जायरातीं खातीर परिक्षे सयत सगली प्रक्रिया पुराय जाल्या. हाचे उपरांत ज्यो जायराती जारी जाल्यात त्या पदां खातीर परिक्षा घेवन निवड प्रक्रिया सुरू आसा.
2023 वर्सा एकूच जायरात जारी जाली. 2024 वर्सा तीन जायराती जारी जाल्यो. 15 जानेवारी 2024 दिसा दिल्ले जायरातीतल्या पदांची भरती जाल्या. हाचे उपरांत 7 मार्च 2024 आनी 21 नोव्हेंबर 2024 दिसा जारी जाल्ले जायरातीतली पदां भरपाची प्रक्रिया सुरू आसा.
21 नोव्हेंबर 2024 दिसा एलडीसीची 232 आनी ज्युनियर स्टेनोग्राफराची 53 पदां भरपा खातीरची जायरात जारी जाल्ली. ह्या पदां खातीर सीबीटी परिक्षा जावन आतां कुशळटाय चांचणी जावपाची आसा.
—
शालांत मंडळ घेतलें कुशळटाय चांचणी
एलडीसी आनी ज्युनियर स्टेनोग्राफराच्या पदां खातीर 20 आनी 21 सप्टेंबराक गोंय शालांत मंडळा वतीन कुशळटाय चांचणी जातली. टायपिंगेची चांचणी 20 सप्टेंबराक जाल्यार शॉर्टहॅण्डाची चांचणी 21 सप्टेंबराक जातली. एलडीसी आनी ज्युनियर स्टेनोग्राफर पदां खातीर सीबीटी परिक्षा जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
